كوكشەتاۋدا ءۇي قۇرىلىسىنا قاجەتتى ءونىم شىعاراتىن جاڭا زاۋىت اشىلدى

استانا. 1 شىلدە. كوكشەتاۋ قالاسىندا  قۇرىلىس ماتەريالدارىن شىعاراتىن جاڭا زاۋىت ىسكە قوسىلدى. بۇل تۋرالى «24kz» حابارلادى. «ۇدەمەلى يندۋستريالدى-يننوۆاتسيالىق دامۋ» باعدارلاماسى اياسىندا سالىنعان ءوندىرىس ورنىنىڭ جوبالىق قۇنى 1 ملرد. تەڭگەنى قۇراپ وتىر. كاسىپورىن اشىلعان ساتتە بىردەن 70 ادام جۇمىسقا ورنالاسقان. جالپى اۋماعى 7 000 شارشى مەتردى الىپ جاتقان كاسىپورىن ءونىم كولەمى ۇلعايعان سايىن جۇمىسشىلار سانىن 100-گە جەتكىزۋدى جوسپارلاۋدا. زاۋىت تولىق اۆتوماتتاندىرىلعان. كاسىپورىن ديرەكتورى الەكساندر دۆورتسەۆوي: «تاۋلىگىنە 300 مەتر پليتا شىعارامىز. ونىڭ ىشىندە ءۇيدىڭ ىرگەتاسىنا ارنالعان بەتوندار, قابىرعالار جانە توبەسىن جاباتىن بەتوندار بار. زاۋىتقا كەتكەن قارجى جەكە وزىمىزدىكى. مەملەكەت ارنايى جەر ءبولىپ بەردى جانە بانكتەن العان نەسيەمىزدىڭ پايىزدىق مولشەرلەمەسىن جاۋىپ وتىر. ازىرگە زاۋىت ونىمدەرى كوكشەتاۋ قالاسىنىڭ قۇرىلىستارىنا جۇمسالۋدا. سۇرانىس جوعارى», – دەدى. زاۋىت باسشىلارى وتاندىق قۇرىلىس زاتتارىن كوپتەپ شىعارۋ ەلىمىزدەگى تۇرعىن ءۇي باعاسىن تومەندەتۋگە جول اشادى دەپ ەسەپتەيدى. ولار كەلەسى جىلدان باستاپ 9 قاباتتى پانەلدى ۇيلەر سالۋدى قولعا الماق. جولدىباي بازار. دەرەككوز: «24kz». فوتو: «24kz».