شاۆقات راحمونوۆ, جالعاس جۇماعۇلوۆ, ماريا اگاپوۆا جانە سەرگەي موروزوۆ سىندى ەلىمىزدىڭ UFC-دە ساناۋلى عانا سپورتشىسى بار. ولاردىڭ قاتارىنا شەتەلدىك قانداستارىمىزدى قوسۋعا بولادى. اتاپ ايتساق, قىتايدا دۇنيەگە كەلگەن سايران نۇردانبەك پەن ماقسات قايسار, رەسەيدىڭ ورىنبور ولكەسىندە تۋىپ-وسكەن دامير يسماعۇلوۆ كۇش سىناسىپ ءجۇر. ءسال ەرتەرەكتە جۇمابەك تۇرسىن ونەر كورسەتتى. قانى ءبىر قازاق بولعاننان كەيىن بۇل ازاماتتاردىڭ دا تابىسى بىزگە ورتاق. ءوز جەرلەستەرىمىزبەن قاتار, سولاردىڭ دا ءاربىر جەڭىسىنە قۋانامىز.
قازىرگى كەزدە تەك شاۆقات راحمونوۆ قانا قارسىلاستارىن قوعاداي جاپىرىپ كەلەدى. كۇنى كەشە عانا ول لاس-ۆەگاستا امەريكالىق دجەفف ءنيلدى ءۇشىنشى راۋندتا قىلقىندىرىپ, جەڭىسكە جەتتى. دامير يسماعۇلوۆتىڭ دا اياقالىسى جاقسى ەدى. قاتارىنان بەس كەزدەسۋدە جەڭىسكە جەتكەن ول بىلتىرعى جىلدىڭ جەلتوقسان ايىندا رەسەيلىك ارمان تسارۋكياننان ۇپاي سانىمەن ۇتىلعان سوڭ UFC-دەن كەتەتىنىن ءمالىم ەتتى. ال وزگە سپورتشىلارىمىزدىڭ ونەرى الا-قۇلا. جالعاس جۇماعۇلوۆ الەمنىڭ ەڭ بەلدى پروموۋشەنىندەگى التى باسەكەنىڭ بەسەۋىندە جەڭىلىستىڭ كەرمەك ءدامىن تاتتى. بىلتىر كۇزدە چارلز دجونسونعا ەسە جىبەرگەننەن كەيىن ول دا «بۇزىلدى». وسى ورايدا جالعاس تورەشىلەردىڭ ادىلەتسىزدىگىنە توزە المايتىنىن ايتتى. ءسويتىپ, UFC-دەگى فايتەرلەرىمىزدىڭ قاتارى بىرتە-بىرتە كەمىپ كەلەدى. سول سەبەپتى دە جەكپە-جەك دەسە, قاندارى قىز-قىز قايناپ, دەلەبەلەرى قوزاتىن جانكۇيەرلەردى «الداعى ۋاقىتتا جوعارىدا ەسىمدەرى اتالعان سپورتشىلاردىڭ ورنىن كىمدەر باسادى؟» دەگەن ساۋال ەرەكشە تولعاندىرىپ ءجۇر. ەندى وسى سۇراققا جاۋاپ ىزدەپ كورەيىك.
ەڭ ءبىرىنشى كەزەكتە اسۋ الماباەۆتى اتاپ وتكەن ءجون. 29 جاستاعى ساقا سپورتشىنىڭ وسى سپورت ءتۇرىن سەرىك ەتكەلى 10 جىلعا جۋىقتادى. تۇساۋكەسەر كەزدەسۋىندە ول رەسەيلىك ۆاديم بۋسەەۆتى ۇپاي سانىمەن ۇتتى. ودان كەيىن ءۇش جىلداي وكتاگوندا كورىنبەدى. 2016 جىلى قايتا ورالىپ, ءتۇرلى جارىستاردا ەلدوس قاليەۆ, ولەگ ەديك جانە گالامىرزا ايۆازوۆتى ايقىن باسىمدىقپەن جەڭدى. كەلەسى جىل اسۋ ءۇشىن ءساتسىز بولدى. Fight Nights Global مەن «الاش پرايد» پروموۋشەندەرى ۇيىمداستىرعان ەكى بىردەي ءدۇبىرلى دودادا قانداسىمىز جەڭىلىس تاپتى. ماحاچكالادا ول تاگير ۋلانبەكوۆكە, الماتىدا مەحمان مامەدوۆكە جول بەردى. بۇل ساتسىزدىكتەرىن دارىندى جاس جاقسى ساباق الدى. ەسەسىنە ودان كەيىنگى التى جىلدا 13 جەكپە-جەك وتكىزىپ, بارلىعىندا جەڭىس تويىن تويلادى. الماباەۆتان تاياق جەگەندەر اراسىندا الەكساندر دوسكالچۋك تا بار. ۋكراينالىق فايتەر كەزىندە سانكت-پەتەربۋرگتە وتكەن M-1 Challenge 92 ءتۋرنيرىنىڭ باستى باسەكەسىندە ءبىزدىڭ تاعى ءبىر مىقتى سپورتشىمىز ارمان ءاشىموۆتى ۇتقانىن جانكۇيەرلەر جاقسى بىلەدى. الاتاۋ باۋرايىندا ۇيىمداستىرىلعان تۋرنيردە اسۋ دوسكالچۋكتى «قىلقىندىرۋ» ادىسىمەن جەڭدى.
