7 ساۋىردە «قازاقستان ءماسليحاتتارى دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگى مەن قوستاناي وبلىستىق ءماسليحاتى دەپۋتاتتارىنىڭ مەملەكەت باسشىسى قاسىم-جومارت توقاەۆتىڭ سايلاۋالدى باعدارلاماسىن قولداۋ جانە ىسكە اسىرۋ جونىندەگى بىرلەسكەن وتىرىسى ءوتتى, دەپ حابارلايدى Egemen.kz.
ءىس-شاراعا جەتىنشى جانە سەگىزىنشى شاقىرىلىمداعى وبلىستىق ءماسليحات دەپۋتاتتارى, وبلىستىق باسقارمالاردىڭ باسشىلارى, باق وكىلدەرى شاقىرىلىپ, ونلاين-ترانسلياتسيا جۇرگىزىلدى.
سونداي-اق وتىرىسقا قوستاناي وبلىسى اكىمى ق.اقساقالوۆ, «قازاقستان ءماسليحاتتارى دەپۋتاتتارىنىڭ بىرلەستىگى» رقب توراعاسى ت.مۇقاشەۆ جانە قوستاناي وبلىستىق ءماسليحاتىنىڭ توراعاسى س.ەششانوۆ قاتىسىپ, ءسوز سويلەدى.
كۇن تارتىبىنە پرەزيدەنتتىڭ «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» اتتى سايلاۋالدى تۇعىرناماسىن ىسكە اسىرۋ ماسەلەلەرى شىعارىلدى.
ءوز كەزەگىندە وسى تاقىرىپ اياسىندا «قازاقستان ءماسليحاتتارى دەپۋتاتتارىنىڭ بىرلەستىگى» رقب توراعاسى ت.مۇقاشەۆ بايانداما جاسادى.
«ادىلەتتى قازاقستاننىڭ قۇرىلىسى», جەرگىلىكتى حالىقتىڭ ءومىر ءسۇرۋ جاعدايى مەن ساپاسىن جاقسارتۋ جونىندەگى جاڭا مىندەتتەمەلەر دەپۋتاتتاردىڭ سايلاۋشىلارمەن اراداعى جۇمىسىن قايتا قۇرۋدى تالاپ ەتەدى. سونىمەن قاتار سايلاۋشىلار ءتارتىبى جانە ءماسليحاتشىلاردى كەرى شاقىرىپ الۋ ينستيتۋتتارىن ەنگىزۋدى ىسكە اسىرادى. تيىسىنشە جاڭا جاعدايدا ءماسليحاتتاردىڭ نەگىزگى قىزمەتى – ءوز اۋماعىندا ساپالى الەۋمەتتىك ينفراقۇرىلىمدى سالۋ مەن جوندەۋدى ۇيىمداستىرۋدان كورىنبەك. مىسالى, الداعى ۋاقىتتا ەلىمىزدە كوپتەگەن الەۋمەتتىك ينفراقۇرىلىم نىساندارى سايلاۋشىلاردىڭ تالابى مەن جەرگىلىكتى مەملەكەتتىك باعدارلامالار نەگىزىندە قۇرىلماق. دەگەنمەن بۇل وزگەرىستەردىڭ بارلىعى ءماسليحاتشىلاردىڭ بەلسەندى ازاماتتاردى تارتا وتىرىپ تۇراقتى مونيتورينگ پەن باقىلاۋ جاساۋ جاۋاپكەرشىلىگىن ارتتىرادى» دەپ اتاپ ءوتتى رقب توراعاسى.
ونىڭ ايتۋىنشا, بۇل رەتتە جاڭا قازاقستان ءماسليحاتىنىڭ ءاربىر دەپۋتاتى بويىندا الەمدىك كاسىبي ستاندارتقا سايكەس مىناداي قاسيەتتەر بولۋى ءتيىس:
الدىمەن كوممۋنيكاتيۆتى قابىلەتتەرگە يە بولۋى قاجەت:
- مەملەكەتتىك جانە ورىس تىلدەرىن ءبىلۋ, تيتۋلدى ۇلت پەن دياسپورالاردىڭ تاريحىن, سالت-ءداستۇرىن, ادەت-عۇرپىن ءبىلۋ, سايلاۋشىلارمەن بايلانىستا ۇنەمى اشىق بولۋ;
- بارلىق سايلاۋشىلارمەن, ۇكىمەتتىك ەمەس ۇيىمدار وكىلدەرىمەن, مەملەكەتتىك ورگاندارمەن, بيزنەسپەن, قۇقىق قورعاۋ ورگاندارىمەن جىلدام سەنىمدى قارىم-قاتىناس ورناتا ءبىلۋ قابىلەتى;
- حالىقتىڭ ءارتۇرلى اۋديتوريالارىنا, بۇقارالىق اقپارات قۇرالدارىنا بەلگىلى ءبىر تاقىرىپتا ءوز ويىن ەركىن جەتكىزە ءبىلۋ, سۇحباتتار مەن ءباسپاسوز كونفەرەنتسيالارىن جانە ت.ب. بەرۋ قابىلەتى.
