مادەنيەت جانە سپورت ءمينيسترى اسحات ورالوۆ ءۇندىستاندا وتكەن الەم چەمپيوناتىندا جۇلدە العان قازاقستاندىق بوكسشىلارمەن كەزدەستى, دەپ حابارلايدى Egemen.kz.
ولاردىڭ اراسىندا كۇمىس مەدال يەگەرلەرى ءلاززات كۇنگەيباەۆا مەن كارينا يبراگيموۆا, سونداي-اق قولا جۇلدەگەرلەر – الۋا بالقىبەكوۆا, نادەجدا ريابەتس, ۆالەنتينا حالزوۆا جانە فاريزا شولتاي بار.
سپورتشىلاردىڭ الەمدىك بىرىنشىلىكتە لايىقتى ونەر كورسەتۋىمەن قۇتتىقتاپ, بوكستان ايەلدەر قۇراماسىنىڭ باس باپكەرى شاميل سافيۋللينگە العىس حات تابىس ەتتى.
كەزدەسۋ بارىسىندا پاريج وليمپياداسىنا دايىندىق پەن وليمپيادالىق ليتسەنزيا الۋ ماسەلەسى تالقىلاندى.
«بوكس – قازاقستانداعى باستى جانە ەڭ تانىمال سپورت تۇرلەرىنىڭ ءبىرى. ەلىمىز الەمگە كوپتەگەن چەمپيونداردى سىيلاعاندىقتان, قازاقستاندىقتار ءاربىر تۋرنيردەن التىن مەدال كۇتىپ, بوكسشىلارىمىزدىڭ ونەرىن ءجىتى قاداعالايدى. ايەلدەر قۇراماسىنا الداعى جارىستاردا جارقىن جەڭىستەر مەن تابىس تىلەيمىن», دەپ جازدى مينيستر ا.ورالوۆ.