حالىقتىڭ جۇرەگىنەن ورىن العان اندەردىڭ ارقيلى تاعدىرى بولادى. راسىندا, كوڭىل تولقىتقان تۋىندىنىڭ جايدان جاي تۋمايتىنى انىق. تىڭدارماننىڭ قۇلاعىندا جاتتالىپ قالعان «كەلشى, ايىم» ءانى كورەرمەنگە «گاۋحارتاس» ءفيلمى ارقىلى جاقسى تانىس.
«اي نۇرى ارايلى
ايدىنعا تارايدى,
سۇيىكتىم كەلەر مە, ياپىرماۋ؟», دەيدى…
ءاننىڭ بويىندا ازالى مۇڭ بار. سارىلا كۇتكەن ساعىنىش بار. قايعىلى تاعدىر بار.
بىردە كومپوزيتور مەلس وزبەكوۆ قامشىبەك اقاتاەۆقا ءاننىڭ شىعۋ تاريحى تۋرالى ايتقان ەكەن.
«بۇل مەنىڭ كونسەرۆاتوريادا وقىپ جۇرگەن كەزىم ەدى. الماتى مەديتسينالىق ينستيتۋتىنىڭ ايىمزادا ەسىمدى قىزىنا عاشىق بولدىم. جانارلارىمىز وتتاي جانىپ, قوس جۇرەك ءبىرىن-ءبىرى ءتۇسىنىپ, ماحابباتتىڭ شارابىنا ماس بولىپ جۇرگەنىمىزدە, جازعى كانيكۋل دا كەلىپ قالدى. «جاڭا وقۋ جىلى باستالعانشا...» دەپ, ەكەۋمىز ءبىر-ءبىرىمىزدى قيماي, ول ءوزىنىڭ اۋىلى الماتى ماڭىنا, مەن لۋگوۆويعا كەتە باردىق. العاشقى كەزدە ايىمزادا حابارىن ايتىپ, حات كەلىپ تۇرۋشى ەدى. سوڭىرا ونىڭ ءىزى سۋعا سىڭگەندەي عايىپ بولدى. سەبەبىن سۇراپ, حات جازايىن دەسەم, ول: «ۇيگە حات جازبا, اتا-انام ءبىلىپ قويسا, ۇيات بولادى» دەگەن سوڭ كانيكۋلدىڭ ءبىتۋىن كۇتتىم.
ۇزدىگىپ كۇتكەن جاڭا وقۋ جىلى دا باستالار ۋاقىت كەلدى. مەن اۋىلدان قۇستاي ۇشىپ الماتىعا كەلسەم, ايىمزادا ءالى كەلمەپتى. ەكى كوزىم ءتورت بولىپ وتىرعاندا, كۋرستاس قىزداردىڭ ءبىرى كەلىپ, ايىمزادانىڭ كانيكۋل كەزىندە شومىلىپ ءجۇرىپ, سۋعا كەتىپ قايتىس بولعانىن ايتتى. مەن كەزدەيسوق سەڭ سوققانداي كوزىم قاراۋىتىپ, وتىرىپ قالدىم», دەيدى ول ەستەلىگىندە.
ءان كوپشىلىككە دۋلات يسابەكوۆتىڭ شىعارماسى جەلىسىندە تۇسىرىلگەن «گاۋحارتاس» ءفيلمى ارقىلى تانىمال بولعاندىقتان ەكران بەتىندە ء«اننىڭ ءسوزىن جازعان - دۋلات يسابەكوۆ» دەپ جازىلىپ جۇرگەن. بىراق ءان جيناقتارىندا ءاننىڭ ءسوزىن جازعان اۆتور ءابدىراحمان اسىلبەك ەكەنى كورسەتىلگەن.
كورىكتى كول بەتى,
كوك ەلەس كولبەدى,
مەن تۇرمىن جاعادا جابىرقاۋ.
اي نۇرى ارايلى
ايدىنعا تارايدى,
سۇيىكتىم كەلەر مە, ياپىرماۋ؟
ايدىن كول, سەن ايتشى,
سامال جەل, سەن ايتشى,
جارىما قۇس بولىپ ۇشايىن.
ءبىر حابار بەرشى, ايىم,
جاقىنداپ كەلشى, ايىم,
لاپىلداپ ماڭگى قۇشايىن.
ايىم بوپ قالقىشى,
قايىڭ بوپ بالقىشى,
قىزىقتى كوكتەمنىڭ كەشىندە.
جاراستى ءۇنىمىز,
جاراستى جىرىمىز,
تەربەلدىك ايدىن كول توسىندە.
گ ۇلىم بوپ اڭقىدىڭ,
نۇرىم بوپ شالقىدىڭ,
ورتەدى ءتانىمدى وت لەبىڭ.
باقىتتى شاقتاردا,
جاقۇتتى باقتاردا,
وزىڭمەن بىرگە كوكتەدىم.
ءابدىراحمان اسىلبەك