ءدىني اقپاراتتىق-ءتۇسىندىرۋ توبى ەلوردالىقتارمەن كەزدەستى

اقپارات جانە قوعامدىق دامۋ مينيسترلىگى ءدىن ىستەرى كوميتەتىنىڭ ارنايى جوباسى اياسىندا بيىلعى جىلدىڭ 24-28 ءساۋىر ارالىعىندا استانا قالاسىندا ءدىن ماسەلەلەرى جونىندەگى رەسپۋبليكالىق اقپاراتتىق-ءتۇسىندىرۋ توبىنىڭ (راتت) ماماندارى قاتىسۋىمەن ءدىني ەكسترەميزمنىڭ تارالۋىن الدىن الۋعا باعىتتالعان سەمينار جانە ارتۇرلى فورماتتاعى ءىس-شارالار ۇيىمداستىرۋ شەڭبەرىندە وڭىردىڭ تۇرعىندارىمەن بىرقاتار كەزدەسۋ وتكىزدى.

اتالعان كەزدەسۋلەرگە راتت مۇشەلەرىنەن (تەولوگتار, ءدىنتانۋشىلار, پسيحولوگتار) – ا.س.نۇرادينوۆ, م.ق. قايدار, ا. نۇراحمەت ۇلى, ي.ت.بەرداليەۆ قاتىستى.

راتت مۇشەلەرىنىڭ قاتىسۋىمەن №1, №8 بالالار-جاسوسپىرىمدەر سپورت مەكتەبى, جاقسىلىق ۇشكەمپىروۆ اتىنداعى جەكپە-جەك سارايى, «سارىارقا» ۆەلوترەك سپورت كەشەنىنىڭ سپورتشىلارى مەن جاتتىقتىرۋشىلارى, «استانا قالاسىنىڭ ءورت ءسوندىرۋ جانە اپاتتىق-قۇتقارۋ جۇمىستارى قىزمەتى» مم, «استانا قالاسىنىڭ توتەنشە جاعدايلار دەپارتامەنتى» مم قىزمەتكەرلەرى, سونىمەن قاتار, «مەرەكە بازارى», «Automart» ساۋدا ورتالىعىنىڭ ءوزىن-ءوزى جۇمىسپەن قامتۋشىلارى جانە ت.ب. مەكەمەلەردىڭ ەرىكتىلەرى, ساۋداگەرلەرى, اسكەري قىزمەتكەرلەرى اراسىندا سەمينارلار مەن كەزدەسۋلەر ءوتتى.

اتالعان ءىس-شارالاردا وڭىرلەردىڭ تۇرعىندارىنا قازاقستان حالقىنىڭ مادەنيەتى مەن رۋحاني مۇراسىنا, دەسترۋكتيۆتى جالعان ءدىني جانە راديكالدى يدەيالاردىڭ زياندىلىعىنا باعىتتالعان دىن سالاسىنداعى مەملەكەتتىك ساياساتتىڭ ءمانى تۋرالى اقپاراتتار بەرىلدى.

تىڭداۋشىلار تاراپىنان دا راتت مۇشەلەرىنە بىرقاتار سۇراق قويىلىپ, ساۋالدارعا تۇجىرىمدى جاۋاپتار الىندى.