مادەنيەت جانە سپورت مينيسترلىگىنىڭ قولداۋىمەن TURAN ەتنو-فولكلورلىق ءانسامبلى ءوزىنىڭ 15 جىلدىق مەرەيتويىنا وراي الەمدىك تۋرنە وتكىزەدى, دەپ حابارلايدى Egemen.kz.
1-17 ءساۋىر ارالىعىندا Turan ەۋروپادا بىرنەشە كونتسەرت وتكىزەدى. اتاپ ايتقاندا, انسامبل فرانتسياداعى پاريج, ليون جانە بەلفورعا, شۆەيتساريادا جەنەۆاعا, بەلگيا استاناسى بريۋسسەلگە, حورۆاتيانىڭ زاگرەبىنە, سلوۆەنيانىڭ ليۋبليانا قالاسىنا, بۋداپەشت پەن ۆەناعا بارادى.
ايتا كەتەيىك, گاسترولدەر اقش استاناسى - ۆاشينگتوندا باستالدى. ناۋرىز مەيرامى اياسىندا 21-23 ناۋرىز ارالىعىندا ۇجىم كولۋمبيا وكرۋگى ۋنيۆەرسيتەتىندە جانە دجوردج ۆاشينگتون ۋنيۆەرسيتەتىنىڭ ساحناسىندا ونەر كورسەتتى.
تۋرنە اياسىندا ساحناعا روزا باعلانوۆا اتىنداعى «قازاقكونتسەرتتىڭ» باسقا دا سوليستەرى شىعادى: كومپوزيتور, قازاقستاننىڭ ەڭبەك سىڭىرگەن قايراتكەرى, «قازاقكونتسەرتتىڭ» ديرەكتورى اقتوتى رايىمقۇلوۆا, اتاقتى تەنور جانە قازاقستاننىڭ ەڭبەك سىڭىرگەن قايراتكەرى مەدەت شوتاباەۆ پەن ۆيولونچەليست, شانحاي كونسەرۆاتورياسىنىڭ ماگيسترانتى تالعار شالقار ۇلى. ءارى قاراي انسامبل قىرعىزستان مەن وزبەكستانعا بارادى.
«وسى 15 جىل ىشىندە Turan اقش-تا جانە باسقا ەلدەردە بىرنەشە رەت ونەر كورسەتتى. انسامبل بۇعان دەيىن نيۋ-يورك, لوس-اندجەلەس, سان-فرانتسيسكو جانە ۆاشينگتونداعى كارنەگي حولل جانە كەننەدي ورتالىعى سياقتى ورىنداردا كونتسەرتتەر بەرگەن. انسامبل ەلىمىزدىڭ ەجەلگى مۋزىكالىق ونەرىن, كونە اسپاپتاردىڭ دىبىسىن قايتا جاڭعىرتتى. بۇل رەتتە, ول بۇكىل الەمدەگى سان مىڭداعان تىڭداۋشىلاردىڭ قۇرمەتىنە يە بولدى, بۇل شەتەلدىكتەردىڭ ۇجىمعا دەگەن قىزىعۋشىلىعىنىڭ دالەلى», دەپ اتاپ ءوتتى قر مسم مادەنيەت كوميتەتى توراعاسىنىڭ ورىنباسارى دانيار اليەۆ.