«تۋر دە فرانس» كوپكۇندىگىنىڭ ەكىنشى كەزەڭدىك
جارىسىندا «استانا» ۆەلوكلۋبىنىڭ كاپيتانى ۆينچەنتسو نيبالي جەڭىمپاز اتاندى.
جارىستىڭ ەكىنشى كەزەڭى 201 شاقىرىمعا سوزىلدى.
بۇل سىندا «استانانىڭ» ۆەلوشاباندوزدارى قارسىلاستارىنىڭ نازارىن جارىس بويى وزدەرىنە اۋدارىپ وتىردى. سونىڭ ىشىندە بەسەۋى كومبەگە دەيىن ءنيباليدىڭ جانىندا بولىپ, باستى باسەكەلەستەرىن جاڭىلدىرىپ, كوماندا كاپيتانىنا مارەگە ءبىرىنشى كەلۋگە جاعداي جاسادى.
ال سوڭعى ءتورت شاقىرىمدا دات ۆەلوسپورتشىسى ياكوب فۋلسانگ «استانانىڭ» قارسىلاستارىنىڭ نازارىن وزىنە اۋدارىپ, ولاردى مۇلدەم شاتاستىرىپ جىبەردى. وسى كەزدە ول قايتا-قايتا شابۋىلداپ, باستى باسەكەلەستەرىن ءوزىن اڭدۋعا ماجبۇرلەدى. ال نيبالي بولسا, كومبەگە ەكى شاقىرىم قالعاندا قارسىلاستارىنىڭ اراسىنان سىتىلىپ شىعىپ, مارە سىزىعىن ءبىرىنشى بولىپ كەستى.
ءسويتىپ, ول ەكىنشى كەزەڭدە جەڭىسكە جەتىپ قانا قويماي, جالپى ەسەپتە دە ءبىرىنشى ورىنعا شىعىپ كوش باستادى. وسى جەڭىستەن كەيىن نيبالي كوشباسشىلىق سارى جەيدەنى كيدى. سلوۆاكيا ۆەلوشاباندوزى پەتەر ساگان ودان ەكى سەكۋند قانا قالىپ, ەكى كەزەڭ بويىنشا ەكىنشى ورىنعا ورنىقتى.
بيىل «تۋر دە فرانس» ۆەلوجارىسى 101-رەت ءوتىپ جاتىر.
داستان كەنجالين,
«ەگەمەن قازاقستان».