ەىدۇ, بۇۇ ەسىرتكى جانە قىلمىستار جونىندەگى باسقارماسىنىڭ, ەققدب وكىلدەرى جەمقورلىققا قارسى كۇرەس جونىندەگى جاھاندىق فورۋم جانە پاريج قالاسىنداعى ەىدۇ جەمقورلىققا قارسى جەلىسىنىڭ باسقارۋشى توبىنىڭ وتىرىسى بارىسىندا قازاقستاننىڭ سىبايلاس جەمقورلىققا قارسى ساياساتىن وڭ اتاپ ءوتتى, دەپ حابارلايدى Egemen.kz سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتىنە سىلتەمە جاساپ.
قازاقستان مونيتورينگتىڭ ءتورت كەزەڭىنەن ءساتتى ءوتىپ, ەىدۇ ساراپشىلارىنىڭ ۇسىنىمدارىنىڭ باسىم بولىگى ورىندالدى. شەتەلدىك لاۋازىمدى تۇلعالاردىڭ پارا الۋىنا قارسى كۇرەس جونىندەگى كونۆەنتسياعا قوسىلۋ جوسپارلانۋدا.
ەىدۇ-نىڭ بارلىق ۇسىنىمدارىن ورىنداۋ كەزىندە قازاقستان تاياۋ جىلدارى دامىعان ەلدەردىڭ كلۋبىنا مۇشەلىككە ۇمىتكەر بولا الادى دەپ بولجانۋدا.
بولاشاقتا بۇل ەىدۇ ەلدەرىمەن قۇقىقتىق كومەك كورسەتۋ, قىلمىسكەرلەردى ەكستراديتسيالاۋ جانە ولار زاڭسىز تاپقان م ۇلىكتى قايتارۋ ماسەلەلەرى بويىنشا ىنتىماقتاستىقتى نىعايتۋعا مۇمكىندىك بەرەدى جانە قازاقستاننىڭ قۇقىق قورعاۋ ورگاندارى قىزمەتكەرلەرىنىڭ ەۋروپا مەملەكەتتەرىنىڭ اۋماعىندا حالىقارالىق تەرگەۋ تاپسىرمالارى بويىنشا جۇرگىزىلىپ جاتقان جەدەل-ىزدەستىرۋ ءىس-شارالارىنا قاتىسۋى بويىنشا نەگىز جاسايدى. سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى دميتري مالاحوۆتىڭ باسشىلىعىمەن قازاقستان دەلەگاتسياسى جەمقورلىققا قارسى ءتيىمدى كۇرەسكە باعىتتالعان سوڭعى وزگەرىستەردى ۇسىندى. اتاپ ايتقاندا, ءبىرىنشى باسشىلاردىڭ قاراماعىنداعىلاردىڭ پاراساتتىلىعى ءۇشىن دەربەس جاۋاپكەرشىلىگى, قۇقىق قورعاۋ ورگاندارى قىزمەتكەرلەرى مەن سۋديالار ءۇشىن سىبايلاس جەمقورلىق قىلمىستارى ءۇشىن جاۋاپكەرشىلىكتى ارتتىرۋ, زاڭسىز شىعارىلعان اكتيۆتەردى قايتارۋ بويىنشا جۇرگىزىلىپ جاتقان جۇمىستار, نەگىزسىز بايىتۋ ءۇشىن جاۋاپكەرشىلىكتى ەنگىزۋ جانە جەمقورلىق فاكتىلەرى تۋرالى حابارلاعان ادامداردى كەشەندى قورعاۋ شارالارى سياقتى نورمالار مەن زاڭنامانى حالىقارالىق ستاندارتتارعا سايكەس قاتاڭداتۋ تۋرالى ءسوز بولدى.