استانا. 1 شىلدە. ۇلتتىق قوردان بولىنگەن 1 تريلليون تەڭگەنىڭ كومەگىمەن ەكونوميكانى ساۋىقتىرۋدىڭ قوسىمشا ىنتالاندىرۋ شارالارى جۇزەگە اسىرىلادى. بۇل تۋرالى «قازاقپارات» حابارلادى.
ورتالىق كوممۋنيكاتسيالار قىزمەتىندە وتكەن بريفينگتە ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ: «مەملەكەت باسشىسىنىڭ تاپسىرماسىنا سايكەس, ۇلتتىق قوردان بولىنگەن 1 تريلليون تەڭگە ەسەبىنەن ەكونوميكانىڭ ءوسۋىن قوسىمشا ىنتالاندىرۋ شارالارى قامتاماسىز ەتىلدى. بيىل ەكونوميكالىق ءوسۋدى قامتاماسىز ەتۋگە 500 ملرد. تەڭگە ءبولىنىپ وتىر. ونىڭ ىشىندە شاعىن جانە ورتا بيزنەستى قولداۋعا 100 ملرد. تەڭگە, بانك سەكتورىن ساۋىقتىرۋعا 250 ملرد. تەڭگە جانە يندۋستريالىق-يننوۆاتسيالىق دامۋ جوبالارىن ىسكە اسىرۋعا 150 ملرد. تەڭگە جۇمسالادى», – دەدى.
ەكونوميكا جانە بيۋدجەتتىك جوسپارلاۋ ءمينيسترىنىڭ سوزىنە قاراعاندا, ۇلتتىق قوردان بولىنەتىن تەڭگەنى ءتيىمدى پايدالانۋ ءۇشىن ۇكىمەت بىرقاتار حالىقارالىق قارجى ۇيىمدارىمەن كەلىسىمگە كەلگەن.
ەربولات دوساەۆ: «بىرقاتار حالىقارالىق بانكتەر ەكونوميكانىڭ نەگىزگى سالاسىنداعى ينۆەستيتسيالىق جوبالار مەن باسىم باعدارلامالاردى بىرلەسە قارجىلاندىرۋدى قامتاماسىز ەتەدى. بىرلەسە قارجىلاندىرۋدىڭ جالپى مولشەرى 7,5 ملرد. دوللارعا دەيىن جەتەدى», – دەدى.
جولدىباي بازار.
دەرەككوز: «قازاقپارات».
فوتو: remarka.kz.