يسپانيادا قۇرعاقشىلىق بەلەڭ الىپ, اۋىل شارۋاشىلىعىنا وراسان زيان كەلىپ وتىر. بيلىكتەگىلەر سۋ كولەمىن ۇلعايتىپ, فەرمەرلەرگە 800 ميلليون ەۋرو بولەتىن بولدى, دەپ حابارلايدى Egemen.kz ەuronews-كە سىلتەمە جاساپ.
كليماتتىڭ وزگەرۋىنە بايلانىستى يسپانيادا سوڭعى ونجىلدىقتا بولماعان قۇرعاقشىلىق بولىپ جاتىر. ەلدەگى قۇرعاقشىلىقپەن كۇرەستى كۇشەيتۋگە جالپى 2 ميلليارد ەۋرودان استام قارجى بولىنەدى.
ۇكىمەتتىڭ كەزەكتەن تىس وتىرىسىندا تابيعي اپاتتاردىڭ سالدارىن جەڭىلدەتۋ جونىندەگى شارالاردى قامتيتىن جوسپار بەكىتىلدى. قۇجاتتا سۋمەن جابدىقتاۋدىڭ جاڭا جۇيەلەرىن سالۋعا قاراجات ءبولۋ كوزدەلگەن. سونىمەن قاتار بيلىك قالا ىشىندەگى سۋدى قايتا پايدالانۋ كولەمىن ەكى ەسە ارتتىرۋعا نيەتتى.
«سۋ كولەمىن ۇلعايتۋ ءبىزدىڭ باستى ماقساتىمىز. قايتا پايدالاناتىن سۋ كولەمىن ۇلعايتامىز. 2027 جىلعا قاراي ونى 10%-دان 20%-عا دەيىن ارتتىرامىز», دەدى يسپانيانىڭ ەكولوگيا ءمينيسترى تەرەزا ريبەرا.
جوسپار مۋنيتسيپالدىق جانە ايماقتىق سايلاۋعا ەكى اپتا قالعاندا ماقۇلداندى.
بارسەلونادان شامامەن 100 شاقىرىم جەردە ورنالاسقان ساۋ سۋ قويماسىنداعى سۋ دەڭگەيى ءساۋىر ايىندا رەكوردتىق دەڭگەيگە دەيىن تومەندەدى.
كليمات داعدارىسى قۇرعاقشىلىقتىڭ اسەرىن كۇشەيتىپ جىبەردى. سالدارىنان شارۋا قوجالىقتارى قاتتى زارداپ شەگىپ جاتىر. بيلىك ولارعا كومەك رەتىندە شامامەن 800 ميلليون ەۋرو بولۋگە ۋادە بەردى.