الەۋمەتتىك ارىپتەستىك اياسىندا پاۆلودار وبلىسىندا ەكى مەكتەپ سالۋ كوزدەلىپ وتىر. بۇعان قوسا وڭىردەگى 10 كوللەدجدىڭ ماتەريالدىق-تەحنيكالىق بازاسى نىعايىپ, مىڭداعان پەداگوگ بىلىكتىلىكتەرىن ارتتىرا الادى. ال 8 كىتاپحانا عيماراتى تولىقتاي جاڭارىپ, كەلۋشىلەردى تارتا تۇسەدى.
بۇل مۇمكىندىكتەردىڭ بارلىعى ERG كومپانياسى مەن پاۆلودار وبلىسى اكىمدىگىنىڭ جاڭادان قول قويعان ءوزارا تۇسىنىستىك جانە ارىپتەستىك تۋرالى مەموراندۋمدا كورىنىس تاپتى. قۇجاتتا ەۋرازيالىق توپ ءتۇرلى باعىتتاعى الەۋمەتتىك جوبالارعا 3 ملرد تەڭگە باعىتتايتىنى جازىلعان. يگىلىك پاۆلودار وبلىسىنىڭ 130 مىڭ تۇرعىنىن قامتيدى.
اتاپ وتەرلىگى, بۇل جوبالار ERG كاسىپورىندارى ورنالاسقان وڭىرلەردىڭ تۇرعىندارى اراسىندا جىل سايىن جۇرگىزىلەتىن ساۋالداما قورىتىندىسى نەگىزىندە, الەۋمەتتىك باعىتتاردى سارالاۋ ارقىلى ىرىكتەلگەن. بيىل مەموراندۋم اياسىندا ءبىلىم بەرۋ سالاسىن دامىتۋ مەن ترانسفورماتسيالاۋ, قالا ينفراقۇرىلىمىن اباتتاندىرۋ, مۋنيتسيپالدىق نىساندار مەن مەديتسينالىق مەكەمەلەردى قايتا جاڭعىرتۋ كوزدەلىپتى. بۇل ماقساتتارعا قارجى ءبولۋدى كومپانيا ۇزاق جىلداردان بەرى جالعاستىرىپ كەلەدى.
– ءبىزدىڭ كاسىپورىندارىمىز ورنالاسقان قالالاردىڭ الەۋمەتتىك-ەكونوميكالىق ءال-اۋقاتىن ارتتىرۋ قامىنداعى جۇيەلى جۇمىس – كورپوراتيۆتىك جاۋاپكەرشىلىگىمىزدىڭ نەگىزى. ERG ءۇشىن بۇل بىررەتتىك شارا ەمەس. وسى باعىتتا ناقتى ناتيجەلەرگە قول جەتكىزۋ ءۇشىن جۇيەلى جۇمىس ىستەۋدىڭ ماڭىزىن جەتە تۇسىنەمىز. سوندىقتان قىزمەتكەرلەرىمىزدىڭ, ولاردىڭ وتباسى مۇشەلەرى مەن جالپى ءبىزدىڭ «تۋعان قالالارىمىزدا» تۇرىپ جاتقان قازاقستاندىقتاردىڭ ءومىر ساپاسىن ارتتىرۋعا سەپتەسەتىن بارلىق باعىتقا ءجىتى نازار اۋدارامىز. بيىلعى مەموراندۋمعا ەنگەن جوبالار جايلى ورتا قالىپتاستىرىپ, ERG كاسىپورىندارى ورنالاسقان وڭىرلەردە قازاقستاندىقتاردىڭ جاڭا بۋىنى جەكە تۇلعا رەتىندە ۇيلەسىمدى ءوسىپ, ورلەۋىنە بارىنشا ىقپال ەتەرىنە كامىل سەنىمدىمىن, – دەپ اتاپ ءوتتى ERG ديرەكتورلار كەڭەسىنىڭ مۇشەسى, باقىلاۋشى كەڭەستىڭ توراعاسى شۋحرات يبراگيموۆ.
