جامبىل وبلىسىنداعى وق-دارىلەر قويماسىندا وتپەن ارپالىسىپ قازا تاپقان ءورت ءسوندىرۋشى, حالىق قاھارمانى مەيىرجان ايمانوۆتىڭ پاۆلوداردا مۋرالى سالىندى. كەرەكۋلىك ءورت سوندىرۋشىلەر باتىر ارىپتەسىن ەسكە الىپ, رۋحىنا قۇرمەت كورسەتتى.
حالىق قاھارمانىنىڭ ەرلىگى ەل ەسىندە. 2021 جىلدىڭ 26 تامىزىندا جامبىل وبلىسىنداعى اسكەري بولىمدەردىڭ بىرىندە وق-ءدارى ساقتايتىن قويما ورتەندى. ءورتتى ءسوندىرۋ, ەۆاكۋاتسيالاۋ جۇمىستارىنا وڭىرلىك توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى باستىعىنىڭ ورىنباسارى مەيىرجان ايمانوۆ جەتەكشىلىك ەتىپ, ەكى ارىپتەسىن ورتتەن امان الىپ شىققان ەدى. الايدا ەكىنشى جارىلىس باتىردىڭ ءومىرىن قيدى. قازاقستان رەسپۋبليكاسىنا سىڭىرگەن اسا ۇزدىك ەڭبەگى, قىزمەتتىك بورىشىن اتقارۋدا كورسەتكەن ەرجۇرەكتىگى مەن جانقيارلىعى ءۇشىن مارقۇمعا حالىق قاھارمانى اتاعى بەرىلدى.
ەرەن ەرلىكتىڭ ۇلگىسىن تانىتقان م.ايمانوۆقا پاۆلودار جەرىندە مۇنداي قۇرمەتتىڭ جاسالۋى تەگىننەن-تەگىن ەمەس. ول 1995-1997 جىلدار ارالىعىندا ىشكى ىستەر مينيسترلىگىنىڭ پاۆلودار تەحنيكالىق كوللەدجىندە ءبىلىم العان. اكادەميك شوكين-كاتاەۆ كوشەلەرىنىڭ قيىلىسىنداعى كوپقاباتتى ءۇيدىڭ قابىرعاسىنا سالىنعان مۋرال ءورت سوندىرۋشىلەردىڭ جانقيارلىق ەڭبەگىنە ارنالىپ وتىر.
ەستەرىڭىزگە سالا كەتەيىك, جامبىلداعى توتەنشە وقيعا سالدارىنان 18 ادام كوز جۇمعان بولاتىن. ونىڭ 10-ى – ازاماتتىق قورعانىس وكىلى.
پاۆلودار