مۇعالىمدەرگە وقۋشىلاردى تاربيەلەگەنى ءۇشىن جەكە ايلىق تولەنسىن - نارتاي ارالباي ۇلى

دەپۋتات بۇنداي جاعدايلارعا قاتىستى شارا قابىلداپ, الدىن الۋ كەرەك دەپ دابىل قاقتى.  بۇل ماسەلە تۋرالى مەملەكەت باسشىسى قاسىم-جومارت توقاەۆ تا ءجيى ايتىپ ءجۇر. ءاربىر ازاماتتىڭ قاۋىپسىز قوعامدا ءومىر ءسۇرۋى كەزەك كۇتتىرمەيتىن وزەكتى ماسەلە.

«بالالارعا قاتىستى جانتۇرشىگەرلىك قىلمىستار جيىلەپ كەتتى. مۇنداي وقيعالار مەكتەپتە, كوشەدە, ءتىپتى ۇيدە بولىپ جاتىر. سوراقى جاعدايلار وقۋشىلاردىڭ وزىنە قول جۇمساۋىنا سەبەپكەر بولىپ وتىر. ءتىپتى اتا-انالاردىڭ وزدەرى بالاسىنا قورلىق كورسەتىپ, ونىڭ ارتى قايعىلى جاعدايعا ۇلاسىپ جاتادى. وتباسىنداعى زورلىق-زومبىلىقتىڭ الدىن الۋ جۇمىسى ءالسىز. جاۋاپتى مەكەمەلەر مەن قۇقىق قورعاۋ ورگاندارىنىڭ قىزمەتى ويداعىداي ناتيجە بەرگەن جوق. تۇرمىستىق زورلىق-زومبىلىقتىڭ الدىن الۋ ساياساتىن قايتا قاراۋىمىز كەرەك دەدى. ەندەشە, بۇل ماسەلەنى دەرەۋ شەشەتىن كەز كەلدى. الىمجەتتىكتىڭ كوبەيۋىنىڭ ءبىر سەبەبىن ماماندار پاندەميا ۋاقىتىندا ونلاين وقىعان وقۋشىلاردىڭ كەيىن ورتاعا ەركىن بەيىمدەلىپ كەتە الماۋى. قازىر سونىڭ سالدارىن كورىپ وتىرمىز», دەيدى نارتاي ارالباي ۇلى. 

سونداي-اق جانتۇرشىگەر قىلمىستى جاسىرعاندارعا دا اۋىر جازا قاراستىرۋ ۇسىنىلدى.

«الىمجەتتىك فاكتىلەرىن بىلە تۇرا جاسىرىپ قالعان قىزمەتتەگى ازاماتتار دا جازاعا تارتىلۋى كەرەك. وعان قوسا بالالاردى قورلاپ جاتقان كەزدە اراشا ءتۇسۋدىڭ ورنىنا سول ارەكەتتەردى بەينەتاسپاعا ءتۇسىرىپ جاريالاعان ادامداردى دا جازالاۋ قاجەت. ايىپتى وقۋشىلاردىڭ اتا-انالارى دا ءتيىستى جازاسىن الۋى كەرەك», دەدى ول.

نارتاي ارالباي ۇلى مەكتەپتەگى ءتارتىپ پەن تاربيەگە ءمان بەرۋ كەرەك دەيدى. مۇعالىمدەر دە بالاعا تاربيە بەرۋگە جاۋاپتى ەكەنىن اتاپ ءوتتى. ءارى بالا تاربيەلەگەنى ءۇشىن جەكە شتات اشىلىپ, ايلىق تولەنۋىن سۇرادى.

«مەكتەپتەردە وقۋ مەن تاربيەنىڭ بىرتۇتاستىعىن قامتاماسىز ەتەتىن جۇيە قالىپتاسۋى ءتيىس. ءاربىر ءپاننىڭ تاربيەلىك فۋنكتسياسى, ءاربىر مۇعالىمنىڭ تاربيەلىك جاۋاپكەرشىلىگى بولۋى ءتيىس. قازىرگى جاعدايدا قازاقستان رەسپۋبليكاسى ۇكىمەتىنىڭ «ازاماتتىق قىزمەتشىلەرگە, مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە, قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» №1193 قاۋلىسىنىڭ 4-قوسىمشاسىنىڭ نەگىزىندە سىنىپ جەتەكشىلەرگە 1-4 سىنىپتار ءۇشىن 8800 تەڭگە (بازالىق لاۋازىمدىق جالاقىنىڭ 50 پايىزى), 5-11 سىنىپتار مەن كوللەدجدەر ءۇشىن 10600 تەڭگە (بازالىق لاۋازىمدىق جالاقىنىڭ 60 پايىزى) كولەمىندە قوسىمشا اقى بەلگىلەنگەن. مۇعالىمدەردىڭ ساباقتا جانە ساباقتان تىس ۋاقىتتا بالالاردىڭ تاربيەسىمەن جۇيەلى اينالىسۋى ءۇشىن كەيبىر مامانداندىرىلعان مەكتەپتەردەگىدەي ارنايى كۋراتور شتاتتىق بىرلىگىن بارلىق مەكتەپتەرگە ەنگىزىپ, ولاردىڭ لايىقتى ايلىق جالاقىسىن جانە ستاتۋسىن ايقىنداۋىڭىزدى سۇرايمىز», دەدى دەپۋتات.