كەزىندە M-1 Global جانە NAIZA ۇيىمدارىنىڭ تەڭدەسسىزى دەپ تانىلعان اسۋ الماباەۆ سوڭعى ۋاقىتتا ىرگەتاسى تاياۋ شىعىستا قالانعان BRAVE CF پروموۋشەنىندە ءساتتى ونەر كورسەتىپ ءجۇر. ءتىپتى ونىڭ چەمپيوندىق بەلبەۋ ءۇشىن تالاساتىن مۇمكىندىگى دە بار. بىراق الماباەۆقا بۇل اتاق قاجەت پە؟ اسۋدىڭ ارمانى – UFC-دە كۇش سىناسۋ جانە دە ول سول جوسپارىن جۇزەگە اسىرعانشا تىنبايتىن سەكىلدى. كۇنى كەشە عانا ول شاۆقات راحمونوۆپەن بىرگە اقش-قا اتتانىپ, الەمنىڭ ەڭ بەلدى پروموۋشەنىندە ونەر كورسەتىپ جۇرگەن كوماندالىق ارىپتەسىنىڭ دجەفف نيلعا قارسى جەكپە-جەككە جاقسىلاپ دايارلانۋىنا ءوز ۇلەسىن قوستى.
ايقاس الاڭىندا ورەلى ونەرىمەن كوزگە ءتۇسىپ جۇرگەن ازات ماقسۇم جايىندا «بۇگىن, ەرتەڭ ول UFC-مەن كەلىسىمشارتقا وتىرادى» دەگەن سىڭايدا اڭگىمە ءجيى ايتىلىپ ءجۇر. 27 جاستاعى قازاق فايتەرى دانا ۋايتتىڭ كومانداسىندا بولۋعا ابدەن لايىق. ونىڭ ارالاس جەكپە-جەكپەن اينالىسقانىنا التى جىلدان استى. سول ارالىقتا 16 كەزدەسۋ وتكىزىپ, بارلىعىندا جەڭىسكە جەتتى. العاشقى التى باسەكەدە ازات ءوز وتانداستارىمەن ايقاسسا, كەيىننەن نەبىر مىقتى شەتەلدىك سپورتشىلاردى سابادى. سولاردىڭ قاتارىندا برازيليانىڭ «ۇر دا جىقتارى» دا بار. ماسەلەن, وسى جىلدىڭ 21 قاڭتارىندا الماتىداعى بالۋان شولاق اتىنداعى سپورت سارايىندا وتكەن جارىستا ماقسۇم بۇعان دەيىن ەشكىمگە ەسە جىبەرمەگەن وڭتۇستىكامەريكالىق فابريتسيو نۋنەستى ءبىرىنشى راۋندتا-اق «قىلقىندىرۋ» ادىسىمەن جەڭدى.
