وسى كۇندەرى فرانتسيادا ۇلكەن تەننيستەن ءوتىپ جاتقان Rolland Garros تۋرنيرىندە تۇڭعىش رەت وتاندىق تەننيس تاريحىندا قازاقستان قۇراماسىنىڭ مۇشەسى ياروسلاۆا شۆەدوۆا جۇپتىق كەزدەسۋدە جارتىلاي, جەكەلەگەن ماتچتاردا شيرەك فينالعا جولداما العان ەدى.
دۇيسەنبى كۇنى يا.شۆەدوۆا اۆستريالىق دجۋليان كنوۋلمەن جۇپتاسىپ ونەر كورسەتۋدە كارل بلەك (زيمبابۆە) پەن لەوناردو پاەستى ء(ۇندىستان) 6:3, 6:7, 10:7 ەسەبىمەن جەڭىپ, كەلەسى اينالىمعا شىقتى. ەندى شۆەدوۆا ارىپتەسىمەن بىرگە كريستوفەر كاسا (گەرمانيا) مەن ۆانيا كينگپەن (اقش) كەزدەسەدى. فينالعا بەرىلەتىن جولداما وسى ماتچتا شەشىلەدى.
قازاقستان تەننيسشىسى جەكەلەگەن كەزدەسۋلەردە دە ءساتتى ونەر كورسەتتى. تۋرنير باستالىسىمەن قارسىلاستارىنىڭ ءبارىن قينالماي ۇتىپ كەلە جاتقان شۆەدوۆا 1/8 فينالدا اۆستريالىق يارميلا گروتتى 6:3, 6:4 ەسەبىمەن جەڭىپ, شيرەك فينال جولداماسىن قالتاسىنا باسقان-تىن. مۇنىڭ الدىندا ول يتالياندىق سارا ەرراني, الەمنىڭ سەگىزىنشى راكەتكاسى پولياك اگنەشكا رادۆانسكانى, رەسەيلىك اليسا كلەيبانوۆانى جەڭگەنىن اتاپ وتكەنىمىز ءجون.
شۆەدوۆانىڭ كەشەگى قارسىلاسى – الەمنىڭ ءتورتىنشى راكەتكاسى سەرب ەلەنا يانكوۆيچ بولاتىن. بۇل ماتچ WTA تۇجىرىمى بويىنشا 36-ورىندا تۇرعان وتانداسىمىز ءۇشىن وڭاي بولعان جوق. اسا تارتىستى وتكەن جەكپە-جەكتە تاجىريبەسى باسىمداۋ سەرب قىزى 7:5 جانە 6:4 ەسەبىمەن جەڭىسكە جەتتى.