وقۋ-اعارتۋ مينيسترلىگىنىڭ ءباسپاسوز قىزمەتى تاراتقان اقپاراتقا سايكەس, قازاقستاندا 6,6 ميلليون بالا بار, دەپ حابارلايدى Egemen.kz.
«بالالار سانى تۇراقتى ءوسۋ تەندەنتسياسىنا يە جانە قازاقستان حالقىنىڭ ۇشتەن ءبىر بولىگىن 6,6 ميلليون بالا قۇرايدى. جىل سايىن 400 مىڭنان استام بالا دۇنيەگە كەلەتىنىن ايتا كەتۋ كەرەك», دەدى قر بالالار قۇقىعىن قورعاۋ كوميتەتىنىڭ ءتورايىمى ناسىمجان وسپانوۆا.
ۆەدومستۆو دەرەگىنە قاراعاندا, 7 723 مەكتەپتە 3 479 000 قازاق بالاسى وقيدى.
بۇل رەتتە وقۋ-اعارتۋ ۆيتسە-ءمينيسترى ەدىل وسپان قازاقستاندا قانشا جەتىم بالا بار ەكەنىن قوسا ايتتى.
«ەلىمىزدە 22 080 جەتىم بالا بولسا, ونىڭ ىشىندە 3 790 بالا ينتەرناتتا تاربيەلەنىپ جاتىر. بۇگىندە ەرەكشە ءبىلىم الۋدى قاجەت ەتەتىن 188 000 بالانىڭ قۇقىعىنا باسا نازار اۋدارىلادى», دەدى ۆيتسە-مينيستر.