تاياۋدا عانا اۋليەكولدە ەلىمىزدەگى ەڭ الىپ نارەستە ومىرگە كەلگەنىن سۇيىنشىلەپ ەدىك. نۇر شاشقان ناۋرىزدىڭ باسىندا شىر ەتىپ دۇنيە ەسىگىن اشقان ايارۋ بوپەنىڭ سالماعى 7 كيلوعا جاقىن! قىزىعى سول, ەلىمىزدەگى ەڭ ۇزىن بويجەتكەندەردىڭ ءبىرى دە وسى اۋىلدا تۇرادى. 17 جاستاعى ارۋجان يشانبەكوۆانىڭ بويى ەكى مەتردەن اسادى.
– بەس ۇلىم, ەكى قىزىم بار. بالالارىمنىڭ ءبارى – بويشاڭ. ءوز بويىم – 1 مەتر 95 سانتيمەتر, ۇلكەن ۇلىمدىكى – ەكى مەتر. ال ارۋجانىمنىڭ بويى – 2,2 مەتر. قىزىم وتە باۋىرمال, كىسىگە جاقىن. وسى اۋىلدا بىرنەشە جىل بويى ۆولونتەر جاستاردىڭ قاتارىندا ءجۇرىپ, اۋليەكولدى كوگالداندىرۋعا اتسالىستى. ۇلكەن-كىشىگە, مۇمكىندىگى جوق مۇقتاجدارعا قول كومەگىن تيگىزىپ ءجۇردى. قانشاما ماراپات الدى, ءبارى ۇيدە ساقتاۋلى تۇر. مۇنىڭ سىرتىندا, وسىنداعى شوقان ءۋاليحانوۆ مەكتەبىندە وقىپ ءجۇرىپ, ەكى جىل بوكسپەن اينالىستى. اجەپتاۋىر جەتىستىكتەرگە جەتىپ ەدى, پاندەميا كەزىندە ۇيىرمە جابىلىپ, بوكستان ءبىرجولا قول ءۇزىپ كەتتى, – دەيدى ارۋجاننىڭ اكەسى كوپجاسار دوسىمبەكوۆ.
ارۋجان قازىر قوستانايدا, ز.الدامجاروۆ اتىنداعى كوللەدجدىڭ ەكىنشى كۋرسىندا «دەنە شىنىقتىرۋ» ماماندىعى بويىنشا ءبىلىم الىپ جاتىر.
– قالاعا كەلگەن سوڭ, كوشەدەگى بەيتانىس ادامداردىڭ سۇق كوزىنە ۇيرەنە الماي بىرازعا دەيىن ىڭعايسىزدانىپ ءجۇردىم. كەيبىرەۋلەر سىزبەن سۋرەتكە ءتۇسىپ الايىقشى دەپ وتىنەدى. قازىر ۇيرەنىپ كەتتىم. وقۋ ۇلگەرىمىم دە جاقسى. ۆولەيبول ۇيىرمەسىنە بارىپ ءجۇرمىن. تاعى ءبىر كەدەرگى – كوپپەن بىرگە بازارعا, دۇكەنگە بارىپ كيىم ساتىپ الا المايمىن. قوستانايدا ماعان شاق كەلەتىن كيىم جوق. سوندىقتان جاڭا كيىم الۋ ءۇشىن اۋليەكولدەگى تىگىن تسەحىنا تاپسىرىس بەرەمىن, – دەيدى ارۋجان.
قوستاناي وبلىسى