قۇجاتتا پاۆلودار وبلىسىنداعى جالپى جانە ارنايى ورتا ءبىلىم بەرۋ سالاسىن ودان ءارى دامىتۋ كوزدەلگەن. وسى ورايدا ERG وڭىردە سالىناتىن ەكى مەكتەپتىڭ قۇرىلىسىنا قاراجات بولەدى. وبلىستاعى 10 كوللەدج قولداۋ تاۋىپ, ماتەريالدىق-تەحنيكالىق بازاسىن نىعايتا الادى. مۇعالىمدەردىڭ بىلىكتىلىگىن ارتتىرۋعا سەپتەسەتىن «ERG Mektepke» جانە ارنايى ورتا ءبىلىم بەرۋدى دامىتۋعا باعىتتالعان «ERG كوللەدجدەرگە» باعدارلاماسى دا جالعاسىن تابادى. وسى قوس جوبا بۇگىنگە دەيىن وبلىستاعى 3 مىڭ پەداگوگ پەن 37,5 مىڭ وقۋشىنى قامتىپ ۇلگەرگەن. مەموراندۋمنىڭ تورايعىروۆ ۋنيۆەرسيتەتىنىڭ ماتەريالدىق-تەحنيكالىق بازاسىن نىعايتۋدى كوزدەيتىن تارماعىن قوسىمشا قارجىلاندىرۋ كوزدەلگەن.
قالا نىساندارىن قايتا جاڭعىرتۋ مەن دامىتۋ ماسەلەلەرى جەكە تارماقتا جازىلعان. مىسال ءۇشىن اقسۋ قالاسىنىڭ جىلۋ جەلىلەرىنە تەحنولوگيالىق اۋديت جۇرگىزىلەدى. وبلىستاعى 8 كىتاپحانانى قايتا جاڭعىرتۋ جوباسىن ازىرلەۋ كوزدەلگەن. ونىڭ قاتارىندا بالالار مەن جالپىعا ورتاق كىتاپحانالار, ءتىپتى كوز جانارى ناشارلاعان زاعيپ جاندارعا ارنالعان كىتاپحانا دا بار. ەكىباستۇزداعى «قاينار» وقىتۋ ساۋىق ورتالىعىنا STEM-زەرتحانا ساتىپ الىنادى.
بۇعان قوسا اقسۋ شاھارىندا «Tugan Qala» باستاماسىنىڭ 11 جوباسىن قارجىلاندىرۋ قاراستىرىلعان. بۇلار – اۋەلدە قالا تۇرعىندارى وزدەرى ۇسىنىپ, كەيىن ساراپشىلاردىڭ كومەگىمەن جەتىلگەن باعىتتار. وتكەن جىلى 2 350 تۇرعىن داۋىس بەرىپ, ىسكە اسۋىن قولداعان. جەڭىمپاز جوبالار ارقىلى اقسۋدا جاڭادان بالالار جانە سپورت الاڭدارى تۇرعىزىلدى. تروتۋارلار توسەلىپ, اۆتوكولىك جانە ۆەلوسيپەد تۇراقتارى سالىنعان. قالالىق جاعاجاي العاش رەت اباتتاندىرىلىپ, مۇمكىندىگى شەكتەۋلى جاندارعا دا قولجەتىمدى بولا ءتۇستى. ءتىپتى قايىق بەكەتى بوي كوتەردى.
ال مەديتسينا باعىتىندا كومپانيا قاراجاتىنا وبلىستاعى نەوناتولوگتەردى وقىتىپ, اقسۋ قالالىق اۋرۋحاناسىن جاڭعىرتۋ, ونىڭ عيماراتىن قايتا قۇرۋعا قاجەتتى جوبالىق-سمەتالىق قۇجاتتامالارىن ازىرلەۋ جوسپارلانعان. ودان بولەك, پاۆلودار قالالىق اۋرۋحاناسىنا ليتوتريپسيا جاساۋعا قاجەتتى جابدىقتار ساتىپ الىنباق.
ەۋرازيالىق توپ كاسىپورىندارى ورنالاسقان وڭىرلەرگە Eurasian Resources Group قۇيعان الەۋمەتتىك ينۆەستيتسيالاردىڭ جالپى كولەمى 1,1 ملرد دوللاردان اسىپ وتىر.
پاۆلودار وبلىسى