قازاقستاندىق بلوگەر اسەت مىرزاباەۆ ماڭعىستاۋ وبلىسىنداعى تورىش القابىنان ەرەكشە تاستار (شار تارىزدەس مينەرالدى تۇزىلىمدەر, كونكرەتسيالار) ۇرلانىپ جاتقانىن ايتقان ەدى. وڭىرلىك پوليتسيانىڭ ءباسپاسوز قىزمەتى حابارلاعانداي, ۇرلانعان تاستار ورنىنا قايتارىلادى, دەپ حابارلايدى Egemen.kz tengritravel.kz سايتىنا سىلتەمە جاساپ.
بلوگەر وقىرماندارىمەن بولىسكەن ۆيدەودا ماڭعىستاۋ وبلىسىندا جۇرگەنىن جانە ونىڭ كوز الدىندا تورىش القابىندا ادامدار ەرەكشە تاستاردى جۇك كولىگىنە تيەپ جاتقانىن ايتقان ەدى.
بۇل ۆيدەو حالىق اراسىندا ۇلكەن رەزونانس تۋدىردى. وسى ورايدا وبلىستىق پوليتسيا دەپارتامەنتى دە پىكىر ءبىلدىردى.
«الەۋمەتتىك جەلىگە مونيتورينگ جۇرگىزۋ كەزىندە «شارلار القابىندا» تۇسىرىلگەن ۆيدەو تەكسەرىلدى. پوليتسەيلەر جۇرگىزۋشىنىڭ كىم ەكەنىن انىقتادى. زاڭبۇزۋشىلارمەن پروفيلاكتيكالىق اڭگىمە جۇرگىزىلدى. تاستار ورنىنا قايتارىلدى», دەدى پد ءباسپاسوز قىزمەتىنىڭ وكىلدەرى.
تورىش (تورىس) القابى باتىس قاراتاۋ تاۋلارىنىڭ سولتۇستىك شەتىندە, ياعني ماڭعىستاۋ وبلىسىنىڭ التىنقازعان جەرىندە, اقتاۋ قالاسىنان جۇز شاقىرىم جەردە ورنالاسقان.
ايتا كەتسەك, «شارلار القابىنىڭ» قۇپياسى وتە كوپ. اتالمىش جەردە دوڭگەلەك تاستاردىڭ قايدان پايدا بولعانى تۋرالى ناقتى دەرەك جوق. دەسە دە, جۇمباق تاستاردىڭ پايدا بولۋى تۋرالى بىرنەشە نۇسقا بار. ولاردىڭ عىلىمي اتاۋى - كونكرەتسيالار. زەرتتەۋشىلەردىڭ سوزىنشە, بۇل تاستاردىڭ ىشىندە حيميالىق كەستەدەگى بارلىق ەلەمەنت بولۋى مۇمكىن.