قازاقستان رەسپۋبليكاسىنىڭ مىسىر اراب رەسپۋبليكاسىنداعى ەلشىسى جانە ماروككو كورولدىگىندە ەلشى قىزمەتىن قوسا اتقارۋشى ب.ارىن باستاعان قازاقستاندىق دەلەگاتسيا ماروككو كورولدىگىنىڭ استاناسى – رابات قالاسىندا وتكەن ءبىلىم, عىلىم جانە مادەنيەت ىستەرى جونىندەگى يسلام ۇيىمى (يسەسكو) اتقارۋشى كەڭەسىنىڭ 35-ءشى سەسسياسىنا قاتىستى.
سەسسيا كەزىندە يسەسكو باس ديرەكتورى ابدەل ءازيز ات-تۋەيدجريدىڭ 2013 جىلى ۇيىمنىڭ اتقارعان جۇمىسىنا, ونىڭ بيۋدجەتىنىڭ ورىندالۋ بارىسىنا قاتىستى بايانداماسى تىڭدالدى, سونداي-اق, ۇيىمنىڭ 2016-2018 جىلدارعا ارنالعان «ءىس-قيمىل جوسپارىنىڭ» نەگىزگى باعىتتارى قاراستىرىلدى.
اتالمىش شارا قارساڭىندا ب.ارىن يسەسكو اتقارۋشى كەڭەسىنىڭ مۇشەسى رەتىندە رابات قالاسىندا «وڭتۇستىك-وڭتۇستىك باعىتى تەك ستراتەگيا ەمەس, ول – قاجەتتىلىك» ايدارىمەن وتكەن كران-مونتانا فورۋمىنىڭ 25-ءشى سەسسياسىنىڭ جابىلۋ سالتاناتىنا قاتىسىپ, ءسوز سويلەدى.
ءوز كەزەگىندە, يسەسكو باس ديرەكتورى ءا.ات-تۋەيدجري كوپۇلتتى جانە كوپكونفەسسيالى قازاقستان ازاماتتارىن زاماناۋي دامىعان مەملەكەت قۇرۋ يدەياسى توڭىرەگىندە بىرىكتىرە العان قازاقستان پرەزيدەنتى ن.ءا.نازارباەۆتىڭ ءوز حالقىنىڭ ناعىز كوشباسشىسى بولىپ تابىلاتىنىن اتاپ ءوتتى. ونىڭ ءسوزى بويىنشا, كەيبىر ەلدەردە قاندى قاقتىعىستاردىڭ ورىن الۋىنىڭ باستى سەبەبى ولاردىڭ باسشىلارىنىڭ جەكە ءدىني جانە ەتنوستىق توپتارعا سۇيەنىش ارتۋى.
ماروككوعا جۇمىس ساپارى شەڭبەرىندە ب.ارىن يسەسكو باس ديرەكتورى ءا.ات-تۋەيدجريمەن جانە كورولدىك پارلامەنتى پالاتالارىنىڭ توراعالارىمەن ەكىجاقتى كەزدەسۋلەر وتكىزدى.
ءا.ات-تۋەيدجريمەن يسەسكو-نىڭ الماتى قالاسىندا وڭىرلىك وكىلدىگىن اشۋ, قازاقستاندىق ديپلوماتتاردى ۇيىمنىڭ حاتشىلىعىنا جۇمىسقا تارتۋ, سونداي-اق, «الماتى – يسلام مادەنيەتىنىڭ استاناسى» جىلى اياسىندا 2015 جىلى بىرلەسىپ وتكىزىلەتىن شارالارعا دايىندىق بارىسى جونىندە ماسەلەلەر قاراستىرىلدى, دەپ حابارلادى قازاقستاننىڭ ەگيپەتتەگى ەلشىلىگى.