كەلەسى باسىمدىق – ۇيىمداستىرۋشىلىق قابىلەتتەرگە يە بولۋى كەرەك:
- سايلاۋشىلاردىڭ وتىنىشتەرى مەن ازاماتتاردىڭ ۇسىنىستارىنا, ءوز سايلاۋ وكرۋگى بويىنشا بۇقارالىق اقپارات قۇرالدارىنداعى سىني ماتەريالدارعا جەدەل جانە ۋاقىتىلى جاۋاپ بەرۋ قابىلەتى;
- بەلگىلى ءبىر تاقىرىپ بويىنشا حالىقپەن قوعامدىق تىڭداۋلاردى, دوڭگەلەك ۇستەلدەردى, كوميسسيالاردىڭ كوشپەلى وتىرىستارىن جانە ت.ب. دايىنداۋ جانە وتكىزۋ قابىلەتى;
ال سوڭعىسى – سىندارلى قابىلەتتەرگە يە بولۋى ءتيىس:
- وبلىستا, قالادا, تۇرعىندار اراسىندا جانە باق-تا جوعارى ينتەللەكتۋالدىق, ادامگەرشىلىك بەدەلگە يە بولۋى كەرەك;
- قاجەتتى قۇقىقتىق, بيۋدجەتتىك جانە قارجىلىق, پسيحولوگيالىق, ساياسي بىلىمدەر مەن داعدىلارعا يە بولۋى شارت جانە ولاردى قولدانا ءبىلۋى ءتيىس;
- ءوزiنiڭ اكiمشiلiك اۋماعىنىڭ – اۋدان, قالا نەمەسە وبلىس ەكونوميكاسى مەن الەۋمەتتiك سالاسىن, جەر, ەكولوگيالىق, تابيعي رەسۋرس, كولiك, ەنەرگەتيكا جانە باسقا دا شارۋاشىلىعىن, ءوز اۋماعىنداعى دەموگرافيالىق جانە ۇلتتىق جاعدايدى ءبiلۋى كەرەك;
- دەپۋتاتتىق جۇمىس ءۇشىن جەكە كىتاپحانانى پايدالانۋ, كىتاپحانالارعا, كونفەرەنتسيالارعا, كورمەلەرگە بارۋ, ارداگەر-دەپۋتاتتار اراسىنان شىققان تالىمگەرلەردىڭ كومەگىمەن, ساراپشىلارمەن جانە مامان عالىمدارمەن كەزدەسۋلەر, اپپاراتتىق وقىتۋ, كاسىبي وقۋ-ادىستەمەلىك باسىلىمدارعا جازىلۋ ارقىلى ءوزىن-ءوزى ۇزدىكسىز كاسىپتىك وقىتۋ مەن دامىتۋدى ۇيىمداستىرۋ نەگىزىندە ءوز ءبىلىمىن ۇزدىكسىز جاڭارتۋ.
ودان بولەك سپيكەرلەر وڭىردەگى سايلاۋ الدىنداعى باعدارلامانى ىسكە اسىرۋ بويىنشا جۇرگىزىلىپ جاتقان جۇمىستار تۋرالى حاباردار ەتتى.
جيىن بارىسىندا ت.مۇقاشەۆ «قازاقستان ءماسليحاتتارى دەپۋتاتتارىنىڭ بىرلەستىگى» رقب اتىنان بەلسەندى دەپۋتاتتىق قىزمەتى جانە ەل مەن وبلىستىڭ الەۋمەتتىك-ەكونوميكالىق دامۋىنا قوسقان ەلەۋلى ۇلەسى ءۇشىن بىرقاتار وڭىرلىك ءماسليحات دەپۋتاتتارىن «قۇرمەتتى دەپۋتات» توسبەلگىسىمەن جانە گراموتامەن ماراپاتتادى.
ايتا كەتەيىك, وتىرىس قورىتىندىسى بويىنشا بىلتىر 24 جەلتوقساندا اقتوبەدە قابىلدانعان, كەشەگى جالپىەلدىك سايلاۋ ناۋقانى الدىندا شىمكەنت پەن تۇركىستاندا القالانعان قازاقستان رەسپۋبليكاسى پرەزيدەنتىنىڭ سايلاۋالدى باعدارلاماسىن قولداۋ جانە جۇزەگە اسىرۋ جونىندەگى بارلىق دەڭگەيدەگى ءماسليحات دەپۋتاتتارىنىڭ بىرلەسكەن ۇندەۋى كەزەكتى رەت قولداۋ تاپتى.