كۇي اڭىزى قىزىق قوي. كۇيدى تىڭداعانىمىز بولماسا, شىعۋ تاريحىن اسا بىلە بەرمەيمىز.
باياعىدا, مىنا قاراكەسەكتە ءبىر كۇشىكباي دەگەن باي بولىپتى. زامانىندا, اتىمتاي جومارت سياقتى قولىنىڭ اشىقتىعىمەن, مىرزالىعىمەن اتى شىققان ادام ەكەن, – سابىت ۇيىعان اياعىن سوزىپ ءسال وتىردى, — تالاي ادامدى تىزگىنگە جەتكىزىپتى. تالايدىڭ باسىنا ءۇي تىگىپ, الدىنا مال, قازانىنا اس سالىپ بەرىپتى. سويتكەن كۇشىكبايدىڭ جالعىز ۇلى ولەدى عوي. سوندا كۇشىكباي نالىعان دەيدى. بۇل قۇدايعا نە جازدىم, قارىپ پەن قاسەرگە مەندەي شاراپات قىلعان ادام بار ما ەدى. قاي قىلىعىمنان تاپتىم. قوي, قۇدايدا ادىلەت جوق ەكەن. ودان دا ولەيىن دەپتى. اۋىلدىڭ ادامدارى ۋ ءىشىپ ولمەسىن دەپ, ۋدىڭ ءبارىن تىعىپ تاستاپتى. باۋىزدالىپ ولمەك بولىپتى. تۋىستارى تەمىر بىتكەننىڭ ءبارىن تىعىپ تاستاپتى. ەندى اشتان ولەم دەپ تەرىس قاراپ جاتتى دەيدى. جانىنا قازى-قارتا, جال-جايا قويادى. بىرىنە قاراماپتى.
اقىرىندا باي-ەكەڭ سارعايىپ, شىنىندا دا ءولىم اۋزىنا بارعان دەيدى. ەندى نە ىستەيمىز دەپ جۇرت ساسادى. اقىرىندا ءجون بىلەتىن بىرەۋ, باي-ەكەڭدى ءبىر سەيىلتسە, تاتتىمبەت سەيىلتەدى دەيدى. سونىمەن تاتتىمبەتتى قوس اتتاپ الدىرادى. تاتتىمبەت, قىلشىلداعان جاس كەزى ەكەن, تابالدىرىققا وتىرا سالا دومبىراسىن شەرتكەن دەيدى. ەكى كۇن وتىرىپ قانشا كۇي تولعاعان. جيىنى الپىس ەكى كۇي بولىپتى. اقىرىندا كۇشىكباي, كوزىنىڭ جاسى بۇلاقتىڭ سۋىنداي بولىپ اعىپ, قايعى-شەرى تارقاپ ورنىنان تۇرىپتى.
بۇل ءوزى ۇزاق كۇي. الدەنەشە تاراۋ. «تابالدىرىق قوسباسار», «زار قوسباسار», «جايسارى قوسباسار»بولىپ سالالانىپ كەتە بەرەدى. ارقادا وسى الپىس ەكى كۇيدى بۇزباي تولىق تارتقان شەبەرلەر بولىپتى. ال مىنا ەستىگەندەرىڭ, سول كۇيدىڭ سوڭعىسى — «قىرمىزى قوسباسار», — سابىت اياعىن جيىپ قايتادان مالداس قۇرا وتىردى.
تالاسبەك اسەمقۇلوۆ ء«تالتۇس» رومانىنان
دەرەككوز – كۇي اڭىزى