قازاقستان سپورتشىلارى بوچچادان ەل چەمپيوناتىنا قىزۋ دايىندىقتى باستاپ كەتتى. بۇگىن استاناداعى پاراليمپيادالىق ورتالىقتا العاشقى العاشقى جاتتىعۋ جيىنى ءوتتى, دەپ حابارلايدى Egemen.kz.
پارلامەنت سەناتىنىڭ توراعاسى – قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ ورتالىققا ارنايى بارىپ, ەرەكشە قاجەتتىلىگى بار جاس سپورتشىلارعا قولداۋ كورسەتتى.
جاتتىقتىرۋشىلاردىڭ ايتۋىنشا, سوڭعى جىلدارى ەلىمىزدە بوچچا سپورت ءتۇرى قارقىندى دامىپ, سونىڭ ناتيجەسىندە سپورتشىلار ءۇشىن جاڭا مۇمكىندىكتەر اشىلىپ جاتىر. تاياۋدا قازاقستان بوچچا فەدەراتسياسى Boccia International Sports Federation – حالىقارالىق بوچچا فەدەراتسياسىنىڭ مۇشەسى بولدى. سوعان بايلانىستى 6 سپورتشىمىزدىڭ پولشادا وتەتىن حالىقارالىق چەللەندجەرگە قاتىسۋىنا ءوتىنىم بەرىلدى.
ودان بولەك, ۇلتتىق قۇرامامىزدىڭ 2023 جىلدىڭ قازان ايىندا قىتايدا وتەتىن ازيا پاراليمپيادا ويىندارىنا جانە 2024 جىلى پاريجدە جالاۋى جەلبىرەيتىن پاراليمپيادا ويىندارىنا قاتىسۋىنا ءوتىنىم بەرۋ كوزدەلىپ وتىر.
سونىمەن قاتار الداعى ماۋسىم ايىندا استانا قالاسىنداعى جاقسىلىق ۇشكەمپىروۆ اتىنداعى سپورت سارايىندا تىرەك-قيمىل اپپاراتى بۇزىلعان سپورتشىلار اراسىندا بوچچادان قازاقستان چەمپيوناتى وتەدى. وعان ەلىمىز بويىنشا 15 جانە ودان جوعارى جاستاعى 50-گە جۋىق سپورتشى قاتىسادى دەپ جوسپارلانىپ وتىر.
ايتا كەتەيىك, سەنات توراعاسى ماۋلەن اشىمباەۆ قازاقستان بوچچا فەدەراتسياسىنىڭ كەزەكتەن تىس كونفەرەنتسياسىندا فەدەراتسيا پرەزيدەنتى بولىپ سايلاندى. ول بىرنەشە جىل بويى ەلىمىزدە ينكليۋزيۆتى سپورت تۇرلەرىنىڭ دامۋىنا قولداۋ كورسەتىپ, مۇگەدەكتىگى بار بالالار مەن سپورتشىلار ءۇشىن مۇنداي قادامنىڭ ماڭىزى زور ەكەنىن ايتىپ كەلەدى.