ءبىزدىڭ نارىقتا ۇلتتىق تاعامدار ءجيى ساتىلادى. ال قازاقتىڭ ءتاتتى تاعامدارىن ساۋدالاۋدى جولعا قويعاندار نەكەن-ساياق. سولاردىڭ ءبىرى – قوستانايلىق گۇلنۇر كاكىمبەك. جاس انا ۇلتتىق تاتتىلەر جاساپ, تابىس تاۋىپ وتىر. 8 ناۋرىز مەرەكەسى قارساڭىزدا كاسىپكەردى اڭگىمەگە تارتتىق.
- ۇلتتىق تاعام تۇرلەرىن, ونىڭ ىشىندە حالقىمىزدىڭ ءتاتتى تاعامدارىن نارىق تالاپتارىنا ساي ازىرلەپ كاسىپ اشقان ەكەنسىز. دەمەك قوستانايدا ۇلتتىق ونىمگە دەگەن سۇرانىس جاقسى بولىپ تۇرعانى عوي.
- قوستاناي جۇرتشىلىعىنا مەن ۇسىنعان زاماناۋي تۇردەگى ونىمدەر تاڭسىق بولادى. تۇتىنۋشىلار ءبىزدىڭ دۇكەنگە كىرگەن كەزدە قول ديىرمەندى كورىپ, جەنتتىڭ ءدامىن تاتقاندا بالا كەزدەرىن ەسكە ءتۇسىرىپ جاتادى. اجەسى مەن اناسىنىڭ دا وسىنداي تاعامدار دايىنداعان ساتتەرىن ەسكە تۇسىرەدى... سوندىقتان كەلۋشىلەر بارشىلىق. بۇل قالاداعى ۇلتتىق تاتتىلەر ازىرلەيتىن العاشقى دۇكەن بولعاندىقتان دا سۇرانىس بار.
- جالپى بۇل كاسىپتى قولعا الۋ تۋرالى وي قايدان كەلدى؟
- اۋەلدە, مۇنداي كاسىپ اشۋ تۋرالى وي بولماعان. كەيدە بالا-شاعا ءۇشىن, ەندى بىردە قوناقتارعا ارناپ جەنت سەكىلدى جەڭسىك استار دايىندايتىنمىن. ال كاسىپ باستاۋىرما بيزنەس جارناماسىنىڭ باستى قۇرالدارىنىڭ ءبىرى الەۋمەتتىك جەلى سەبەپشى بولدى. ويتكەنى مەن بالالارىما ازىرلەگەن جەنتتى الەۋمەتتىك جەلىلەردەگى پاراقشالارىما جۇكتەدى. سول ساتتەن باستاپ تاپسىرىس تۇسە باستادى. كورىپ وتىرعانىڭىزداي سوڭى ساۋداعا اينالدى
كىشكەنتايىمنان انامنىڭ جانىندا ءجۇرىپ, بيداي قۋىرىپ, ونى قول ديىرمەنىنەن وتكىزىپ, جەنت جاساۋدى ۇيرەندىم. ءسۇت تارتىپ, قايماق بىلعاپ, باۋىرساق ءپىسىرىپ, ەرتە جاستان ءۇي شارۋاسىنا ارالاسقان سوڭ, ۇلتتىق تاتتىلەردى ازىرلەۋ ەش قيىندىق تۋدىرمادى. سوندىقتان كوپتەپ تاپسىرىس تۇسە باستاعاندا, كۇن-ءتۇن دەمەي بىردەن بىلەك سىبانا كىرىسىپ كەتتىم. بۇل ىستە وتباسىم مەن جاقىندارىمنىڭ قولداۋى زور بولدى.
- نارىقتا باسەكەلەستىك بار ما؟
- بۇگىندە الەۋمەتتىك جەلى ارقىلى ادەمى دۇنيەنى جارىققا شىعارىپ, كوپكە تانىتۋعا مۇمكىندىك مول. سوندىقتان قوستانايدا بولماسا دا قازاقستاندىق نارىقتاعى وزگە دە ونىمدەرمەن سالىستىرىپ, ءوز ەرەكشەلىگىمدى كورسەتۋگە تىرىسامىن.
