«قازگيدرومەتتىڭ» بولجامى بويىنشا بيىل جاز جىلداعىدان ىستىق ءارى قۇرعاق بولادى. قازاقستاننىڭ باتىسى مەن شىعىسىندا جانە وڭتۇستىگىندە ءورت قاۋپى كۇشەيۋى مۇمكىن. بۇل تۋرالى ۇكىمەت وتىرىسىندا پرەمەر-مينيستر ءاليحان سمايىلوۆ ايتتى, دەپ حابارلايدى Egemen.kz.
«توتەنشە جاعدايلاردىڭ الدىن-الۋعا باسا كوڭىل ءبولۋ كەرەك. قازىردىڭ وزىندە كەيبىر وڭىرلەردە كۇردەلى جاعداي قالىپتاسىپ وتىر. وتكەن اپتادا قازاقستاننىڭ سولتۇستىگىندە جانە رەسەيدىڭ شەكارالاس ايماقتارىندا بولعان ءورتتىڭ ءتۇتىنى ەلورداعا دەيىن جەتتى. ال تابيعي ورتتەرگە قارسى دايىندىق شارالارى تالاپقا ساي بولماي تۇر. ءبىز مۇنىڭ قايعىلى جاعدايلارعا اكەلىپ سوعاتىنىن كورىپ وتىرمىز», دەدى ءاليحان سمايىلوۆ.
سونداي-اق پرەمەر-مينيستر كۇن جىلىنا باستاعاننان بەرى ەلىمىزدە 120-دان استام تابيعي ءورت وقيعاسى تىركەلگەنىن اتاپ ءوتتى. ۇكىمەت باسشىسىنىڭ ايتۋىنشا, ولار كوپ جاعدايدا ادامداردىڭ كىناسىنەن, قاۋىپسىزدىك شارالارىن ساقتاماعاننان بولادى.
ء«تىپتى, ەلدى-مەكەندەرگە ىرگەلەس اۋماقتار مەن القاپتاردان باستالعان ءورت تۇرعىن ۇيلەرگە اۋىسىپ, ادامداردىڭ ومىرىنە قاۋىپ ءتوندىرىپ وتىر. بيىل وسىنداي 14 جاعداي تىركەلدى. بۇل – ءبىرىنشى كەزەكتە, ءورت قاۋىپسىزدىگىنە جاۋاپتى ۋاكىلەتتى ورگاندار مەن جەدەل ارەكەت ەتۋى ءتيىس توتەنشە جاعداي قىزمەتتەرى مەن اكىمدىكتەردىڭ جۇمىسىنداعى كەمشىلىك. سوندىقتان ورتتەن قورعايتىن بەلدەۋلەردى جىرتۋ, ىرگەلەس اۋماقتاردى قۋراعان شوپتەردەن تازارتۋ سياقتى جۇمىستاردى تەز ارادا جۇرگىزۋ كەرەك», دەدى ۇكىمەت باسشىسى.