مەملەكەت باسشىسىنىڭ جارلىعىندا كەيىن ۇلتتىق عىلىم اكادەمياسى ەلىمىزدىڭ جوعارى عىلىمي ۇيىمى ەكەنى ناقتى ايتىلدى. اكادەمياعا مەملەكەتتىك مارتەبە بەرىلدى جانە الەمنىڭ بارلىق جەتەكشى ەلدەرىندەي عىلىم اكادەمياسىنىڭ بارلىق مۇشەسىنىڭ مارتەبەسى دە ارتاتىن بولادى. ۇلتتىق عىلىم اكادەمياسى مەن ۇلكەن عىلىمنىڭ بارلىق ماسەلەسى جوعارى دەڭگەيدە شەشىلەدى.
وتكەن جىلى پرەزيدەنت قاسىم-جومارت توقاەۆ ۇلتتىق عىلىم اكادەمياسىنىڭ مەرەيتويىندا عالىمداردى ۇزاق جىل تولعاندىرىپ كەلگەن ماسەلەنىڭ نۇكتەسىن قويىپ, اكادەميانىڭ مارتەبەسىن قايتارۋدى تۇبەگەيلى شەشكەن بولاتىن. وتاندىق عىلىمنىڭ, عالىمداردىڭ, اكادەميانىڭ مارتەبەسىن كوتەرۋگە باعىتتالعان قادام عالىمدارعا تىڭ سەرپىلىس بەرەتىنى انىق. ەندىگى كەزەكتە ۇلتتىق عىلىم اكادەمياسى قاۋىپسىزدىك, پروكۋراتۋرا, قارجى پوليتسياسى, قازاقستان ستراتەگيالىق زەرتتەۋلەر ينستيتۋتى قاتارىندا پرەزيدەنتتىڭ تىكەلەي باقىلاۋىندا بولادى. بۇعان قوسا عالىمداردىڭ الدىندا پرەزيدەنت جانىنان قۇرىلعان جوعارى عىلىمي-تەحنيكالىق كوميسسيامەن بىرلەسىپ جۇمىس ىستەۋ مىندەتى تۇر.
سوڭعى وتىز جىل ىشىندە ەلىمىزدىڭ عىلىم مەن تەحنولوگيا سالاسى وتە تومەن دەڭگەيگە ءتۇسىپ كەتكەنى بەلگىلى. جىل سايىن جاريالاناتىن ەكونوميكالىق كۇردەلىلىك «گارۆارد يندەكسىندە» قازاقستاننىڭ كورسەتكىشى مينۋسقا دەيىن تومەندەپ كەتتى. ال عالىمدار سانى 50 مىڭنان 20 مىڭعا دەيىن ازايۋى بۇگىنگى عىلىمنىڭ جاعدايىن ايقىنداپ تۇرسا كەرەك. كەڭەس وداعى تۇسىندا قازاقستان عىلىمى مەن تەحنولوگياسى جاعىنان رەسەيدەن كەيىن ەكىنشى ورىندا, ۋكراينامەن قاتار تۇردى.
پرەزيدەنت VIII سايلانعان پارلامەنت ءماجىلىسىنىڭ ءبىرىنشى سەسسياسىندا سويلەگەن سوزىندە ەلىمىزدە ساياسي رەفورمالار جۇرگىزىپ قانا قويماي, قوعامدى تۇبەگەيلى وزگەرتۋ, ادام كاپيتالى, الەۋمەتتىك ساياساتقا باسىمدىق بەرۋدىڭ قاجەتتىلىگىن اتاپ ءوتتى. ال ءومىر ساپاسىن, ەكونوميكانى جاقسارتۋ ءۇشىن جاڭا تەحنولوگيالىق سەرپىلىستەر قاجەت.
ءازىمحان ساتىبالدين,
عىلىم جانە جوعارى ءبىلىم مينيسترلىگى عىلىم كوميتەتىنە قاراستى ەكونوميكا ينستيتۋتىنىڭ باس ديرەكتورى, اكادەميك