ازەربايجاندا «بۇگىنگى الەم: سىندار مەن ۇمىتتەر» تاقىرىبىنداعى ح باكۋ جاھاندىق فورۋمى ءوتتى. فورۋم جۇمىسىنا اقپارات جانە قوعامدىق دامۋ ءمينيسترى دارحان قىدىرالى قاتىسىپ, ءسوز سويلەدى.
ونىنشى رەت وتكىزىلىپ وتىرعان فورۋمنىڭ ينتەللەكتۋالدىق پلاتفورماعا اينالىپ كەلە جاتقانىن اتاپ وتكەن دارحان قىدىرالى پرەزيدەنت قاسىم-جومارت توقاەۆتىڭ بۇۇ باس اسسامبلەياسىنىڭ 77-سەسسياسىندا سويلەگەن ءسوزىن ەسكە سالدى. «مەملەكەت باسشىسى ءتارتىپ پەن جاۋاپكەرشىلىككە نەگىزدەلگەن حالىقارالىق جۇيە بۇگىنگى حاوس پەن بەلگىسىزدىك الدىندا ەسە جىبەرىپ العانىن ايتقان ەدى», دەدى مينيستر.
سونداي-اق د.قىدىرالى قازاقستاننىڭ تاۋەلسىزدىكتىڭ العاشقى كۇندەرىنەن الەمدەگى ءتورتىنشى يادرولىق الەۋەتتەن باس تارتىپ, سەمەي پوليگونىن جاۋىپ, حالىقارالىق قاۋىمداستىق الدىندا يادرولىق قارۋسىز الەم قۇرۋداعى تاباندىلىعىن كورسەتكەنىن, بۇل جاھان پروبلەماسىن جۇمىلا شەشۋدەگى قازاقستاننىڭ ۇلەسى ەكەنىن ايتتى. مينيستر جاھاننىڭ جانە ايماقتىڭ الدىندا تۇرعان سىن-قاتەرلەر, ونىڭ ىشىندە كليماتتىڭ, ازىق-ت ۇلىكتىڭ جانە يادرولىق قاۋىپسىزدىكپەن قاتار, پوستشىندىق داۋىرىندە بەلەڭ العان گيبريد سوعىستارى, ينفودەميا قۇبىلىستارى اقپاراتتىق قاۋىپسىزدىككە دە ەرەكشە نازار اۋدارۋ قاجەت ەكەنىن كورسەتىپ وتىرعانىن اتاپ ءوتتى.
«گيبريدتى سوعىستار مەن ينفودەميا ءبىزدىڭ كۇندەلىكتى ءومىرىمىزدىڭ ءبىر بولىگىنە اينالدى. بۇل اقپاراتتىق قاۋىپ جانە اقپاراتتىق سوعىستىڭ شەگى جوق. كيبەرقىلمىستىڭ ءوسۋى ءبىزدىڭ ءومىرىمىزدىڭ بارلىق سالاسىنا, سونىڭ ىشىندە اۋىل شارۋاشىلىعى, سۋمەن جابدىقتاۋ, قارجى, قاۋىپسىزدىك, كولىك, ەنەرگەتيكا, عارىش جانە سۋاستى كوممۋنيكاتسيالارىنا شابۋىلدار كوبەيگەن سايىن ايقىن كورىنەدى. قاجەتتى رەسۋرستاردى, تەحنولوگيالىق شەشىمدەردى, سونداي-اق وسى سالاداعى مامانداردى دايارلاۋدىڭ ماڭىزدى مىندەتى», دەدى مينيستر.
جاڭا تەحنولوگيانىڭ دامۋى ادام ومىرىنە ارتىقشىلىق بەرۋمەن قاتار, سىن-قاتەرلەرمەن دە بەتپە-بەت كەلتىرىپ وتىر.
«كوپتەگەن عالىم جاساندى ينتەللەكت مەملەكەتتەردىڭ جۇمىسىن جاقسارتادى جانە ءححى عاسىردا قوعامنىڭ كۇردەلى ماسەلەلەرىن شەشەدى دەپ بولجايدى. الايدا مەديا مەن تسيفرلاندىرۋداعى ەتيكا ماسەلەسى الدان شىعىپ وتىر. سوندىقتان جاساندى ينتەللەكتىنى دۇرىس پايدالانۋدى رەتتەۋ, سونداي-اق ونى قولدانۋ قۇقىعىن قالىپتاستىرۋ ماسەلەلەرى زياتكەرلىك ورتادا كەڭىنەن تالقىلانۋعا ءتيىس», دەدى د.قىدىرالى ءوز سوزىندە.
سونىمەن بىرگە مينيستر كاسپي تەڭىزىنىڭ ەكولوگيالىق جاعدايىنا دا نازار اۋدارۋ قاجەت ەكەنىن تىلگە تيەك ەتتى.
«كاسپي تەڭىزى – بالاماسى جوق سۋ باسسەينى جانە بەس ەل ەكونوميكاسىنىڭ بازالىق رەسۋرسى. الايدا عالىمداردىڭ زەرتتەۋىنشە, XXI عاسىر سوڭىندا كاسپيدەگى سۋ كولەمى ازايۋى مۇمكىن. بۇل ايماقتاعى ەكوجۇيە مەن ەكونوميكالىق قاۋىپسىزدىككە سىن-قاتەر توندىرەدى», دەپ اتاپ ءوتتى د.قىدىرالى.
وسىمەن 10-رەت وتكىزىلىپ وتىرعان باكۋ جاhاندىق فورۋمىنا ازەربايجان رەسپۋبليكاسىنىڭ پرەزيدەنتى يلحام اليەۆ, الەمنىڭ بەلگىلى ساياسي قايراتكەرلەرى مەن عالىمدار قاتىستى.
ايتا كەتۋ كەرەك, قازاقستان دەلەگاتسياسى قۇرامىندا عىلىمي-زەرتتەۋ ورتالىقتارى مەن مينيسترلىككە قاراستى مەكەمەلەردىڭ وكىلدەرى بولدى.