«ەسكى گۆارديانىڭ» وكىلدەرى اراسىنان قايرات احمەتوۆ, ارتەم رەزنيكوۆ جانە ارمان ءاشىموۆتى بولە-جارا اتاساق, ەش ايىبى جوق. 35 جاستاعى احمەتوۆ 2010-2015 جىلدار ارالىعىندا وتكىزگەن العاشقى 23 كەزدەسۋىندە قارسىلاس شاق كەلتىرمەي, كوپشىلىك نازارىن وزىنە اۋداردى. ءار جەڭىسىنەن كەيىن «قارا جورعا» بيلەيتىن جىگىتكە دەگەن جانكۇيەرلەردىڭ دە قۇرمەتى ەرەكشە. سول ارالىقتا الماتى وبلىسى سارقان اۋدانى باقالى اۋىلىنىڭ تۋماسى سينگاپۋردىڭ ONE FC دەپ اتالاتىن بەلدى ۇيىمىنىڭ چەمپيوندىق بەلبەۋىن يەلەندى. ال قايراتتىڭ قازىرگى شەردوگى – 31 كەزدەسۋ, 29 جەڭىس (18 نوكاۋت) جانە 2 جەڭىلىس.
31 جاستاعى ارتەم رەزنيكوۆ 2016-2017 جىلدار ارالىعىندا قاتارىنان بەس رەت جەڭىلگەندە, كورەرمەندەر ودان كۇدەر ۇزە باستاعان ەدى. بىراق شىعىستىڭ شىمىر جىگىتى ءوزىنىڭ ەرەن ەڭبەگى مەن تاباندىلىعىنىڭ ارقاسىندا كوزدەگەن ماقساتىنا قول جەتكىزدى. ودان كەيىن ول قاتارىنان 10 قارسىلاسىن قاپى قالدىردى. قازىرگى كەزدە ارتەم چەشەنستاننىڭ اسا پروموۋشەنى ۇيىمداستىرعان جۇلدە قورى 1 ميلليون اقش دوللارىن قۇرايتىن گران-پري باسەكەسىنە قاتىسىپ, اقتىق سىنعا دەيىن القىنباي جەتتى. ەندى وتانداسىمىز فينالدا رەسەيدىڭ تۋى استىندا ونەر كورسەتەتىن ارميان جىگىتى ەدۋارد ۆارتانيانمەن ايقاسادى. وسى باسەكەدە جەڭىسكە جەتكەن سپورتشى چەمپيوندىق بەلبەۋىمەن قاتار, 200 مىڭ دوللاردى قالتاعا باسادى. رەزنيكوۆتىڭ قازىرگى شەردوگى – 30 جەكپە-جەك, 24 جەڭىس (18 نوكاۋت) جانە 6 جەڭىلىس.
ارمان ءاشىموۆتى جۇرت جاقسى بىلەدى, جاقسى كورەدى. سەبەبى ول جەڭسە دە, جەڭىلسە دە ءوزىن بىرقالىپتى ۇستايدى, ەش ۋاقىتتا اسىپ-تاسىمايدى. ۇنەمى ك ۇلىپ, جايدارى جۇرەدى. «مۇستافا وزتۇرىك» دەگەن جاناما ەسىممەن شىعىپ جۇرگەن 31 جاستاعى قازاقتىڭ قايسار ۇلى 15 باسەكەنىڭ ۇشەۋىندە عانا جەڭىلىس تاپتى. 11 جەكپە-جەكتە جەڭىسكە جەتىپ, تاعى ءبىر تارتىس تەڭ اياقتالدى. 10 قارسىلاسىن نوكاۋتقا جىبەردى. ءبىر ايتا كەتەرلىگى, ارمان – امبەباپ سپورتشى. ول ارالاس جەكپە-جەكپەن قاتار, جالاڭ قولمەن جۇدىرىقتىسۋعا دا ماشىقتانىپ ءجۇر. الدىڭعى جىلى كيەۆتە ءاشىموۆتىڭ جەرگىلىكتى سپورتشى, بوكستان حالىقارالىق دارەجەدەگى سپورت شەبەرى تيمۋر بەلياكتى ءبىر سوققىمەن سۇلاتىپ سالعانىن كوزىمىز كوردى. سونداي-اق قانداسىمىز بىلتىرعى جىلدىڭ اياعىندا الماتىدا كاسىپقوي بوكستان دا جەكپە-جەك وتكىزىپ, گرۋزيالىق بۋحۋتي تاتياشۆيليمەن تەڭ ءتۇستى.
جوعارىدا ەسىمدەرى اتالعانداردىڭ قاتارىنا اسىلجان باقىتجان ۇلىن دا قوسۋعا بولادى. «الاش پرايد» پەن اسا ۇيىمدارىنىڭ مۇرىندىق بولۋىمەن وتكەن جارىستاردا جانكەشتىلىگىمەن كوزگە تۇسكەن ول 18 كەزدەسۋدىڭ 14-ءىن ءوز پايداسىنا شەشتى. 10 قارسىلاسىن كەسكەن تەرەكتەي سۇلاتىپ سالدى. ءتىپتى جەڭىلگەن جاعدايدىڭ وزىندە اسىلجانعا ەشكىم وكپە ايتپادى. ويتكەنى قانداسىمىز ءار كەز «ولىسپەي بەرىسپەۋگە» بەكىنىپ, تورەشىلەر توقتاتقانعا دەيىن ايقاسادى.
