وبلىستىڭ ايناسىنا اينالعان باسىلىمنىڭ جارتى عاسىرلىق مەرەيتويىنا قازاقستان رەسپۋبليكاسى اقپارات جانە قوعامدىق دامۋ ءمينيسترى د.قىدىرالى, قر پارلامەنتى سەناتى مەن ءماجىلىسىنىڭ دەپۋتاتتارى, ەلىمىزدىڭ وزگە وڭىرلەرىنىڭ ءباسپاسوز باسشىلارى مەن جۋرناليستەرى كەلدى, دەپ حابارلايدى Egemen.kz.
50 جىلدىق شارا بارىسىندا اقتاۋدا «ماڭعىستاۋ» گازەتىنىڭ ءفوتوتىلشىسى ت.قۇسايىننىڭ شىعارماشىلىق كەشى ءوتىپ, گازەت تاريحىن توپتاستىرعان شاعىن مۇراجاي اشىلدى. مۇراجايداعى ەڭ كونە جادىگەر – 1931 جىلى شىعارىلا باستاعان لاتىن قارپىمەن شىققان «كولحوز جولى» گازەتىنىڭ 1934 جىلعى سانى, سونداي-اق «ستالين جولى» گازەتىنىڭ 1942 جىلعى ءنومىرى بار.
كەڭ اۋقىمدا اتالىپ ءوتىپ جاتقان شارا «دوستىق» ۇيىندە سالتاناتتى جيىنمەن جالعاستى.
جيىندا ايماق باسشىسى ن.نوعاەۆ ءسوز سويلەپ, باسىلىمنىڭ قوعامداعى ورنى مەن مىندەتى تۋرالى كەڭ بايانداپ, گازەت ۇجىمىنا ساتتىلىك تىلەدى. سونداي-اق ءسوز العان اقپارات جانە قوعامدىق دامۋ ءمينيسترى د.قىدىرالى ماڭعىستاۋ جۇرتشىلىعىن وبلىس ءۇنى بولعان «ماڭعىستاۋ» گازەتىنىڭ 50 جىلدىعىمەن قۇتتىقتاپ, بۇگىنگى قازاق ءباسپاسوزى, العا قويعان مىندەتتەر تۋرالى ءبولىستى.
سالتاناتتى جيىندا گازەت تاريحى جايلى بەينەفيلم كورسەتىلىپ, ارداگەر جۋرناليستەرگە ايرىقشا قۇرمەت كورسەتىلدى. قالاسى جۇيرىك جۋرناليستەر مەن گازەت قىزمەتكەرلەرى وبلىس اكىمىنىڭ, اقپارات جانە قوعامدىق دامۋ ءمينسترىنىڭ, سەنات جانە ءماجىلىس توراعالارىنىڭ قۇرمەت گراموتالارىمەن, العىس حاتتارىمەن, سونداي-اق وزگە دە ۇيىمدار مەن مەكەمەلەردىڭ قۇتتىقتاۋلارىمەن ماراپاتتالدى.