وزبەكستاندا رەفەرەندۋم ءوتىپ جاتىر

وزبەكستاندا رەفەرەندۋمدا داۋىس بەرۋ ءۇشىن سايلاۋ ۋچاسكەلەرى اشىلدى. ۋچاسكەلەر جەرگىلىكتى ۋاقىت بويىنشا 08.00-دەن 20.00-گە دەيىن جۇمىس ىستەيدى.

زاڭ ءماتىنى جەرگىلىكتى باق-تا 15 ناۋرىزدا جاريالاندى. 

ورتالىق سايلاۋ كوميسسياسىنىڭ مالىمەتىنشە, داۋىس بەرۋ باستالعاننان بەرى ەشقانداي بۇزۋشىلىقتار تىركەلمەگەن.

«داۋىس بەرۋ ۇلتتىق زاڭناماعا جانە حالىقارالىق ستاندارتتارعا سايكەس وتەدى», دەدى كوميسسيا توراعاسى زاينيددين نيزامحودجاەۆ.

قولدانىستاعى كونستيتۋتسيا 1992 جىلى قابىلدانعان بولاتىن. وسى ۋاقىت ارالىعىندا اتالعان زاڭعا 15 رەت تۇزەتۋلەر ەنگىزىلدى. قۇقىقتىق اكتىنىڭ جاڭا رەداكتسياسىنا تاعى 27 باپ ەنگىزىلمەكشى. وسىلايشا باپتار سانى 128-دەن 155-كە دەيىن ارتادى. تۇزەتۋلەردەن سوڭ زاڭ 65 پايىزعا جاڭارتىلادى دەپ كۇتىلۋدە.

اتاپ ايتقاندا, رەسپۋبليكا تۇرعىندارىنا پرەزيدەنتتىڭ وكىلەتتىك مەرزىمىن بەس جىلدان جەتى جىلعا دەيىن ۇزارتۋ تۋرالى تارماقتى قابىلداۋ ۇسىنىلادى. سونىمەن قاتار كونستيتۋتسيالىق زاڭ جوباسى قازىرگى مەملەكەت باسشىسى شاۆكات ميرزيەەۆكە قاتارىنان ەكى مەرزىمنەن كەيىن بۇل قىزمەتكە تاعى ءبىر رەت سايلانۋعا مۇمكىندىك بەرەدى.

ەنگىزىلگەن باسقا وزگەرىستەردىڭ قاتارىندا سەناتورلار سانىن 100-دەن 65-كە دەيىن قىسقارتۋ, ءولىم جازاسىنا تىيىم سالۋ جانە ەل ازاماتىن شەت مەملەكەتكە بەرۋ تۋرالى تارماق بار. كونستيتۋتسياعا العاش رەت ازاماتتىق قوعام ينستيتۋتتارى جانە ولاردىڭ قىزمەتىنىڭ كەپىلدىكتەرى تۋرالى جەكە تاراۋ ەنگىزىلەدى. تۇزەتۋلەر سونىمەن قاتار پارلامەنتتىڭ تومەنگى پالاتاسىنىڭ مەملەكەتتىك بيۋدجەتتىڭ اتقارىلۋىن باقىلاۋ جانە ەسەپ پالاتاسىنىڭ ەسەبىن قاراۋ جونىندەگى وكىلەتتىكتەرىن بەكىتەدى.