كەزىندە ارمان وسپانوۆتىڭ دا UFC-دە كۇش سىناساتىنداي مۇمكىندىگى بولدى. تۇركىستان وبلىسى تولە بي اۋدانىنىڭ تۋماسى 2012-2017 جىلدار ارالىعىندا بىردە-ءبىر رەت جەڭىلگەن جوق. الماتىدا رۋسلان حاداەۆ پەن دجەيمس ءريزدى, سوچيدە الەكسەي پولپۋدنيكوۆتى جانە سانكت-پەتەربۋرگتە تايچي ناكادزيمانى قالاي جەڭگەنى جايىندا جۇرت ءالى دە اڭگىمەلەپ ءجۇر. مىنە, سول كەزدە امەريكالىق پروموۋشەننىڭ وكىلدەرى ارمانعا نازار اۋداردى. بىراق قانداسىمىز ءتۇرلى سەبەپتەرگە بايلانىستى مۇحيتتىڭ ارعى بەتىنە بارا المادى. ودان كەيىن باعى جانبادى ما, الدە بابى كەم بولدى ما, ايتەۋىر وسپانوۆ ءجيى سۇرىنە باستادى. 2017 جىلدىڭ كۇزىنەن 2021 جىلدىڭ جازىنا دەيىنگى ارالىقتا التى رەت وكتاگونعا شىققان ارمان سول باسەكەلەردىڭ تورتەۋىندە جەڭىلدى. ونىڭ الەكسەي پولپۋدنيكوۆكە ەكى رەت جانە برازيليالىق تياگو لۋيس بونيفاتسيو سيلۆاعا ءالى جەتپەدى. قازاق سپورتشىسى 2019 جىلى ماسكەۋدە گەرمانيادا تۇرىپ جاتقان چەشەن جىگىتى لوم-ءالي ەسكيەۆ پەن 2020 جىلى الماتىدا داعىستاندىق راسۋل ميرزاەۆتىڭ تاس-تالقانىن شىعارعاندا ءبىر شاتتانىپ قالعان ەدىك. الايدا وسپانوۆ 2021 جىلدىڭ 10 ماۋسىمىندا نيۋ-دجەرسيدەگى ءوزىنىڭ سوڭعى جەكپە-جەگىندە امەريكالىق كريس ۋەيدكە ەسە جىبەردى.
قازىرگى كەزدە ەلىمىزدە پروموۋتەرلىك كومپانيالاردىڭ قاتارى كوبەيىپ كەلەدى. «الاش پرايد», «نايزا», «وكتاگون», «الەم فايتەرس» جانە تاعى باسقا ۇيىمدار قارقىندى جۇمىس ىستەپ جاتىر. ولاردان بولەك, بىرقاتار شەتەلدىك پروموۋشەن ءبىزدىڭ ەلدە ءدۇبىرلى دودالار وتكىزۋدى جاقسى ءبىر داستۇرگە اينالدىردى. سونىڭ ارقاسىندا دارىندى جاستار مەن جالىندى جىگىتتەردىڭ قالىڭ شوعىرى شىعا باستادى. بۇگىنگى تاڭدا جانكۇيەرلەر تاراپىنان ءالىبي ىدىرىس, قارشىعا داۋىتبەك, ماگومەد كابارديەۆ, ءالي قابدوللا, ديار نۇرعوجاي, ءسابيت ءجۇسىپوۆ, مۇقاعالي نەسىپباي, ۆاسيلي تاحتاي, نيكولاي سامسۋەۆ, دامير تولەنوۆ سىندى فايتەرلەر جايىندا جىلى پىكىرلەر ايتىلىپ ءجۇر. مىنە, ەسىمدەرى جوعارىدا اتالعان جەرلەستەرىمىز الداعى ۋاقىتتا UFC-دە كۇش سىناسىپ, ارالاس جەكپە-جەك الەمىندە وزدەرىن تۇبەگەيلى مويىنداتادى دەپ ۇمىتتەنەمىز.