قازاقستان رەسپۋبليكاسى پارلامەنتىنىڭ سەناتى سەناتورلاردىڭ دەپۋتاتتىق ساۋالدارىندا ايتىلعان ماسەلەلەردى شەشۋ ءۇشىن مەملەكەتتىك ورگاندار قابىلداعان شارالار تۋرالى مينيسترلىكتەر مەن مەكەمەلەر وكىلدەرىنىڭ ەسەپتەرىن تىڭداۋدى باستادى, دەپ حابارلايدى Egemen.kz.
كەزدەسۋ بارىسىندا اندرەي لۋكيننىڭ دەپۋتاتتىق ساۋالىندا ايتىلعان ۇسىنىستاردى ىسكە اسىرۋ بارىسى تۋرالى مەملەكەتتىك ورگانداردىڭ ەسەبى تىڭدالدى. دەپۋتات باس بوستاندىعىنان ايىرۋ ورىندارىندا ءدىني ەكسترەميزمنىڭ تارالۋ پروبلەمالارىن كوتەردى.
«ەكسترەميستىك يدەولوگيانىڭ تارالۋى ءۇشىن باس بوستاندىعىنان ايىرۋ ورىندارى قۇنارلى جەر بولىپ سانالادى. قوعامنان وقشاۋلانعان سوتتالعاندار سول جەردەگى تۇتقىنداردىڭ سەنىمدى سوزدەرى مەن ۋاعىزىنا وڭاي كونەدى. كەيبىرەۋلەر ءدىن ارقىلى ءومىردىڭ ءمانىن تۇسىنۋگە تىرىسادى. وكىنىشكە قاراي, ولار راديكالدى ءدىني اعىمداردىڭ ىقپالىنا ءتۇسۋى مۇمكىن», دەپ اتاپ ءوتتى سەناتور اندرەي لۋكين.
كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتى دەپۋتاتتارىمەن كەزدەسۋ بارىسىندا قر ءىىم قىلمىستىق-اتقارۋ جۇيەسى كوميتەتىنىڭ وكىلى دەپۋتاتتىق ساۋالدا كورسەتىلگەن ۇسىنىمداردى ورىنداۋ جونىندە اتقارىلعان جۇمىستار تۋرالى بايانداما جاسادى. ۇقك اكادەمياسىندا قايتا دايارلاۋدان ءوتىپ جاتقان تەولوگتار ءۇشىن قاج قۇرىلىمىنا لاۋازىم ەنگىزىلدى, ال ءىىم قوستاناي اكادەمياسىندا سوتتالعاندارمەن تەولوگيالىق جانە وڭالتۋ جۇمىستارىن ۇيىمداستىرۋ جونىندەگى پەنيتەنتسيارلىق جۇيە قىزمەتكەرلەرىن دايارلاۋ ورتالىعى قۇرىلدى.
باس پروكۋراتۋرانىڭ وكىلى 2022 جىلدىڭ قورىتىندىسى بويىنشا راديكالدى كوزقاراستاردى ۇستاناتىن ادامداردىڭ سانى 4%-عا تومەندەگەنىن, سول ارقىلى 94 سوتتالۋشى دەسترۋكتيۆتى يدەيادان باس تارتقانىن حابارلادى.
دەپۋتاتتار كەزدەسۋ بارىسىندا سوتتالعانداردى راديكالدىق كوزقاراستان ارىلتۋ بويىنشا ولاردىڭ الەۋمەتتىك بايلانىستارىن دامىتۋعا ىقپال ەتەتىن, سول ارقىلى دەسترۋكتيۆتى ءدىني اعىمداردى جاقتاۋشى ادامدارعا جاعىمدى اسەر ەتەتىن ارنايى باعدارلامالار جاساۋ قاجەتتىگىن اتاپ ءوتتى.