جاستاردىڭ كاسىپكەرلىك باستاماسىنا قولداۋ كورسەتۋ ءۇشىن 40 ميلليارد تەڭگە ءبولىندى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنتتىڭ ايتۋىنشا, قازىر ەڭبەك نارىعىندا جاستاردىڭ ۇلەسى ارتىپ كەلەدى. ۇكىمەتكە جانە اكىمدەرگە 2030 جىلعا قاراي 3 ميلليون 300 مىڭ ادامدى جۇمىسقا تۇرعىزۋ تۋرالى تاپسىرما بەرىلدى. ونىڭ 2,2 ميلليونى جاستار بولۋعا ءتيىس. جاڭا جۇمىس ورىندارى ۋاقىتشا ەمەس, تۇراقتى بولعانى ءجون.
«ەلىمىزدە ايماقتاردىڭ جۇمىسپەن قامتۋ كارتالارى بەكىتىلگەن. سوعان سايكەس جىل سايىن شامامەن 950 مىڭ ادامعا جۇمىس تاۋىپ بەرۋ كوزدەلگەن. ول ءۇشىن بيۋدجەتتەن 130 ميلليارد تەڭگە ءبولىندى. وسى قارجىنىڭ ارقاسىندا, ياعني سۋبسيديا ارقىلى 150 مىڭ ادام جۇمىسقا ورنالاسادى. ونىڭ ءبارى – جاستار جانە الەۋمەتتىك تۇرعىدان وسال ساناتتاعى ازاماتتار», دەدى مەملەكەت باسشىسى.
سونداي-اق جاستاردىڭ كاسىپكەرلىك باستاماسىنا قولداۋ كورسەتۋ ءۇشىن 40 ميلليارد تەڭگە بولىنگەنى ايتىلدى. قاراجات ايماقتارعا بەرىلدى. قازىر بيزنەس سالاسىنداعى ۇزدىك يدەيالاردى تاڭداپ الۋ ءۇشىن كونكۋرستار باستالدى.
«حالىقتى, جاستاردى جۇمىسپەن قامتۋ – ۇكىمەت ءۇشىن اسا ماڭىزدى مىندەت. اكىمدەر بۇل جۇمىستىڭ ناتيجەلەرىن تۇراقتى تۇردە بايانداپ تۇرۋى كەرەك», دەدى پرەزيدەنت.