11 ساۋىردە نارازىلىق بىلدىرۋشىلەر جاڭاوزەن قالاسىنىڭ اكىمدىگى الدىنا جينالدى. وسىعان بايلانىستى, جاڭاوزەن قالاسىنىڭ اكىمى ايبەك قوسۋاقوۆ جينالعاندارعا بەينەۇندەۋ جولدادى, دەپ حابارلايدى Egemen.kz وبلىس اكىمدىگىنە سىلتەمە جاساپ.
«قۇرمەتتى جاڭاوزەن قالاسىنىڭ تۇرعىندارى, قادىرلى جەرلەستەر!
بۇگىن بارلىعىڭىز الەۋمەتتىك جەلىدەن جەرلەستەرىمىزدىڭ استانا قالاسىندا نارازىلىق اكتسياسىن ۇيىمداستىرىپ, پوليتسيا بولىمىنە جەتكىزىلگەنى تۋرالى اقپاراتتى كورىپ وتىرسىزدار.
قۇقىق قورعاۋ ورگاندارى وكىلدەرىنىڭ ايتۋىنشا, جەرلەستەرىمىزدىڭ جاعدايى جاقسى. ولارعا قولدانىستاعى زاڭناما شەڭبەرىندە اكىمشىلىك شارالار قابىلداناتىن بولادى.
اكىمدىك تۇراقتى نەگىزدە قالا اۋماعىندا جاڭا جۇمىس ورىندارىن قۇرۋ, جۇمىسسىز ازاماتتاردى تۇراقتى جۇمىسپەن قامتاماسىز ەتۋ بويىنشا شارالار قابىلداۋدا», دەدى قالا اكىمى.
ونىڭ ايتۋىنشا, استانادا نارازىلىق بىلدىرگەن ازاماتتارمەن الدىن الا كەلىسسوزدەر جۇرگىزىلدى.
«بۇرىن تەندەردەن جەڭىلگەن كومپانيادا جۇمىس ىستەگەندەرگە ەڭبەك جاعدايلارى مەن جالاقىلارىن ساقتاي وتىرىپ, تەندەردى جەڭىپ العان كومپانياعا اۋىسۋ ۇسىنىلدى. بىراق ۇسىنىس قابىلدانبادى.
قاسيەتتى رامازان ايىندا مەن بارشاڭىزدى سابىرلىققا شاقىرامىن! ماسەلەنىڭ ءمانىن بىلمەي, ەموتسيالارعا بەرىلمەۋلەرىڭىزدى جانە ارانداتۋشىلاردىڭ سوزىنە ەرىپ, قانداي دا ءبىر زاڭسىز ارەكەتتەرگە بارماۋلارىڭىزدى سۇرايمىن!», دەپ قوستى ايبەك قوسۋاقوۆ.