الەۋمەتتىك جەلىدە پارلامەنت ءماجىلىسىنىڭ توراعاسى ەرلان قوشانوۆتىڭ ۇلىبريتانيا كورولى III كارلدىڭ تاققا وتىرۋ راسىمىندەگى سۋرەتى پايدا بولدى, دەپ حابارلايدى Egemen.kz.
لوندونداعى ءتاج راسىمىنەن تۇسىرىلگەن سۋرەتتى ازەربايجان ميللي ءماجىلىسىنىڭ توراعاسى ساحيبا گافاروۆا Twitter-دەگى پاراقشاسىندا جاريالادى.
«لوندونداعى ۆەستمينستەر ابباتتىعىندا تۇركيانىڭ ۆيتسە-پرەزيدەنتى فۋات وكتاي, قازاقستان پارلامەنتى ءماجىلىسىنىڭ توراعاسى ەرلان قوشانوۆ جانە وزبەكستان پرەمەر-ءمينيسترىنىڭ ورىنباسارى ساردور ومىرزاقوۆپەن ۇلىبريتانيا كورولىنىڭ تاققا وتىرۋ ءراسىمى كەزىندە», دەپ جازدى گافاروۆا سۋرەتتىڭ استىنا.
ەسكە سالا كەتەيىك, قازاقستاننان ۇلىبريتانيا كورولى III كارلدىڭ تاققا وتىرۋ راسىمىنە ءماجىلىس توراعاسى ەرلان قوشانوۆ قاتىستى. III چارلز بەن كورولەۆا كاميللانىڭ ءتاج كيگىزۋ ءراسىمى پاتشايىم II ەليزاۆەتا قايتىس بولعاننان كەيىن سەگىز ايدان كەيىن ۆەستمينستەر ابباتتىعىندا 6 مامىردا ءوتتى.
ءىس-شاراعا ەكى مىڭعا جۋىق قوناق قاتىستى. بۇل II ەليزاۆەتانىڭ تاققا وتىرۋ راسىمىنە قاتىسقانداردىڭ تورتتەن ءبىرى عانا. بۇل تىزىمگە كورولدىك وتباسى مۇشەلەرى, شەتەلدىك مەملەكەت باسشىلارى مەن قۇرمەتتى قوناقتار, بريتاندىق ساياسي كوشباسشىلار كىرەدى.
كوروناتسيا كەزىندە چارلز 74 جاستا بولدى. وسىلايشا ول مونارح تاعىنا وتىرعانداردىڭ ەڭ ۇلكەنى بولدى. كورول ءوز انتىندا ۇلىبريتانيانى جانە ءوزى دوستاستىقتىڭ 15 ەلىن باسقارۋعا ۋادە بەردى (انتيگۋا مەن باربۋدا, گرەنادا, اۆستراليا, كانادا, جاڭا زەلانديا, بەليز, يامايكا, سەنت-كيتس پەن نەۆيس, پاپۋا-جاڭا گۆينەيا, سولومون ارالدارى, سەنت-ليۋسيا جانە ت.ب.).
كورول چارلزعا ارنايى تاپسىرىلعان كيەلى كىتاپ بەرىلدى. بۇدان سوڭ ول انت بەرىپ, ونىڭ كوشىرمەلەرىنە قول قويدى. پاتشا قۇرباندىق ۇستەلىنىڭ الدىندا تىزە بۇگىپ, داۋىستاپ دۇعا ەتتى.
ەسكە سالايىق, ۇلىبريتانيا پاتشايىمى II ەليزاۆەتا 2022 جىلى 8 قىركۇيەكتە 96 جاسىندا شوتلاندياداعى بالمورال سارايىندا قايتىس بولدى. كەيىن ونىڭ ۇلى حانزادا چارلز پاتشا بولىپ, III چارلز دەگەن ەسىمدى الدى.