«نۋريكامال» ءانىن 5-6 جاسىمنان تىڭداپ ءوستىم. سول كەزدەن سانامدا جاتتالىپ قالعان. ال ءاننىڭ تاريحىن كەيىن ءبىلدىم. بۇل ءوزى قىزىق. ءاندى بىلمەيتىن تىڭدارمان كەمدە-كەم شىعار. بىراق كەيىنگى بۋىننىڭ كوبى ونىڭ قالاي تۋعانىنان بەيحابار.
ءبىر عۇمىر ءبىر ءاننىڭ عۇمىرى ءۇشىن جارالعانداي. ەڭ تازا سەزىم مەن ونەر ءۇشىن... ءاننىڭ بويىنداعى نازىكتىك پەن سىرلى ساز تۋىندىعا مۋزا بولعان نۋريكامالدىڭ بەينەسى. ءان كەيىپكەردىڭ اتىمەن اتالعان.
«جۇرەگىمدى ەلجىرەتكەن,
جانىم, قانداي جايدارى ەدىڭ», وسى جولداردا كومپوزيتوردىڭ عاشىقتىق كۇيى بار. قىزىعى, ءان ءماتىنىن كومپوزيتوردىڭ جارى جازىپ بەرگەن.
«بىز كوكتەمدە بالا-شاعامىزدى ەرتىپ, دوستارمەن تابيعات اياسىنا شىقتىق. ءۇش قىزىممەن گۇل تەرىپ جۇرگەندە جۇبايىما كوزىم ءتۇستى. ءبىر توبەشىكتە تەمەكىنى بۇرقىراتىپ تۇر ەكەن. «مىناعان نە بولدى؟» دەپ ويلادىم. كوپ وتپەي ساماۋرىن دا قاينادى. تۇردىەكەڭ شايدىڭ الدىندا نۋريكامالدى بيگە شاقىردى. ول باس تارتتى. «مەنىڭ كۇيەۋىم شاقىرعاندا بيگە شىقپايتىن بۇل قانداي ايەل؟» دەپ تاڭىرقادىم. سوسىن جۇبايىمنىڭ عاشىق بولعانىن اڭعاردىم. سول كۇنى تابيعات اياسىنا بىرگە بارعانىمىزبەن, قايتۋىمىز بولەك بولدى.
ۇيگە كەلگەن سوڭ جاتىن بولمەدە بالالارمەن جاتتىم. كەنەت پيانينونىڭ داۋىسىن ەستىدىم. ءبىر ەرەكشە ءاننىڭ ومىرگە كەلگەنىن سەزدىم. جۇبايىم ونى قايتا-قايتا وينادى. ءانى بار, بىراق ءسوز جوق. تەك ىڭىل عانا. سوسىن جۇبايىمنىڭ بولمەسىنە بارىپ, ودان قالام مەن قاعاز سۇرادىم. تۇنشىعىپ, جارىققا شىعا الماي جاتقان ءسوزىن جازباق بولدىم.
«اسپانداعى اي ما دەدىم,
جاستىق شاعىم قايدا مەنىڭ؟
جۇرەگىمدى ەلجىرەتكەن,
جانىم, قانداي جايدارى ەدىڭ», دەگەن ولەڭ جولدارى ويىما كەلدى. قاعازعا ءتۇسىردىم.
«وسى ما ايتقىڭ كەلگەنى؟» دەدىم.
ول «وسى» دەپ قىسقا قايىردى.
سوسىن عاشىق بولعان ادامىنىڭ ەسىمىن سۇرادىم.
«نۋريكامال, كامالىم-اي,
كۇندەي اشىق جانارىڭ-اي,
قولىم جەتپەي, ءسوزىم دە وتپەي,
جاۋتاڭدادىم, قاباعىڭا-اي, قاراعىم-اي» دەپ جازدىم. اۋەنىنە ءسوزى ۇيلەسە كەتتى. ارى قاراي تاعى ەكى شۋماعىن قاعازعا ءتۇسىردىم. سوسىن ول ءاندى ماتىنىمەن بىرگە ايتىپ كوردى. ۇناتتى, ماعان دا ۇنادى.
كەيىن ارادا ءبىراز ۋاقىت وتكەن سوڭ مەن نۋريكامالعا بۇل ءاننىڭ وزىنە ارناپ جازىلعانىن ايتتىم. ول كەزدە ءبىز ونىمەن دوس رەتىندە ارالاساتىنبىز», دەيدى كومپوزيتوردىڭ جارى سۇحباتتارىنىڭ بىرىندە.
اقىن ءحانبيبى ەسقاراقىزى ەستەلىگىندە: «ول قانداي ادام, مەنەن ارتىق پا؟» دەپ ويلادىم. ايەلدىڭ بارلىعىندا دەرلىك ەگويستىك سەزىم بولادى. بىراق كوبى جاعدايدىڭ بايىبىنا بارا بەرمەيدى», دەپ ايەلگە ءتان قىزعانىشتىڭ بولعانىن جاسىرمايدى. دەگەنمەن, نۋريكامالدى كورگەننەن كەيىن كۇيەۋىنىڭ تالعامىنا ريزا بولعانىن ايتادى. «ول بويجەتكەنگە عاشىق بولماۋ مۇمكىن ەمەس ەدى. وسىلايشا, «نۋريكامال» ءانى دۇنيەگە كەلدى. بۇل ءاندى ەستايدىڭ قورلانى سياقتى باعالادىم», دەيدى اقىن.
كومپوزيتور تۇردىقىلىش ىزتاەۆتىڭ «نۋريكامالى» كوپشىلىككە جۇبانىش جەكسەن ۇلىنىڭ ورىنداۋىندا تانىلدى. ال ءاننىڭ العاشقى ورىنداۋشىسى قۇرمان شويىنبەكوۆ بولعان.
ءاننىڭ كەيىپكەرى نۋريكامال 2021 جىلى دۇنيەدەن ءوتتى.