باس پروكۋراتۋرا قازاقستاندىقتارعا زاڭسىز ميتينگىلەرگە قاتىستى ۇندەۋ جولدادى

باس پروكۋراتۋرا مۇنداي اكتسيالاردى ۇيىمداستىرعانى جانە قاتىسقانى ءۇشىن زاڭ جۇزىندە جاۋاپقا تارتىلاتىنى تۋرالى بىرنەشە رەت ەسكەرتتى.

«قوعامدىق ءتارتىپتى, حالىقتىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ, ازاماتتاردىڭ قۇقىقتارى مەن بوستاندىقتارىن ساقتاۋ - ءبىزدىڭ باستى باسىمدىقتارىمىز.

سوندىقتان «قازاقستان رەسپۋبليكاسىندا بەيبىت جينالىستاردى, ميتينگىلەردى, شەرۋلەردى, پيكەتتەر مەن دەمونستراتسيالاردى ۇيىمداستىرۋ جانە وتكىزۋ ءتارتىبى تۋرالى» زاڭنىڭ نورمالارىن ساقتاۋ قاجەتتىلىگىنە جانە ولاردى بۇزۋعا جول بەرمەۋگە تاعى دا نازار اۋدارامىز», دەلىنگەن حابارلامادا.

بۇقارالىق جاريا ءىس-شارالار الدىن الا حاباردار ەتۋمەن جانە وسى ءۇشىن ارنايى بولىنگەن ورىنداردا جەرگىلىكتى اتقارۋشى ورگانداردىڭ رۇقساتىن الۋمەن حالىقتىڭ تىرشىلىگىن قامتاماسىز ەتۋ وبەكتىلەرىنىڭ قالىپتى جۇمىس ىستەۋىنە كەدەرگىلەردى بولدىرمايتىن شارالاردى قابىلداي وتىرىپ, جۇرگىزىلۋگە ءتيىس.

كورسەتىلگەن نورمالار ساقتالماعان جاعدايدا كەز كەلگەن جاريا شاقىرۋلار زاڭسىز دەپ تانىلادى. قۇقىق بۇزۋشىلارعا قاتىستى قۇقىق قورعاۋ ورگاندارى اكىمشىلىك جانە قىلمىستىق-قۇقىقتىق شارالار قابىلدايدى.

اتاپ ايتقاندا, زاڭ تالاپتارىن (3-باپتىڭ 3-تارماعى) بۇزا وتىرىپ وتكىزىلەتىن ميتينگىلەردى, شەرۋلەردى, جينالىستاردى نەمەسە دەمونستراتسيالاردى ۇيىمداستىرۋ جانە ولارعا قاتىسۋ قۇقىققا قايشى جانە اكىمشىلىك قۇقىقبۇزۋشىلىق تۋرالى كودەكستىڭ 488-بابى بويىنشا 25 تاۋلىككە قاماققا الۋعا دەيىن اكىمشىلىك جاۋاپتىلىققا تارتىلادى.

وسى ارەكەتتەردىڭ ناتيجەسىندە ەلەۋلى زالال كەلتىرگەنى ءۇشىن كىنالىلەر قىلمىستىق كودەكستىڭ 400-بابى بويىنشا ايىپپۇل نە 200 ايلىق ەسەپتىك كورسەتكىش مولشەرىندە تۇزەۋ جۇمىستارى نەمەسە 200 ساعاتقا دەيىنگى مەرزىمگە قوعامدىق جۇمىستارعا تارتۋ نە 50 تاۋلىككە دەيىنگى مەرزىمگە قاماققا الۋ تۇرىندە قىلمىستىق جاۋاپتىلىققا تارتىلادى.

وسىعان بايلانىستى, باس پروكۋراتۋرا قولدانىستاعى زاڭنامانىڭ نورمالارىن مۇلتىكسىز ساقتاۋعا, ارانداتۋشىلىققا بەرىلمەۋگە جانە زاڭسىز اكتسيالاردى ۇيىمداستىرۋدان جانە ولارعا قاتىسۋدان, سونداي-اق ولارعا جاريا تۇردە شاقىرۋدان باس تارتۋعا شاقىرادى.