الەم چەمپيوناتى استانادا وتەدى

2016 جىلى استانادا الەم چەمپيوناتى ۇيىمداستىرىلعان ەدى. سول جارىستا قازاقستان قۇراماسى تابىس­تى ونەر كورسەتىپ, 4 التىن مەن 2 قولا مەدال ولجالاعان-تىن. اتاپ ايتساق, نازىم قىزايباي, دينا جولامان, ۆالەنتينا حالزوۆا جانە ءلاززات كۇنگەيباەۆا تەڭدەسسىز دەپ تانىلسا, جاينا شەكەربەكوۆا مەن ايجان قوجابەكوۆا ءۇشىنشى ساتىعا تابان تىرەدى. ءدال وسى كورسەتكىشتىڭ ارقاسىندا جەرلەستەرىمىز جالپىكوماندالىق ەسەپتە كوش باستادى. اتالعان جارىستا بىزدەن بولەك, تاعى بەس مەم­لەكەت­تىڭ ءانۇرانى شىرقالىپ, 19 ەلدىڭ تۋى كوكتە جەلبىرەدى. سول كەزدە ايبا باسشىلىعى چەمپيوناتتىڭ ۇيىمداستىرىلۋ دەڭگەيىنە وتە جوعارى باعا بەرىپ, مەيماندار قازاقتىڭ قوناقجايلىعىنا ءتانتى بولىپ قايتتى.

– قازاقستان سەكىلدى اسا كۇشتى بوكس دەرجاۆاسى ايەلدەر اراسىنداعى الەم چەمپيوناتىن قايتا قابىلداعالى جاتىر. ءبىز وعان ريزامىز. وسىدان جەتى جىل بۇرىن تورتكۇل دۇنيەنىڭ تەڭ­دەسسىز بىلعارى قولعاپ شەبەرلەرى اس­تانادا جينالعان ەدى. ول كەزدە جارىس وتە جوعارى دەڭگەيدە ۇيىم­داستىرىلدى. كەلەسى جىلى دا ءبىز بۇرىمدىلار اراسىنداعى كەرەمەت سپورتتىق ءىس-شارانىڭ كۋاسى بولا­تىنىمىزعا كۇمانىمىز جوق, – دەيدى IBA پرەزيدەنتى ۋمار كرەملەۆ.

قازىردىڭ وزىندە استاناداعى جا­رىس­­تىڭ جۇلدە قورى بەلگىلى. ول 4,8 ميلليون اقش دوللارىن قۇراپ وتىر. سوعان ساي باس جۇلدەنى ول­جا­لا­عان بوكسشىعا 200 مىڭ دوللار بەرىلسە, كۇمىس مەدال يەلەنگەندەر سول سومانىڭ تەڭ جارتىسىن الادى. ال قولا جۇلدەنى ەنشىلەگەندەرگە 50 مىڭ دوللار تيەسىلى.

ەڭ كەيىنگى الەم چەمپيوناتى بيىل­عى ناۋ­رىز ايىندا ءۇندىستاننىڭ نيۋ-دەلي قالا­سىندا ءوتتى. بۇل جارىستا 64 مەم­لەكەتتەن كەلگەن 324 بۇرىمدى باق سىنادى. 2 كۇمىس پەن 4 قولا يەلەن­گەن قا­زاقستان قۇراماسى جالپى ەسەپتە سە­گىزىنشى ساتىعا جايعاستى. ول كەزدە كارينا يبراگيموۆا (57 كيلو) مەن ءلاززات كۇنگەيباەۆا (+81 كيلو) فينالعا دەيىن جەتسە, الۋا بال­قى­بەكوۆا (48 كيلو), نادەجدا ريابەتس (66 كيلو), ۆالەنتينا حالزوۆا (75 كيلو) جانە فاريزا شولتاي (81 كيلو) قولا مەدالدى مويىندارىنا ءىلدى. كوماندالىق سايىستا ءۇندىستان قۇرا­ما­سى (4+0+0) ۇزدىك شىقتى. ەكىنشى جانە ءۇشىنشى ورىنداردى قىتاي (3+1+3) مەن رەسەي (1+1+1) ولجالادى.