ەگەمەن ەلدىڭ ۇلانىمىن
توبەمىزدە كوك تۋىمىزدىڭ جەلبىرەپ, ەلىمىزدىڭ ەركىندىككە اياق باسقانىنا 30 جىلدان استى. بۇگىنگى بۋىن تولىقتاي بىلە بەرمەسە دە, ۇلكەندەردىڭ ەسىندەگى تاۋەلدى زامان ارتتا قالدى. ال ازاتتىق جولىندا قانشاما ارىستارىمىز قازا تاپتى. كەڭ-بايتاق وتانىمىزدىڭ باسىنان كەشپەگەنى جوق. الايدا ەل بولاشاعى ءۇشىن ءومىرىن قيعان بابالارىمىزدىڭ ارقاسىندا بۇگىندە ءبىز – تاۋەلسىز ەلدىڭ ۇرپاعىمىز.
ەلىمىزدىڭ بولاشاعى جاس بۋىننىڭ, ياعني ءبىزدىڭ قولىمىزدا. وسى جەتىستىكتەرىمىزدى ودان ءارى جالعاستىرىپ, مەملەكەتىمىزدى دامىعان ەلدەر قاتارىنا قوسۋ ءۇشىن بار كۇشىمىزدى سالۋىمىز قاجەت. قازىرگى تاڭدا پرەزيدەنت قاسىم-جومارت توقاەۆ جاستارعا بار جاعدايدى جاساپ, ولارعا ۇلكەن قولداۋ كورسەتىپ كەلەدى. جاستارعا جول اشار ءتۇرلى باسقوسۋلار, وليمپيادالار مەن باسقا دا تانىمدىق ءىس-شارالار ۇيىمداستىرىلىپ ءجۇر. وسىنىڭ ارقاسىندا ەل جاستارى جان-جاقتى دامىپ, ەلىمىزدىڭ كوركەيۋىنە ۇلەس قوسادى.
دەگەنمەن وزەكتىلىگىن جويماي كەلە جاتقان ماسەلەلەر دە بار ەكەنىن جوققا شىعارۋعا بولمايدى. سولاردىڭ ءبىرى – مەملەكەتتىك ءتىل ماسەلەسى. وكىنىشكە قاراي, كوپ وتانداسىمىز ءوز انا تىلىنە شورقاق. انا ءتىلىمىزدى ءوز تۇعىرىنا قوندىرۋ ءۇشىن قاتال زاڭ كەرەك دەپ سانايمىن. مەملەكەتتىك ءتىلدى ءبىلۋ زاڭمەن مىندەتتەلسە, سول زاڭ اياسىندا ءتىلىمىز بىرتە-بىرتە ءوز مارتەبەسىنە ساي ىلگەرىلەي بەرەر ەدى. سەبەبى ورتاق ءتىلدىڭ ارقاسىندا حالىقتىڭ بىرلىگى نىعايىپ, رۋحى كوتەرىلەدى. تاۋەلسىز ەلىمىزدىڭ كوركەيۋىنە بار كۇش-جىگەرىن جۇمسايدى. سوندىقتان ۇلتتىق رۋحىمىزدى كوتەرۋدى ەڭ الدىمەن ءتىلىمىزدىڭ دامۋىنان باستاعانىمىز ءجون. ءتىلدىڭ دامۋىنا ءار قازاقستاندىق ءوز ۇلەسىن قوسۋى كەرەك. ءتىل ارقىلى ۇلت بولاشاعى كەمەلدەنە تۇسەدى.
مەن دە تاۋەلسىز ەلىمىزدىڭ بولاشاعى جارقىن بولۋى جولىندا تەر توگە ەڭبەكتەنەتىن بولامىن. بابالارىمىزدىڭ اسقان جانكەشتىلىگىنىڭ ارقاسىندا قول جەتكىزگەن تاۋەلسىزدىگىمىزدى ساقتاپ, ەگەمەن ەلىمنىڭ تەك العا باسۋىنا, الەمدىك دەڭگەيدە دامۋىنا ايانباي قىزمەت ەتەمىن.
