ويلاماعان جەردەن وزا شاپتى

جاپونداردىڭ جاۋىنگەرلىك ونەرى – كاسىپقوي سۋمو كۇرەسىنىڭ كوكتەمگى چەمپيوناتى (حارۋ باششيو) ءوز مارەسىنە جەتتى. 12 ناۋرىزدا باستالعان باسەكەدە موڭعول بالۋانى كيريبياما ب.لحاگۆاسۇرەن جەڭىمپاز اتانىپ, كۇرەس جولىندا العاش رەت جاپونيا يمپە­راتورىنىڭ كۋبوگىن يەلەندى. كيريبياما سوڭعى كۇنى جاپون الىبى دايەي­شونى جەڭىپ, كاسىپقوي سۋمو كۇرەسىنىڭ ەڭ جوعارى (ماكۋچي) ديۆيزيونىندا جەڭىمپاز اتانعان 9-شى موڭعول بالۋانى اتاندى.

ال «ارىق سويلەپ, سەمىز شىق» دەيتىن قازاقى قاعيدانى بەرىك ۇستاناتىن ۇس­تامدى قازاق بالۋانى ەرسىن بالتاعۇل ماكۋچي ديۆيزيونىندا العاش رەت ونەر كورسەتىپ, كەرەمەت ناتيجەگە قول جەتكىزدى. ولاي دەيتىنىمىز, كوكتەمگى باسەكە باستالماي تۇرىپ, ە.بالتاعۇل ءباسپاسوز جيىنىندا جۋرناليستەرگە «الدا بولاتىن بەلدەسۋدە 50 پايىزدىق جەتىستىككە جەتۋ جانە جاراقات الماۋ» دەگەن بولاتىن. 15 كۇننىڭ ناتيجەسىندە 11 رەت جەڭىسكە جەتىپ, 4 رەت جىعىلىپ, ءتورتىنشى ورىنعا تابان تىرەدى. كۇتكەن مەجەدەن الدەقايدا جوعارى جەتىستىككە جەتتى. ەرسىن باسەكەنىڭ بەل ورتاسىنا كەلگەندە وندىقتان تومەن بولاتىن. بار كۇشىن سوڭعى كۇن­دەرگە سالىپ, كۇننەن-كۇنگە جەڭىس­تىڭ جولىن جالعاي ءتۇستى. باس­قا قارسىلاستارىنىڭ جەڭىلىسى دە ەرسىننىڭ جوعارىلاۋىنا مۇم­كىندىك بەردى. مۇنى ساراپشىلار قازاق سپورتى ءۇشىن تاريحي جەتىستىك دەپ وتىر. بۇدان كەيىن ەرسىن سۋمو كۇرەسىندەگى جوعارى اتاقتار مەن مول سىيلىققا يە بولىپ, ونىڭ دوداداعى دارەجەسى وسە تۇسپەك.

كوكتەمگى باسەكەدە ارنايى اتا­­­لىمدار بويىنشا ءۇش بالۋان ەرەكشە ماراپاتقا يە بولدى. ونىڭ ىشىندە قازاق بالۋانى ەرسىن دە بار.

كانتوشيوو – جاۋجۇرەك بالۋان

        ماەگاشيرا (دارەجەسى) كين­بوزان 11:4.

        كيسە كلۋبى, 25 جاس.

قازاقستان, بالقاش قالاسىنىڭ تۋماسى.

        2021 جىلدىڭ قاراشا ايىنان باستاپ كۇرەسكەن.

        گينوشيوو – جەكپە-جەك شەبەرى

        سەكيۆاكە (دارەجەسى) كيري­باياما 12:3.

        ميچينوكۇ كلۋبى, 26 جاس.

موڭعوليا, دورنود ايماعى­نىڭ تۋماسى.

        2015 جىلى مامىر ايىنان باس­تاپ كۇرەستى.

        كومۇسۇبي (دارەجەسى) دايەي­شيوو 12:3.

        ويتەكازە كلۋبى, 29 جاس.

جاپونيا, سايتاما پرەفەك­تۋراسىنىڭ تۋماسى.

        2012 جىلى قاڭتار ايىنان باس­تاپ كۇرەسكەن.

        شۇكۇنشيوو – ۇزدىك بالۋان

بۇل ناتيجەگە ەشبىر بالۋان جەتە المادى.