تۋنيس پەن سيريا ەكى ەل اراسىنداعى ديپلوماتيالىق قارىم-قاتىناستى قالپىنا كەلتىرۋ ءۇشىن ەلشىلىكتەرىن قايتا اشۋ تۋرالى شەشىم قابىلدادى. بۇل تۋرالى سارسەنبى كۇنى تۋنيس سىرتقى ىستەر مينيسترلىگى حابارلادى, دەپ جازادى Egemen.kz.
«پرەزيدەنت كايس سايدتىڭ سيرياعا تۋنيس ەلشىسىن تاعايىنداۋ تۋرالى باستاماسىنا جاۋاپ رەتىندە سيريالىق تاراپ بۇل تاعايىنداۋدى ماقۇلدادى», دەلىنگەن ءسىم حابارلاماسىندا.
سيريا جاعى دا تۋنيستە ءوز ەلشىلىگىن اشۋعا جانە ەلشى تاعايىنداۋعا شەشىم قابىلدادى.
ەكى ەلدىڭ سىرتقى ىستەر مينيسترلەرى تۋنيس پەن سيريا اراسىنداعى قالىپتى قارىم-قاتىناستى قالپىنا كەلتىرۋ ءۇشىن كونسۋلتاتسيالار مەن ارەكەتتەردى ۇيلەستىرۋدى جالعاستىرادى.
مالىمدەمەگە سايكەس, تاراپتار تۋنيس پەن سيريانى بىرىكتىرەتىن باۋىرلاستىق بايلانىستاردى نىعايتۋعا, سونداي-اق ەكى ەل اراسىنداعى ىنتىماقتاستىق قۇندىلىقتارىن قولداۋعا تىرىسادى.
تۋنيس سيريادا ازاماتتىق سوعىس باستالعاننان كەيىن 2012 جىلدىڭ اقپانىندا سيريامەن ديپلوماتيالىق قارىم-قاتىناسىن ۇزگەن ەدى.