شاراپاتى مول شاعىن بيزنەس

پارتيا توراعاسى ەرلان قوشانوۆ پارتيا شاعىن جانە ورتا بيزنەس ءۇشىن ەلدە بيزنەس جۇرگىزۋ بو­يىنشا قاراپايىم ەرەجەلەردى قامتاماسىز ەتۋدى جالعاستىراتىنىن اتاپ ءوتتى. ء«بىز جەكە باستامالار مەن نارىقتىق ەكونوميكانىڭ كۇشىنە سەنەمىز. پارتيا زاڭناما دەڭگەيىندە ەكونوميكاداعى مونوپوليانى جويۋعا جانە ادال باسەكەلەستىكتى دامىتۋعا قول جەتكىزەدى. 2027 جىلعا دەيىن ءبىز كەم دەگەندە 15 مىڭ ارتىق رەتتەۋشى كەدەرگىنى جويامىز», دەدى ە.قوشانوۆ.

ونىڭ ايتۋىنشا, «Amanat» پارتياسى ماشينا جاساۋ, مەتاللۋرگيا, تاماق جانە جەڭىل ونەركاسىپتە جۇزدەگەن جاڭا كاسىپورىن قۇرۋعا ىقپال ەتەدى, وندا جىل سايىن كەمىندە 40 مىڭ ساپالى, جوعارى جالاقى تولەنەتىن جۇمىس ورنى اشىلادى. شتاب مۇشەلەرى «اسار» شاعىن اۋدانىنىڭ تۇرعىندارىمەن ينفراقۇرىلىمدى دامىتۋ جانە تۇرعىن ۇيگە قولجەتىمدىلىككە قاتىستى وزەكتى ماسەلەلەردى تالقىلادى. قالا تۇرعىندارى ينجەنەرلىك جەلىلەردىڭ توزۋى, كوممۋنالدىق تاريفتەر قۇنىنىڭ جوعارىلاۋى, اباتتاندىرۋ جانە جاسىل جەلەك تاقىرىپتارىن قوزعادى. پارتيا سايلاۋالدى ۋادەلەرىن ورىنداۋ اياسىندا شىمكەنتتە 5,5 ملن شارشى مەتر تۇرعىن ءۇي سالۋ, جاقسى جانە قاناعاتتانارلىق جاعدايداعى اۆتوموبيل جولدارىنىڭ ۇلەسىن 67,4%-دان 85%-عا دەيىن كوبەيتۋ, اۋلالاردا 100 اشىق سپورت الاڭىن سالۋ جانە كوشەلەردى جارىقتاندىرۋ ماسەلەسىن تولىعىمەن شەشۋ جوسپارلانىپ وتىر.

اماناتتىقتار قالاداعى «بەلسەندى ۇزاق ءومىر ءسۇرۋ» ورتالىعىنا بارىپ, اعا بۋىن وكىلدەرىنە زەينەت جاسىنداعى ادامداردىڭ ءومىر ساپاسىن جاقسارتۋ جونىندەگى پارتيانىڭ باستامالارى تۋرالى ايتىپ بەردى. وسى كۇنى «اينا» بازارىندا ءوزىن-ءوزى جۇمىسپەن قامتىعان جاستارمەن ەكسپرومت-كەزدەسۋ ءوتتى. شىمكەنتتە پارتيانىڭ سايلاۋالدى باعدارلاماسى اياسىندا 6 مىڭنان استام جاس تەگىن كاسىپتىك ءبىلىم, 32 مىڭ ادام كاسىپكەرلىك نەگىزدەرىن وقۋعا مۇمكىندىك الادى جانە 5 مىڭ جاس العاشقى جۇمىس ورىندارىمەن قامتاماسىز ەتىلەدى.

ۇگىت-ناسيحات ناۋقانى باستالعاننان بەرى 17 كۇن ىشىندە اماناتتىقتار 1 871 300 ادام قاتىسقان 19 مىڭ ءىس-شارا وتكىزدى. قوعامدىق قابىلداۋ بولمەلەرىنە سايلاۋشىلاردىڭ 14 700-دەن استام ۇسىنىس-پىكىرى كەلىپ ءتۇستى.