مەملەكەت باسشىسى قىتاي ساپارىندا قول قويىلعان ۆيزاسىز رەجىم ەكى ەلدىڭ تۋريزم سالاسىنا وڭ اسەر ەتەتىنىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«مادەنيەت جانە ءبىلىم سالاسىنداعى ىنتىماقتاستىقتى, سونداي-اق ءتۋريزمدى دامىتۋ قاجەت. جەكە ادامداردىڭ قارىم-قاتىناسى مەملەكەتارالىق بايلانىستاردى نىعايتۋعا سەپتىگىن تيگىزەرى ءسوزسىز. قازاقستان مەن قىتاي ازاماتتارىنىڭ ەكى ەل اراسىندا 30 كۇنگە دەيىن ۆيزاسىز جۇرۋىنە مۇمكىندىك بەرەتىن ۇكىمەتارالىق كەلىسىمگە قول قويىلدى. بۇل قۇجات ىسكەرلىك بايلانىس اياسىن كەڭەيتىپ, تۋريستەر لەگىن ارتتىرۋعا ىقپال ەتەدى دەپ سەنەمىن», دەدى قاسىم-جومارت توقاەۆ.
سونداي-اق پرەزيدەنت تۋريستىك وپەراتورلاردىڭ ءتىزىمىن جاساۋدى ۇسىندى.
«ورتالىق ازيا ەلدەرىنىڭ مادەنيەتى – باي, كورىكتى جەرلەرى دە – كوپ. سونىڭ ءبارى قىتايلىق تۋريستەر ءۇشىن قىزىقتى بولارى انىق. وسى ورايدا مەن «جىبەك جولى» تۋريستىك وپەراتورلارىنىڭ ءتىزىمىن جاساۋدى ۇسىنامىن. توپتىق تۋرلار ءۇشىن ۆيزاسىز رەجيم ەنگىزىپ, بىرىڭعاي تۋريستىك كلاستەر قۇرۋ قاجەت. سول كەزدە قىتاي تۋريستەرى ءبىر ساپاردا ورتالىق ازيانىڭ بىرنەشە ەلىنە بارا الادى», دەدى قاسىم-جومارت توقاەۆ.