ماڭعىستاۋ مەديتسينالىق نىساندارىنىڭ قاتارى تولىعا ءتۇستى. تۇساۋىن استانا كۇنىنە ورايلاستىرا كەسكەن قوس نىساندى تۇرعىندار كوپتەن كۇتكەن بولاتىن.
ءبىرى – قۇرىلىسى اياقتالعان اقتاۋ قالاسىنداعى ماڭعىستاۋ وبلىستىق اۋرۋحاناسىنىڭ جاڭادان سالىنعان «گ» بلوگى. ەلباسى ن.نازارباەۆتىڭ قازاقستان حالقىنا جولداۋىن, قازاقستان رەسپۋبليكاسىنىڭ دەنساۋلىق ساقتاۋ سالاسىن دامىتۋدىڭ 2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسىن جانە «ماڭعىستاۋ وبلىسىن دامىتۋدىڭ 2011-2015 جىلدارعا ارنالعان باعدارلاماسىنىڭ» «دەنساۋلىق ساقتاۋ» تارماعىن ورىنداۋ ماقساتىندا قولعا الىنعان جوبانىڭ قۇرىلىسى 2012 جىلى باستالعان, ال جالپى قۇنى 4 703 877 090 تەڭگەنى قۇراعان. رەسپۋبليكالىق بيۋدجەت ەسەبىنەن بولىنگەن نىسان ۇستىمىزدەگى جىلدىڭ كوكتەمىندە پايدالانۋعا بەرىلدى. بۇگىنگى تاڭدا وندا 869 ادام – 138 دارىگەر, 370 مەيىربيكە, 238 وزگە قىزمەتكەر جانە 123 باسقا پەرسونال ەڭبەك ەتۋدە.
مەملەكەت باسشىسى جولداۋىندا سالاماتتى ءومىر سالتىنىڭ ورنىعۋى, مەديتسينانىڭ دامۋى قازاقستاندىقتاردىڭ ءومىر ءسۇرۋ ۇزاقتىعىن 80 جاسقا دەيىن ۇزارتاتىندىعىن جانە قازاقستان مەديتسينالىق ءتۋريزمنىڭ ەۋرازيالىق جەتەكشى ورتالىقتارىنىڭ بىرىنە اينالۋى ءتيىس ەكەندىگىن ايتقان بولاتىن. ايماق باسشىسى ا.ايدارباەۆتىڭ ايتۋىنشا, بۇل مىندەت-مەجەگە جەتۋ جولىندا جىل سايىن رەسپۋبليكالىق بيۋدجەتتەن ءبولىنگەن قارجى كولەمى ارتىپ كەلەدى. مىسالى, 2013 جىلى رەسپۋبليكالىق بيۋدجەتتەن 5 ملرد.-قا جۋىق قارجى ءبولىنىپ, 9 دارىگەرلىك امبۋلاتوريا, 2 ەمحانا حالىق يگىلىگىنە بەرىلگەن. ال, 2014 جىلى رەسپۋبليكالىق بيۋدجەتتەن بولىنگەن 9 ملرد.-تان استام قاراجات ەسەبىنەن جاڭاوزەن قالاسىندا پەرزەنتحانا, چەحيا رەسپۋبليكاسىنىڭ جوباسىمەن ەۋروپالىق ستاندارتقا ساي, جاڭا تەحنولوگيالارمەن جابدىقتالعان زاماناۋي ۇلگىدەگى ماڭعىستاۋ وبلىستىق اۋرۋحاناسىنىڭ ارنايى حيرۋرگيالىق بلوگى سالىندى.
جاڭا عيماراتتا زاماناۋي ۇلگىدەگى مەديتسينالىق تەحنولوگيانىڭ سوڭعى ۇلگىلەرى قولدانىلماق. حيرۋرگيالىق كەشەن ورنالاسقان ءبىرىنشى قاباتتا ەكى وتا زالى, اسحانا جانە قابىلداۋ ءبولىمى بولسا, ەكىنشى قاباتتا ەۋروپالىق ستاندارتتارعا ساي كەلەتىن وزىق ۇلگىدەگى زاماناۋي قۇرىلعىلارمەن جابدىقتالعان 8 وتا زالى بار. ءۇشىنشى قاباتتا ارقايسىسى 9 كەرەۋەتتى جانساقتاۋ ءبولىمى, جالپى جانە كارديوتا بولىمشەلەرى ورنالاسىپتى. قاجەت جاعدايدا بۇل بولىمشەلەردەگى ورىن سانىن كوبەيتۋ مۇمكىندىگى دە قاراستىرىلعان. وتا جاساۋ جانە جانساقتاۋ بولىمشەلەرىندە ەنەرگيانى ۇنەمدەۋ تەحنولوگيالارى قولدانىلعان, ولار جارىقتى شوعىرلاندىرۋ جانە ونى تەڭ دارەجەدە ءبولىپ تاراتۋ مۇمكىندىگىنە يە قۇرىلعىلارمەن جاراقتالعان. نىسان 8 ءتۇرلى حيرۋرگيالىق وتانى ءبىر مەزگىلدە جاساۋعا مۇمكىندىك بەرەدى ەكەن. ماماندار مۇندا ەلىمىزدىڭ باتىس ايماعى بويىنشا بالالارعا كارديوحيرۋرگيالىق قىزمەت كورسەتەتىن ايماقتىق ورتالىق بولادى دەگەندى ايتتى.
