ارگەنتينا قۇراماسى جانە «پسج» كومانداسىنىڭ شابۋىلشىسى ليونەل مەسسي ءوز مانسابىنداعى 800-ءىنشى گولىن سوقتى, دەپ حابارلايدى Egemen.kz championat.com سايتىنا سىلتەمە جاساپ.
ارگەنتينالىق شابۋىلشى كاسىپقوي مانسابىنداعى 800-ءشى گولىن سوقتى. كلۋبتىق مانسابىندا مەسسي 701, ۇلتتىق قۇراما ساپىندا 99 گول سوعا الدى.
ەسكە سالايىق, بۇگىن, 24 ناۋرىزدا ارگەنتينا مەن پاناما قۇرامالارى جولداستىق كەزدەسۋ وتكىزدى. كەزدەسۋ قوجايىندارى 2:0 ەسەبىمەن جەڭىسكە جەتتى. 89-مينۋتتا پسج شابۋىلشىسى ليونەل مەسسي كومانداسىنىڭ ەكىنشى گولىن سوعىپ, تابلوداعى قورىتىندى ەسەپتى ورناتتى.
ليونەل مەسسي 2005 جىلدان بەرى ارگەنتينا قۇراماسىندا ويناپ, ونىڭ ۇزدىك ءبومبارديرى اتاندى. ول سونداي-اق 2022 جىلى قاتاردا وتكەن الەم بىرىنشىلىگىندە كاپيتاندىق تىزگىندى ۇستاپ, جەڭىمپاز اتانىپ, سول بىرىنشىلىكتىڭ ۇزدىك ويىنشىسى بولدى.