- جۇمىسىڭىزدى قازىرگىدەن دە ىلگەرىلەتىپ, مول تابىس تابۋ ءۇشىن قانداي دا ءبىر كەدەرگىلەر بار ما؟
- قالامىزدا شيكىزات وتە از. ءتىپتى جەنتتىڭ قالىپتارىن دا تابۋ قيىن. وزگە قالادان الدىرتۋعا تۋرا كەلەدى. قولدا بار قۇرالدارمەن جۇمىس ىستەپ ءجۇرمىز...
- ءونىمدى قاي جەردە ازىرلەيسىزدەر؟
- دۇكەن جانە تسەح قاتار جۇمىس ىستەپ تۇر. اللا ءساتىن سالسا, تسەحتى كەڭەيتۋ جوسپارى تۇر.
- ءونىمدى ساۋداعا شىعاراردا ساپاسىنان بولەك تاعى نە نارسەگە ءمان بەرەسىز؟
- ەڭ الدىمەن ساپاعا ءمان بەرەمىن. كۇندەلىكتى دايىندالسا دا, الدىمەن ءوزىم ءدامىن تاتىپ كورەمىن. سودان كەيىن بارىپ سورەگە قويامىن. ودان كەيىن قاپتاماسىنىڭ ءساندى بەزەندىرىلۋىنە دە زەر سالامىن. كوپ تۇتىنۋشىلار ۇلتتىق ءونىمدى وسىلاي ادەمى ۇسىنعانىما قۋانادى, تاڭ قالادى.
- ۇلتتىق تاعامنىڭ ءبىرىن ازىرلەۋگە جۇمسالاتىن شىعىن كولەمى مەن ودان تۇسەتىن تابىس كولەمى جايلى ايتىپ بەرە الاسىز با؟
- ازىرگە قۇپيا بولسىن. سەبەبى, دۇكەن رەتىندە اشىلعانىنا ەندى عانا 6 اي بولادى.
- ونىمدەرىڭىزدى وزگە ۇلت وكىلدەرى دە ساتىپ الاتىن شىعار؟
- ارينە, تۇتىنۋشى ۇلتقا بولىنبەيدى عوي. بىزگە كەلگەن كەي وزگە ۇلت وكىلدەرى وسى تاعامدارمەن بايلانىستى ءتۇرلى وقيعالارىن, تاريحي ساتتەرىن دە ايتىپ بەرگەن ەدى. ءتىپتى كەي ءونىم تۇرلەرىن وزدەرى ۇيلەرىندە دايىنداۋعا كوشكەن باسقا ۇلت وكىلدەرىن دە بىلەمىن. ءبىزدىڭ ءونىم كەيدە سىي رەتىندە قازاقستاننان وزگە مەملەكەتتەرگە دە جولدانىپ جاتادى.
- كاسىبىڭىزدەن وتباسىڭىزعا ويىسساق...
- ءۇش بالانىڭ اناسىمىن. ا.بايتۇرسىنوۆ اتىنداعى قوستاناي وڭىرلىك ۋنيۆەرسيتەتىنىڭ اعا وقىتۋشىسىمىن. قازىر بالا كۇتىمىنە بايلانىستى دەمالىستامىن.
- قىز-كەلىنشەكتەر مەرەكەسى كەلە جاتىر. كىمنەن جانە قانداي سىي كۇتەسىز؟
- بارلىق انا, اجە, اپا, جەڭگە, سىڭىلىلەرىمدى مەرەكەمەن قۇتتىقتايمىن. كوكتەمدەي قۇلپىرىپ, اينالاعا شۋاق شاشا بەرىڭىزدەر! ەشكىمنەن سىي كۇتپەيمىن, نەگىزى. كوڭىلدىڭ ءوزى سىي دەپ بىلەمىن.