ەكىباستۇزدا لىق تولى اۆتوبۋستا كامەلەتكە تولماعان كوللەدج ستۋدەنتىنە ەر ادام شابۋىل جاسادى. پوليتسەيلەر بۇل دەرەككە قاتىستى تەرگەۋ جۇمىستارىن باستادى, دەپ حابارلايدى Egemen.kz Tengrinews.kz سايتىنا سىلتەمە جاساپ.
جابىرلەنۋشىنىڭ اناسىنىڭ ايتۋىنشا, وقيعا 31 ناۋرىزدا تاڭەرتەڭ قالالىق اۆتوبۋستاردىڭ بىرىندە بولعان. كامەلەتكە تولماعان قىز سىنىپتاستارىمەن بىرگە كوللەدجگە بارا جاتقان.
«ساعات 07.40-تا «قازاقستان» ايالداماسىنا جاقىنداپ قالدىق. اۆتوبۋسقا ادام لىق تولدى. مەن شىعا بەرىسكە جاقىن تۇردىم. قاسىمدا اجە مەن كىشكەنتاي بالا بولدى. ماعان شابۋىل جاساعان ەر ادام ارتىمدا تۇرىپ, ءبىزدى قاتتى يتەرىپ جىبەردى. مەن يىعىنان ءتۇرتىپ, اباي بولۋىن ءوتىندىم, ال ول مەنىڭ تاماعىمنان ۇستاپ تۇنشىقتىرا باستادى. سول كەزدە قاسىمىزدا باسقا ەر ادامدار تۇردى, بىراق ماعان ەشكىم كومەكتەسپەدى. قاشۋ ءۇشىن ونىڭ اياعىن تەبۋگە تۋرا كەلدى. اۆتوبۋستىڭ ەسىگى اشىلعاندا مەن قاشىپ كەتۋ ءۇشىن شىققىم كەلدى, ال ول مەن شىعۋىما بارىنشا كەدەرگى كەلتىردى», دەدى 16 جاستاعى قىز.ايتۋىنشا, بەيتانىس ەر ادام ايالداماعا كەلگەندە تاعى دا تيىسپەك بولعان.
«مەن ءجۇرىپ بارا جاتىپ جىلاپ, ايعايلاپ ۇرىستىم. ول بۇرىلىپ كەلىپ جۇدىرىعىمەن ۇرعىسى كەلدى. بىراق قاسىمىزدان ءوتىپ بارا جاتقان ايەل كورىپ, باسقالاردى كومەككە شاقىردى. الدىمەن ءبىر ەر ادام جۇگىردى, سوسىن تاعى ەكەۋى كەلدى. شابۋىلداۋشىنى ۇستاپ تۇرعاندا, سىنىپتاستارىم مەنى ۇيگە الىپ كەتتى. قاتتى قورىققانىمنان پوليتسيا شاقىرۋدى ويلاماپپىن. ۇلكەندەر ماعان شابۋىل جاساعان ەر ادامدى بوساتىپ جىبەرىپ وزدەرى اۆتوبۋسقا وتىرىپ كەتتى. كەيىنىرەك كۋاگەرلەردەن ونىڭ اۆتوبۋستىڭ سوڭىنان جۇگىرىپ بارىپ, اينەكتى ۇرعانىن بىلدىك», دەپ قوستى بويجەتكەن.
سول كۇنى جابىرلەنۋشىنىڭ اتا-اناسى پوليتسياعا ارىزدانعان.
«قىزىمنىڭ تاماعى اۋىرا باستادى. قاتتى كۇيزەلىستەن ول قازىر اۆتوبۋسقا جالعىز وتىرۋعا دا قورقادى», دەپ تۇيىندەدى كامەلەتكە تولماعان قىزدىڭ اناسى.
ەكىباستۇز پوليتسياسى بۇل فاكت تىركەلگەنىن, تەكسەرىلىپ جاتقانىن مالىمدەدى.