شۇعىلا جارىلقاسىن,
رايىمبەك باتىر اتىنداعى №50 «قازعارىش» مەكتەپ-ليتسەيىنىڭ 11-سىنىپ وقۋشىسى
استانا
قوعامداعى مۇعالىمنىڭ ءرولى
«پەداگوگ مارتەبەسى تۋرالى» زاڭ قابىلدانعان سوڭ, قوعامداعى ۇستاز بەدەلى ارتىپ, ابىرويلى ماماندىقتىڭ قادىر-قاسيەتى اشىلا تۇسكەندەي. ءبىلىم بەرۋدەگى پەداگوگتەردى دايارلايتىن وقۋ ورىندارىنىڭ سانى قىسقاردى. بۇل, ءبىر سوزبەن ايتقاندا, پەداگوگتەردى دايارلاۋ ساپاسىنا ماڭىز بەرىلىپ, «بوي جارىستىراتىن ەمەس, وي جارىستىراتىن زاماننىڭ كەلگەنىن» دالەلدەيدى. وسى تۇستا الاش تۇلعاسى, پەداگوگ-پسيحولوگ جۇسىپبەك ايماۋىت ۇلىنىڭ: «وقىتۋ جىگەرلى بولسىن, جىگەرسىز جاسىق جۇمىستان بالا وقىتقاندا بەرەكە شىقپايدى. اسىرەسە بالا وقىتۋ جۇمىسى قىزۋ, شيراق, جىگەرلى بولعانى دۇرىس. جىگەرلى بولۋ – مۇعالىمنىڭ سۇيەگىنە بىتكەن سيپاتى», دەپ ايتقانى ويعا ورالادى.
پرەزيدەنت قاسىم-جومارت توقاەۆ حالىققا جولداۋىندا ساپالى ءارى قولجەتىمدى بىلىمگە ۇمتىلۋ كەرەك ەكەنىن ەسكە سالا كەلىپ: «...مۇعالىمدەر شاكىرتىنىڭ بويىنا جاڭا ءبىلىم سىڭىرە الاتىنداي ناعىز اعارتۋشى بولۋعا ءتيىس», دەپ اتاپ كورسەتتى. بۇل تۇجىرىم پەداگوگتەر ءۇشىن ۇرپاق ساۋاتىن ارتتىرۋدا باستى قاعيدات بولاتىنى ءسوزسىز. جالپى, پەداگوگتىڭ ءرولى وقۋشى مەكتەپتەن جىراققا كەتسە دە جالعاسا بەرەدى. «ۇرپاق بولاشاعى – ۇستازدان» دەپ تەگىن ايتىلماعان.
بۇگىندە پەداگوگ مارتەبەسىن كوتەرۋ اياسىندا ۇستازدارعا ءبىلىمىن جەتىلدىرۋگە مۇمكىندىك كوپ. عىلىممەن اينالىساتىن ماگيستر ۇستازداردىڭ, جاس مامانداردىڭ مەكتەپپەن تىعىز بايلانىستا وقۋشىمەن جۇمىس ىستەۋىنىڭ ءوزى بولاشاقتا ءبىلىمىن ومىرىنە پايدالانا الاتىن ساۋاتتى ۇرپاق قالىپتاسۋىنا نەگىز بولارى انىق. وسى ورايدا ەلىمىزدىڭ بولاشاعى – بۇگىنگى جاس ۇرپاقتى ءبىلىم نارىمەن سۋسىنداتىپ, ادامگەرشىلىك پەن ار-وجداندى بيىك قوياتىن ۇستازداردىڭ ماقساتى ايقىن, تالابى بيىك ەكەنىن ايتا كەتكەننىڭ ارتىقتىعى جوق. دارىندى تانىپ, تالاپتىعا تالپىنىس بەرىپ, العا ۇمتىلدىراتىن تۇلعا قالىپتاستىرۋ ۇستازداردىڭ ۇستازىنىڭ عانا قولىنان كەلسە كەرەك. ەندەشە, سانالى ۇرپاق تاربيەلەۋدەگى ساباقتى ءىس-ارەكەتىمىزدى رۋحاني قۇندىلىقتارمەن ۇشتاستىرا بىلەيىك.
