مۇمكىندىگى شەكتەۋلى جاندار ءۇشىن گاگارين ساياباعىندا سپورتپەن اينالىسۋ مۇمكىندىگى تۋىپ وتىر. جۋىقتا مۇندا بوچچا ويىنىنا ارنالعان الاڭ اشىلدى. جەرگىلىكتى جاسوسپىرىمدەر ۇزبەي جاتتىعۋ جۇرگىزىپ, پولشا ەلىندە وتەتىن حالىقارالىق جارىسقا دايىندالىپ جاتىر.
بوچچا – دوپ ويىنى, تىرەك-قوزعالىس اپپاراتىنىڭ ەڭ اۋىر بۇزىلىستارى بار بالالار مەن ەرەسەكتەرگە سپورتتا ءوزىن-ءوزى سىناپ كورۋگە مۇمكىندىك بەرەتىن بىرنەشە پاراليمپيادالىق سپورت تۇرلەرىنىڭ ءبىرى. مۇنداي ەرەكشە الاڭ پاۆلودار قالاسىندا العاشقى رەت پايدا بولدى. قالالىق سپورت ءبولىمىنىڭ باسشىسى اسەت ابىلتاەۆتىڭ ايتۋىنشا, قۇنى 5 ملن تەڭگەگە باعالانعان جوبانى «سترويگرۋپپ PVL» جشس سالىپ شىققان. ساياباق ىشىندە ورنالاسقاندىقتان بالالار تازا اۋادا ەمىن-ەركىن تىنىستاپ, كەز كەلگەن ۋاقىتتا ويناي نەمەسە جاتتىعا الادى. بۇعان دەيىن مۇمكىندىگى شەكتەۋلى جاندار «اۆتوموبيليست» سپورت كەشەنىندە ويناپ كەلىپتى. الگىندەي اشىق الاڭ – وبلىستا ازىرشە ەكەۋ عانا. بۇعان دەيىن اقسۋ قالاسىندا سالىنعان.
جاتتىعۋ شارالارىنا سپورتشىلاردىڭ اتا-انالارى دا قاتىسادى. سەبەبى ولاردىڭ كومەگىنسىز ويىندى جۇرگىزۋ مۇمكىن ەمەس. جاتتىقتىرۋشى بالاعا دوپتى قالاي ۇستاۋ كەرەك ەكەنىن, لاقتىرۋ ءادىسى مەن ماشىقتارىن ۇيرەتەدى. مۇنداي مۇمكىندىككە اتا-انالار ءدان ريزا. ء«بىزدىڭ بالالارىمىزعا ارنايى الاڭ سالىپ بەرگەنىنە ريزاشىلىعىمىز شەكسىز. ارباعا تاڭىلعان جاسوسپىرىمدەرىمىز ەندى زەرىكپەيتىن بولدى. ولار بۇل جەردە ءبىر-بىرىمەن سويلەسىپ, الەۋمەتتىك جاعىنان بەيىمدەلەدى. ساياباقتا سەرۋەندەپ, تازا اۋامەن تىنىس الۋدىڭ ءوزى عاجاپ! بۇعان دەيىن بالامدى وبلىستىق بالالاردى وڭالتۋ ورتالىعىنا جانە «سامال» ورتالىعىنا عانا اپارا الاتىنمىن. ەندى بوس ۋاقىتىمىزدا وسىندا كەلىپ تۇراتىن بولدىق. تابيعات اياسىندا بالالارىمىز ءبىر-بىرىمەن تانىسىپ, كوماندالىق ويىننىڭ نە ەكەنىن ءتۇسىنىپ, كادىمگىدەي ىنتاسى وياندى. كەلەشەكتە ۇلكەن جارىستارعا قاتىسىپ, وزگە ەلدەرگە بارىپ جاتسا, ءبىز ءۇشىن ودان اسقان باقىت جوق», دەيدى انا لاريسا كوزلوۆا.
بوچچامەن تۇراقتى اينالىسىپ جۇرگەن الينانىڭ جاسى 28-دە, بىلتىر اتالعان پاراليمپيادالىق سپورت تۇرىنەن قازاقستاننىڭ چەمپيونى اتانىپتى. بۇعان دەيىن ماسكەۋدە ۇلكەن جارىسقا قاتىسىپ كەلگەنىن ماقتانىشپەن جەتكىزدى.
حالىقارالىق بالالار كۇنىنە وراي استانادا وتەتىن ەل چەمپيوناتىنا پاۆلودارلىق بوچچا سپورتىن سەرىك ەتكەندەر دە قاتىسامىز دەپ وتىر. ول باسەكەدە ەلىمىزدىڭ ءار تۇپكىرىنەن 200-گە جۋىق پاراليمپياداشى جينالادى دەپ كۇتىلۋدە. ال تامىز ايىندا پولشادا حالىقارالىق ويىن ۇيىمداستىرىلىپ, وعان كەرەكۋلىك دايانا نۇرعازينا مەن ۆيكتور كوجەۆنيكوۆ جول تارتپاق.
پاۆلودار