استانا قالاسىنداعى «ميراس» حالىقارالىق مەكتەبىمەن «بولاشاق»باعدارلاماسى اياسىنداعى اقش ۋنيۆەرسيتەتتەرىنىڭ تۇلەكتەرى قاۋىمداستىعىنىڭ ۇيمداستىرۋىمەن قازاقستان حالىقتارىنىڭ بىرلىگى كۇنىنە وراي وقۋشىلار مەن اقش ديپلوماتيالىق ميسسياسىنىڭ قىزمەتكەرلەرى اراسىندا باسكەتبولدان دوستاستىق كەزدەسۋ ءوتتى, دەپ حابارلايدى Egemen.kz.
ويىننىڭ اشىلۋ سالتاناتىن مەكتەپ ديرەكتورى ەلەنا حاميتوۆا, اقش ديپلوماتيالىق ميسسياسىنىڭ وكىلى دجون وراك جانە «بولاشاق» حالىقارالىق باعدارلامالار ورتالىعىنىڭ باسقارما توراعاسى ولجاس ساكەنوۆ قۇتتىقتاۋ سوزدەرىمەن اشتى.
اقش ۋنيۆەرسيتەتتەرىنىڭ تۇلەكتەرى قاۋىمداستىعىنىڭ جەتەكشىسى رينات كەمەشوۆتىڭ ايتۋىنشا, ءىس-شارا ماقساتى - ءارتۇرلى ەتنوستاردى توپتاستىرۋ ارقىلى قازاقستاندىق ۇلتتىق بىرەگەيلىكتى قالىپتاستىرۋ, رۋحاني بىرلىك يدەيالارىن تاراتۋ, وقۋشىلاردى سپورتتىق ءىس-شارالارعا جانە باسقا دا مادەني-بۇقارالىق ءىس-شارالارعا تارتۋ ارقىلى حالىقتار دوستىعى مەن ۇلتارالىق كەلىسىمدى نىعايتۋ جانە ساقتاۋ.
تاريحتا بۇرىن سوڭدى بولماعان شارانىڭ يدەياسى «ميراس» مەكتەبىنىڭ جوعارعى سىنىپ وقۋشىسى ابدراحاننىڭ ۇسىنىسىمەن, مەكتەپ باسشىلىعىنىڭ قولداۋىمەن جۇزەگە اسقان. وقۋشىلاردىڭ ايتۋىنشا, مۇنداي شارالار كوشباسشىلىق جانە كوماندالىق جۇمىس سياقتى كوپتەگەن داعدىلاردى ۇيرەتىپ قانا قويماي, وزگە ەلدەردىڭ مادەنيەتى تۋرالى كوبىرەك بىلۋگە مۇمكىندىك بەرەدى.
ءبىر جارىم ساعاتقا ۇلاسقان سپورت مەرەكەسىندە «ميراس»باسكەتبول كومانداسى 75-70 ەسەبىمەن باسىم ءتۇستى.