مەملەكەت باسشىسى قاسىم-جومارت توقاەۆتىڭ الماتى قالاسىنا ساپارىنىڭ ەكىنشى كۇنى ناۋرىزباي اۋدانىندا ورنالاسقان مەكتەپ جاسىنداعى بالالارعا ارنالعان يننوۆاتسيالىق شىعارماشىلىق ورتالىعىنىڭ جۇمىسىمەن تانىسۋدان باستالدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ورتالىقتا وقۋشىلاردى عىلىمي-تەحنيكالىق, كوركەم-ەستەتيكالىق شىعارماشىلىققا باۋلىپ, ولاردىڭ ەكولوگيالىق-بوتانيكالىق دۇنيەتانىمىن كەڭەيتەتىن, بولاشاق ماماندىعىن تاڭداۋىنا باعىت-باعدار بەرەتىن كلۋبتار مەن ۇيىرمەلەر جۇمىس ىستەيدى.
مەملەكەت باسشىسىنا ورتالىقتاعى كاسىبي باعدارلاۋ كابينەتىنىڭ جانە اۆيامودەلدەۋ, ۆيرتۋالدى زەرتحانا, بالامالى ەنەرگيا كوزدەرى سەكىلدى ۇيىرمەلەردىڭ جۇمىسى تانىستىرىلدى.
ورتالىقتى ارالاپ كورۋ بارىسىندا مەملەكەت باسشىسى جەتكىنشەكتەرمەن اڭگىمەلەسىپ, ولاردى بۇگىنگى مەرەكەسىمەن قۇتتىقتادى. سونداي-اق بالالاردىڭ دارىنىن, قابىلەتىن دامىتۋ ءۇشىن وسىنداي ورتالىقتار وتە قاجەت ەكەنىن اتاپ ءوتتى.
پرەزيدەنت بالالار وزدەرىنە ۇناعان ىسپەن اينالىسسا, ومىردە ۇلكەن جەتىستىككە جەتەتىنىن, قوعامدا قۇرمەتتى ازامات اتاناتىنىن ايتىپ, ولارعا ساتتىلىك تىلەدى.
ءۇش قاباتتى عيماراتتا ورنالاسقان يننوۆاتسيالىق شىعارماشىلىق ورتالىقتا 1000-نان استام بالا ءبىر مەزگىلدە ءتۇرلى ۇيىرمەگە جانە سپورت سەكتسياسىنا قاتىسا الادى. بۇدان بولەك, مۇندا پسيحولوگيالىق-پەداگوگيكالىق تۇزەتۋ, دەفەكتولوگ, لوگوپەد كابينەتتەرى جۇمىس ىستەيدى, سونداي-اق 300 ورىندىق كورەرمەن زالى, مەدياكورمە, ينتەراكتيۆتى ويىن جانە كوۆوركينگ الاڭدارى بار.