بىرنەشە كۇن بۇرىن تاراز قالاسىنداعى №22 مەكتەپتىڭ مۇعالىمدەرى مەن پوليتسيا ينسپەكتورى الىشەر ەرمەكوۆ تابيعي گازدان ۋلانعان ءبۇتىن ءبىر وتباسىنى قۇتقارىپ قالعان بولاتىن. وسىعان وراي تاراز قالاسىنىڭ اكىمى باقىتجان ورىنبەكوۆ بەس ادامنان قۇرالعان وتباسىنى قۇتقارعان №22 مەكتەپتىڭ مۇعالىمدەرىن قابىلداپ, قۇرمەت كورەتتى.
«باسىن بايگەگە تىگىپ, اينالاسىنا كومەكتەسۋگە قۇشتار جاندار قاشاندا ماقتاۋعا لايىق. ءتۇرلى وقىس وقيعادا تونگەن قاۋىپكە قاراماستان, وزگەنىڭ ءومىرىن قۇتقارىپ قالعان ازاماتتارعا ايتار العىس, كورسەتىلەتىن قۇرمەت شەكسىز.
مۇنداي ەرلىك ەكىنىڭ ءبىرىنىڭ قولىنان كەلمەيدى. سىزدەر بەيبىت كۇننىڭ باتىرىسىزدار. وسى تاۋەكەلدەرىڭىز ارقىلى تۇتاس ۇستاز دەيتىن ۇلى ماماندىقتىڭ ابىرويىن كوتەرىپ, بەدەلىن بيىكتەتتىڭىزدەر. وسى ەرلىكتەرىڭىز – وسكەلەڭ ۇرپاققا ۇلگى, مول تاعىلىم. بارشاڭىزعا باتىلدىق پەن قىراعىلىقتارىڭىز ءۇشىن العىس بىلدىرە وتىرىپ, دەندەرىڭىزگە ساۋلىق, وتباسىلارىڭىزعا اماندىق تىلەيمىن», دەگەن شاھار باسشىسى بەيبىت كۇننىڭ باتىرلارىنا سىي-سياپات تاپسىردى.
ەستەرىڭىزگە سالا كەتسەك, 6 ناۋرىز كۇنى №22 ورتا مەكتەپتىڭ 2-سىنىپ وقۋشىسى بەكجان باقىتجان ۇلى ساباققا كەلمەگەندىكتەن, مەكتەپ اكىمشىلىگى اتا-اناسىنا حابارلاسقان. الايدا ولاردىڭ دا سول كۇنى جۇمىسقا شىقپاعانى, №10 ورتا مەكتەپتە ءبىلىم الاتىن سول وتباسىنىڭ 2 بالاسىنىڭ دا ساباققا بارماعانى بەلگىلى بولادى. مەكتەپ اكىمشىلىگى ءمان-جايدى انىقتاۋ ماقساتىندا وقۋشىلاردىڭ ۇيىنە ديرەكتوردىڭ تاربيە ءىسى جونىندەگى ورىنباسارى ەلميرا ەسەلباەۆا, وقۋ-تاربيە ءىسى جونىندەگى ورىنباسارى ايدا ەسەنامانوۆا, دەنە شىنىقتىرۋ ءپانىنىڭ مۇعالىمى قۋانىش يسمايلوۆ, مەكتەپ پوليتسيا ينسپەكتورى الىشەر ەرمەكوۆتى جىبەرەدى.
ولار ۇيگە بارعان سوڭ تەرەزەدەن قيمىلسىز جاتقان 5 ادامدى بايقايدى. سول ارادا بىردەن ارەكەتكە كوشىپ, بەسەۋىن دە دالاعا الىپ شىعىپ, گاز قۇرىلعىسىن وشىرەدى. سونىڭ ارقاسىندا ءبىر وتباسى اجال تىرناعىنان امان قالدى.
تاراز