ىشكى ىستەر مينيسترلىگىنىڭ الماتى اكادەمياسى كيبەرقاۋىپسىزدىك ماماندارىن دايىندايدى. بۇل تۋرالى وڭىرلىك كوممۋنيكاتسيالار قىزمەتىنىڭ الاڭىندا ءىىم الماتى اكادەمياسى باسشىسىنىڭ ورىنباسارى, پوليتسيا پولكوۆنيگى ەرجان بيمولدانوۆ ايتتى, دەپ حابارلايدى Egemen.kz.
بيمولدانوۆتىڭ ايتۋىنشا, كەلەسى وقۋ جىلىنان باستاپ ۆەدومستۆولىق جوو-دا «قۇقىق قورعاۋ قىزمەتى», «كيبەرقاۋىپسىزدىكتى قامتاماسىز ەتۋ», ء«ىىو قىزمەتىن IT-كريميناليستيكالىق قامتاماسىز ەتۋ», «اقپاراتتىق جۇيەلەر» سەكىلدى جاڭا باعىتتار بويىنشا ىشكى ىستەر ورگاندارىنىڭ كاسىبي كادرلارىن دايىنداي باستايدى.
«سوڭعى جىلدارى تەك قازاقستاندا عانا ەمەس, بۇكىل الەمدە كيبەرقىلمىس, ينتەرنەت-الاياقتىق بەلەڭ الدى. وسى قىلمىستارعا ءتيىمدى قارسى تۇرۋ كەرەك ەكەنىن ەسكەرە وتىرىپ, جاڭا ءبىلىم بەرۋ باعدارلامالارىن اشۋ تۋرالى شەشىم قابىلداندى. بۇل باعىتتا استانا جانە الماتى قالالارىنىڭ پوليتسيا دەپارتامەنتتەرىندە كيبەرقىلمىستى اشۋ جانە تەرگەۋمەن اينالىساتىن ارنايى بولىمشەلەر اشىلدى. ولار «كيبەرپول» دەپ اتالادى. ءبىز وسى بولىمشەلەردىڭ قىزمەتكەرلەرىن الماتى اكادەمياسىنىڭ قابىرعاسىندا وقىتاتىن بولامىز. سونداي-اق اكادەميادا كيبەرزەرتحانا مەن كيبەرپوليگون اشىلعان», دەدى سپيكەر.
«كۋرسانتتار شاكىرتاقى الادى. وقۋ مەرزىمى مەرزىمدى اسكەري قىزمەت وتكەرۋمەن تەڭ. وقۋدى اياقتاعان سوڭ, تۇلەكتەرگە «ۇلتتىق قاۋىپسىزدىك جانە اسكەري ىستەر باكالاۆرى» جانە «كيبەرقاۋىپسىزدىكتى قامتاماسىز ەتۋ سالاسىنداعى باكالاۆر» بىلىكتىلىكتەرى بار مەملەكەتتىك ۇلگىدەگى ديپلوم بەرىلەدى, سونىمەن قاتار «پوليتسيا لەيتەنانتى» ارنايى اتاعى بەرىلەدى», دەدى بيمولدانوۆ.
ەرجان بيمولدانوۆ سونداي-اق اكادەميادا ارتىقشىلىق رەتىندە تەگىن تاماق, فورمالىق كيىم, مەديتسينالىق قىزمەت كورسەتۋ, تۇرعىلىقتى جەرىنە بارۋ مەن كەرى قايتۋ (پويىزبەن) بولاتىنىن ايتتى.