بولات پەستيفال,
قازاق ءتىلى مەن ادەبيەتى پانىنىڭ مۇعالىمى
اقمولا وبلىسى,
قوياندى اۋىلى
دانا قىزدىڭ «دارا جولىن» ساعىندىق
تاۋەلسىز ءارى جاۋاپكەرشىلىگى جوعارى بۇقارالىق اقپارات قۇرالدارى بولماسا, قوعامدى ودان ءارى دەموكراتيالاندىرۋ مۇمكىن ەمەس. پرەزيدەنت وتكەن جىلى: «قازاق جۋرناليستيكاسىنىڭ دەڭگەيى جوعارى ەكەنى كۇمانسىز. ءبىز اقپارات ەركىندىگىن بارىنشا قامتاماسىز ەتىپ جاتىرمىز. بىراق ەركىندىك ويىڭا نە كەلسە, سونى ايتۋ ەمەس. ءاربىر جۋرناليست ەڭ الدىمەن مەملەكەتشىل ازامات بولۋ كەرەك», دەگەن بولاتىن. بۇل ءسوز قولىنا قالام ۇستاعان قاۋىمدى ەرەكشە جىگەرلەندىرىپ, جاڭا جاعدايعا بەيىمدەلە تۇسۋىنە يگى ىقپال ەتتى. تاياۋدا قوعامعا جالپى تالقىلاۋعا ۇسىنىلعان «ماسس-مەديا تۋرالى» زاڭ جوباسى دا ء«تورتىنشى بيلىك يەلەرى» اتانعان بۇقارالىق اقپارات قۇرالدارى قىزمەتكەرلەرىنە زور مىندەت پەن جاۋاپكەرشىلىك جۇكتەپ وتىر.
وسىنداي بيىك تالاپتىڭ ۇدەسىنەن شىعىپ جۇرگەن تەلەجۋرناليستەردىڭ ءبىرى – دانا نۇرجىگىت. كەزىندە پارلامەنت سەناتىنىڭ دەپۋتاتى بولىپ سايلانىپ, تالاي ەلدىك ماسەلەلەردى شەشۋگە اتسالىسقان ول مەملەكەتشىل قىزمەتشى رەتىندە دە ءوزىن كورسەتە ءبىلدى. ءبىز كەزىندە ونىڭ اپتا سايىن تەلەديداردان بەرىلەتىن «دارا جول» تانىمدىق باعدارلاماسىن اسىعا كۇتەتىن ەدىك. ەندى سونى ساعىنىپ ءجۇرمىز. پارلامەنتتەن سۇيىكتى ماماندىعىنا قايتىپ ورالعان دانانىڭ الداعى كەزدە دە كورەرمەندەردىڭ كوزايىمىنا اينالار حابارلاردى كوگىلدىر ەكرانعا كوپتەپ شىعارارىنا بەك سەنىمدىمىز.
سونداي-اق قازىرگى تاڭدا قالىڭ كوپشىلىكتىڭ قالاۋىن يەلەنىپ, پارلامەنتتە جۇرگەن نۇرتورە ءجۇسىپ, ايگۇل قاپباروۆا سەكىلدى ماسس-مەديا وكىلدەرى دە حالىقتىڭ مۇڭ-مۇقتاجى مەن تالاپ-تىلەگىن بيلىك ورىندارىنا جەتكىزىپ, شىندىقتى وبەكتيۆتى تۇردە جاريالاپ وتىرۋعا اتسالىسىپ ءجۇر. وسىلايشا, ولار مەملەكەتتىك بيلىك پەن ازاماتتىق قوعام اراسىنداعى التىن كوپىر رەتىندەگى مىندەتىن ابىرويمەن اتقارىپ ءجۇر.
كارىباي امزە ۇلى,
سوزاق اۋدانىنىڭ قۇرمەتتى ازاماتى
تۇركىستان وبلىسى