پرەزيدەنت فرانتسيانىڭ سىرتقى ساۋدا, ەكونوميكالىق تارتىمدىلىق جانە شەتەلدەگى فرانتسۋز ازاماتتارىنىڭ ىستەرى جونىندەگى مينيستر-دەلەگاتى, قازاقستان-فرانتسيا ۇكىمەتارالىق كوميسسياسىنىڭ تەڭ توراعاسى وليۆە بەشتتى قابىلدادى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
مەملەكەت باسشىسى جوعارى لاۋازىمدى ديپلوماتقا ءىلتيپات بىلدىرە وتىرىپ, قازاق-فرانتسۋز قارىم-قاتىناستارىنىڭ دەڭگەيىنە جوعارى باعا بەرىپ, ونىڭ ەلىمىزگە العاشقى رەسمي ساپارى بارلىق سالاداعى ستراتەگيالىق سەرىكتەستىككە تىڭ سەرپىن بەرەتىنىنە سەنىمدى ەكەنىن ايتتى.«فرانتسيا – ەۋروپاداعى ەڭ باستى سەرىكتەسىمىز. ىنتىماقتاستىعىمىزدى ودان ءارى نىعايتۋعا مۇمكىندىگىمىز مول ەكەنىنە سەنىمدىمىن», دەدى قاسىم-جومارت توقاەۆ.كەزدەسۋدە قاسىم-جومارت توقاەۆتىڭ فرانتسياعا جاساعان ساپارىنىڭ قورىتىندىسى بويىنشا, سونىڭ ىشىندە ساۋدا-ەكونوميكالىق جانە ينۆەستيتسيالىق سالالاردا قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرى تالقىلاندى.مەملەكەت باسشىسى قازاقستان نارىعىنا, اسىرەسە مۇناي-گاز حيمياسى, جاسىل ەنەرگەتيكا, اۆياتسيا جانە وڭدەۋ ونەركاسىبى, كولىك جانە لوگيستيكا سالالارىنا فرانتسۋز بيزنەسىن كەڭىنەن تارتۋ ءۇشىن بارلىق قاجەتتى جاعدايدى جاساۋعا دايىن ەكەنىن ايتتى.وليۆە بەشت مەملەكەت باسشىسىنا قوناقجايلىق كورسەتكەنى ءۇشىن العىسىن ايتىپ, قازاقستان مەن فرانتسيا اراسىنداعى ىنتىماقتاستىقتىڭ قارقىندى دامۋىنا كوڭىلى تولاتىنىن جەتكىزدى.«بىلتىر قاراشا ايىندا پاريجگە جاساعان رەسمي ساپارىڭىز وتە ءساتتى بولدى جانە ەكىجاقتى قارىم-قاتىناستارعا ناقتى ساياسي سەرپىن بەردى. پرەزيدەنتىمىز سىزبەن اراداعى جاقسى قارىم-قاتىناستى ودان ءارى نىعايتۋدى ماڭىزدى دەپ سانايدى. بۇل بىزگە اسا ماڭىزدى حالىقارالىق ماسەلەلەر بويىنشا جان-جاقتى پىكىر الماسۋعا مۇمكىندىك بەرەدى. سوندىقتان پرەزيدەنتىمىز سەرىكتەستىگىمىزدى دامىتۋعا بارىنشا كۇش سالۋىمدى سۇرادى. قازاقستان – سەنىمدى سەرىكتەس, دوستاس مەملەكەت ءارى ورتالىق ازياداعى بىزبەن ستراتەگيالىق بايلانىس ورناتقان جالعىز ەل», دەدى مينيستر-دەلەگات.كەزدەسۋ بارىسىندا حالىقارالىق كۇن تارتىبىندەگى وزەكتى ماسەلەلەر دە قاراستىرىلدى.