قازاقستاندا كوكتەمگى ەگىس جۇمىستارىن جۇرگىزۋ ءۇشىن شارۋالارعا 257 مىڭ توننا تىڭايتقىش جونەلتىلدى, ونىڭ 144 مىڭ تونناسى وتاندىق تىڭايتقىش ءوندىرۋشى كاسىپورىنداردىڭ ءونىمى.
فەرمەرلەردىڭ مينەرالدى تىڭايتقىشتارمەن قامتاماسىز ەتىلۋى جايلى اۋىل شارۋاشىلىعى ۆيتسە-ءمينيسترى ءابىلحايىر تامابەك باياندادى. ونىڭ ايتۋىنشا, قازىر قويمالاردا 88 مىڭ توننا قور بار. جالپى اعىمداعى ەگىس جۇمىستارىنا 704 مىڭ تونناعا جۋىق تىڭايتقىش پايدالانۋ جوسپارلانىپ وتىر, ونىڭ 63%-ى قازاقستاندىق وندىرىسكە تيەسىلى.
جەرگىلىكتى بيۋدجەتتەردە تىڭايتقىشتاردى سۋبسيديالاۋ باعدارلاماسىنا 31,3 ملرد تەڭگە قاراستىرىلعان. اۋىل شارۋاشىلىعى داقىلدارىن زيانكەستەر مەن ارامشوپتەردەن قورعاۋ ءۇشىن سۋبسيديالاۋ شەڭبەرىندە 32,6 ملرد تەڭگە بولىنگەنىن قوسا مالىمدەدى ۆيتسە-مينيستر.
سونداي-اق كەڭەستە وڭىرلەرگە ججم جونەلتۋ ماسەلەسى دە قارالدى. كوكتەمگى ەگىس ناۋقانىنا بولىنگەن جەڭىلدەتىلگەن ديزەل وتىنىنىڭ كولەمى ۇلعايتىلىپ, 419 مىڭ تونناعا جەتتى, بۇل وتكەن جىلعى دەڭگەيمەن سالىستىرعاندا 19 مىڭ تونناعا ارتىق. وپەراتورلاردىڭ شىعىستارىن ەسكەرە وتىرىپ, رەسپۋبليكا بويىنشا اۋىل شارۋاشىلىعى تاۋارىن وندىرۋشىلەر ءۇشىن ديزەل وتىنىنىڭ ورتاشا قۇنى ليترىنە 204 تەڭگەنى قۇرايدى, بۇل ديزەل وتىنىنىڭ شەكتى باعاسىنىڭ وسۋىنە سايكەس, نارىقتىق قۇنىنان 30%-عا ارزان. وڭىرلەر بەلگىلەنگەن جانارماي كولەمىنىڭ 47%-ىن الدى.
ەگىس ناۋقانىن قارجىلاندىرۋعا كەلەتىن بولساق, «كەڭ دالا» باعدارلاماسى بويىنشا 140 ملرد تەڭگە قاراستىرىلعان, وعان كەمىندە 3200 شارۋانى قامتۋ, شامامەن 2 ملن گا القاپتا ەگىن ەگۋ مەن جيناۋدى قامتاماسىز ەتۋ جوسپارلانعان. قازىرگى ۋاقىتتا 150,8 ملرد تەڭگەگە 4169 ءوتىنىم كەلىپ ءتۇستى. ءونىمدى فورۆاردتىق ساتىپ الۋ باعدارلاماسى جالعاسادى, وعان 20 ملرد تەڭگە قاراستىرىلعان. ازىق-ت ۇلىك كورپوراتسياسى كوكتەمگى ەگىس جۇمىستارىن ىسكە اسىرۋ جانە كەيىننەن قارجىلاندىرۋ ءۇشىن ءىرى اۋىل شارۋاشىلىعى تاۋارىن وندىرۋشىلەرگە تاۋارلىق نەسيە بەرۋگە تاعى 35 ملرد تەڭگە بولەدى.
ايتا كەتەيىك, كوكتەمگى ەگىس جۇمىستارى باستالعاننان بەرى قازاقستاننىڭ وڭتۇستىك وڭىرلەرىندە ديقاندار 832,9 مىڭ گا جەرگە ەگىن ەكتى, ولاردىڭ باسىم بولىگى ءداندى, جەمشوپ جانە مايلى داقىلدار. جالپى بۇكىل ەل بويىنشا 23,4 ملن گا جەرگە ەگىن ەگۋ جوسپارلانىپ وتىر. بيىل ءداندى, جەمشوپ, كوكونىس جانە باقشا داقىلدارىنىڭ, سونداي-اق قانت قىزىلشاسىنىڭ ەگىستىك القاپتارى ۇلعايادى. جاپپاي ەگۋ ناۋقانى مامىردىڭ ەكىنشى ونكۇندىگىندە باستالادى.
بارلىق تۇيتكىلدى ماسەلەلەردى جەدەل شەشۋ ءۇشىن اۋىل شارۋاشىلىعى مينيسترلىگى جانىندا جەدەل شتاب جۇمىس ىستەيدى, وعان بارلىق مۇددەلى مەملەكەتتىك ورگاندار مەن ۇيىمدار, سونداي-اق وبلىستار مەن قالالار اكىمدەرىنىڭ ورىنباسارلارى تارتىلعان.