جۋىردا ەلوردادا «MINEX Kazakhstan-2023» XIII تاۋ-كەن گەولوگيالىق فورۋمى ءوتتى. بۇل – جەر قويناۋىن يگەرۋ مەن اسا ماڭىزدى پايدالى قازبالاردىڭ ءوندىرىسىن دامىتۋعا باعىتتالعان ورتالىق ازياداعى اۋقىمدى ءىس-شارا.
«ۇلتتىق دامۋدىڭ يگىلىگى ءۇشىن جەر قويناۋىن يگەرۋ» اياسىندا ۇيىمداستىرىلعان فورۋمنىڭ جۇمىسىنا يندۋستريا جانە ينفراقۇرىلىمدىق دامۋ ۆيتسە-ءمينيسترى يران شارحان, سىرتقى ىستەر ءمينيسترىنىڭ ورىنباسارى الماس ايداروۆ, يندۋستريا جانە ينفراقۇرىلىمدىق دامۋ مينيسترلىگى گەولوگيا كوميتەتىنىڭ توراعاسى ەران اقباروۆ, سونداي-اق الەمنىڭ 30 ەلىنەن كەلگەن 500-دەن استام ينۆەستور, ساراپشىلار مەن پايدالى قازبانىڭ وندىرىسىمەن اينالىساتىن كومپانيا وكىلدەرى قاتىستى.
ونىڭ بارىسىندا قاتىسۋشىلار قازاقستانداعى جانە ورتالىق ازياداعى تاۋ-كەن, سونداي-اق گەولوگيا سالاسىنداعى جەتىستىكتەر مەن وزەكتى ماسەلەلەردى ءارى جەر قويناۋىن يگەرۋ باعىتىندا قاجەتتى تەحنولوگيالاردى ەنگىزۋدىڭ جولدارىن تالقىلادى.
«پايدالى قازبالاردىڭ قورى جاعىنان ەلىمىز ۇزدىك مەملەكەتتەردىڭ قاتارىندا كەلەدى. 2017 جىلى جۇرگىزىلگەن قۇقىقتىق رەفورما ارقىلى گەولوگيالىق بارلاۋعا جەكە ينۆەستيتسيالاردى تارتۋعا جول اشىلدى. قابىلدانعان شارالاردىڭ ناتيجەسىندە 700-دەن استام وتاندىق يۋنيور كومپانيا قۇرىلىپ, سونداي-اق رەسپۋبليكاعا الەمدىك نارىقتىڭ ءىرى ويىنشىلارى تارتىلدى. قازىر بەلگىلەنگەن ۋچاسكەلەردە زەرتتەۋ جۇمىستارىن نىعايتىپ, گەولوگيالىق مالىمەت الۋدىڭ پەرسپەكتيۆالارىن ايقىنداۋ ءۇشىن مەملەكەتتىك بيۋدجەتتىڭ ەسەبىنەن جەر قويناۋىنا مەملەكەتتىك گەولوگيالىق زەرتتەۋ جۇرگىزىلىپ جاتىر», دەدى ي.شارحان.
بۇل رەتتە 26 مامىردا يندۋستريا جانە ينفراقۇرىلىمدىق دامۋ مينيسترلىگى يگەرىلمەي جاتقان كەن ورىندارىنا ينۆەستيتسيا تارتۋ ماقساتىندا قاتتى پايدالى قازبالار بويىنشا العاشقى ەلەكتروندى اۋكتسيون وتكىزۋدى كوزدەپ وتىرعانىن ەسكە سالا كەتەيىك. وندا جەر قويناۋىن پايدالانۋعا قۇقىق بەرەتىن 25 كەن ورنى ساۋداعا قويىلادى.
گەولوگيا كوميتەتىنىڭ توراعاسى ەرلان اقباروۆ 2027 جىلعا دەيىن بەلگىلەنگەن وتاندىق گەولوگيا سالاسىن دامىتۋ تۇجىرىمداماسىنىڭ ىسكە اسىرىلۋى جونىندە قىسقاشا ايتىپ بەردى.
«ەلىمىزدە گەولوگيالىق زەرتتەۋ مەن بارلاۋ جۇمىستارىن كۇشەيتۋ ءۇشىن جۇيەلى شارالاردى قابىلداۋعا تۋرا كەلدى. وسى باعىتتاعى وزەكتى ماسەلەلەردى شەشۋدىڭ تەتىكتەرى گەولوگيا سالاسىن دامىتۋدىڭ 2027 جىلعا دەيىنگى تۇجىرىمداماسىندا ايقىندالعان. ماڭىزدى قۇجاتتىڭ نەگىزگى ماقساتى – پايدالى قازبالاردى بارلاۋ ىسىنە ينۆەستيتسيا تارتۋ ءۇشىن قولايلى جاعداي جاساۋ», دەگەن كوميتەتتىڭ باسشىسى گەولوگيا سالاسىنداعى ينۆەستيتسيالىق جوبالاردى تالقىلاپ, تانىستىرۋعا دايىن ەكەنىن جەتكىزدى.
ۇيىمداستىرۋشىلاردىڭ ايتۋىنشا, بۇل فورۋمنىڭ سالالىق ساراپشىلار, رەتتەۋشى ورگاندار مەن جەر قويناۋىن پايدالانۋشىلار جانە ينۆەستورلاردىڭ ءوزارا تاجىريبە الماسۋلارىنا سەپتىگى مول. بۇل ورايدا ەلىمىزدىڭ تاۋ-كەن سەكتورى ۇلتتىق ەكونوميكانىڭ جۇيە قۇراۋشى سالاسى سانالاتىنىن ايتا كەتكەن ورىندى. قازىر ونەركاسىپتىڭ وسى سەگمەنتىندە 273 مىڭنان استام ادام جۇمىس ىستەپ ءجۇر.