– ءبىزدىڭ الدىمىزدا يننوۆاتسيالىق تەحنولوگيالاردى ەنگىزۋ مىندەتى تۇر, بۇل ءۇشىن ايماقتاردىڭ الەۋەتىن ارتتىرۋىمىز قاجەت. وتاشىلار الدىندا نەيروحيرۋرگيا سالاسىندا يننوۆاتسيالىق تەحنولوگيالاردى ەنگىزۋ باعىتىندا دارىستەر وقىدىق. ەكونوميكالىق دامۋ جولىنداعى ماڭعىستاۋدا ميكروحيرۋرگيالىق قىزمەتتى كۇشەيتۋ كەرەك, مۇنداي تۇردەگى العاشقى وتانى جەرگىلىكتى وتاشىلارمەن بىرگە ءساتتى وتكىزدىك, – دەگەن «ا.سىزگانوۆ اتىنداعى ۇلتتىق عىلىمي حيرۋرگيا ورتالىعى» اق باس ديرەكتورى, مەديتسينا عىلىمدارىنىڭ دوكتورى, پروفەسسور ج.ارزىقۇلوۆ جاڭا بلوكتىڭ ءوز ەمدەلۋشىلەرىنە تولىق جاعداي جاساي الاتىن, اسىرەسە, ترانسپلانتاتسيا ماسەلەسىندە ساپالى قىزمەت كورسەتە الاتىن ورىن بولۋى قاجەتتىگىن ايتتى.
وسى كۇنى جاڭاوزەندە تۇرعىندار كوپتەن كۇتكەن جاڭا پەرزەنتحانا اشىلدى. قۇرىلىس جۇمىستارىنا رەسپۋبليكالىق قازىنادان 2 ملرد.-تان استام قارجى بولىنگەن جاڭا نىسان زاماناۋي تەحنيكامەن جابدىقتالعان. 130 مىڭنان استام تۇرعىنى بار مۇنايلى قالاعا, سونداي-اق, ونىڭ ماڭايىنداعى قىزىلساي, تەڭگە اۋىلدارى مەن راحات شاعىن اۋدانىنا 100 ورىندىق پەرزەنتحانا قىزمەت ەتپەك. ۇلت دەموگرافياسىنا قارقىندى ۇلەس قوسۋىمەن ەرەكشەلەنەتىن جاڭاوزەندە وتكەن جىلى دۇنيەگە 4045 ءسابي كەلسە, وسى جىلدىڭ 6 ايى ىشىندە 1984 نارەستە جارىق دۇنيە ەسىگىن اشقان. ال, ورتا ەسەپپەن مۇندا تاۋلىگىنە جاڭاوزەندىكتەر قاتارىنا 13 جاڭا تۇرعىن قوسىلادى ەكەن.
ءوز جۇمىسىن تامىز ايىنان باستايدى دەپ كۇتىلەتىن پەرزەنتحانادا كەلەشەكتە جاڭا قۇرىلعىنىڭ كومەگىمەن ءتۇرلى گينەكولوگيالىق وتالار جاسالماق. تاۋلىك سايىن كەلىپ جاتقان «جاڭا ادامداردى» قابىلداپ, قىزمەت كورسەتۋ ءۇشىن مۇندا قازىر 17 دارىگەر بار, جىل سوڭىنا دەيىن ولاردىڭ دا قاتارى جوعارى بىلىكتى بىرنەشە مامانمەن تولىعادى دەيدى سالا باسشىلارى.
جۇيرىك اتتىڭ باعى شاباندوزىنا بايلانىستى بولاتىنى سەكىلدى, جاڭا عيماراتتار مەن زاماناۋي جابدىقتاردى بىلىكتى قولدانا ءبىلۋ – دارىگەرلەردىڭ كاسىبي بىلىمىنە قاتىستى. سوندىقتان, نىساندار مەن جابدىقتاردىڭ عانا ەمەس, دارىگەرلەردىڭ دە ماقتاۋلى بولعانىن قالايدى تۇرعىندار.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
سۋرەتتەردى تۇسىرگەن
سەرىك مايەمەروۆ.